La Bibia piemontèisa/Testament Vej/Salm/Salm 106

←Salm 106

La Bibia piemontèisa Ij Salm

Salm 107→

Ij Salm

La Bìbia piemontèisa - Salm 106

106. Laudé Nosgnor! Rende grassie a Nosgnor

Ël Salmista a ‘rcòrda la longa stòria dj’arvire d’Israel contra 'd Nosgnor, malgré tute le benedission che Nosgnor a l’avìa sèmper daje.

¹Laudé Nosgnor! Rende grassie a Nosgnor, përché chiel a l'é brav^[1]. Soa misericòrdia a dura për sèmper! ²Chi ch'a podrà mai conté tùit j'at potent che chiel a l'ha fàit o dé cont ëd tute j'assion degne 'd làude che chiel a l'ha compì? ³Che 'd boneur a l'han për dabon coj ch'a travajo për fé trionfé la giustissia e ch'a fan sèmper lòn ch'a l'é giust!

⁴Nosgnor! Arcòrd-te 'd mi cand ch'it mostre toa binvolensa a tò pòpol! Ancòrz-te 'd mi cand ch'it delìbere^[2], ⁵parèj ch'i vëdda la prosperità 'd coj ch'it l'has sernù, ch'im arlegra con toa nassion e ch'im anglòria ansema con la gent ch'at aparten^[3].

⁶I l'oma pecà tant coma ij nòstri antich^[4], i l'oma fàit lòn ch'a l'é pa giust, i l'oma fàit lòn ch'a l'é mal. ⁷Ij nòstri antich ant l'Egit a l'han pa tenù an bon cont ij miràcoj ch'it l'avìe fàit, a l'han pì nen avisàsne 'dla quantità granda 'd favor che ti 't l'avìe faje, e a son arvirasse contra 'd ti dacant al mar Ross^[5]. ⁸Con tut lòn, chiel a l'ha delivràje a càusa 'd soa arputassion^[6], për fé conòsse soa potensa^[7]. ⁹A l'ha crijà contra^[8] 'l Mar Ross e 'l mar a l'é suvasse. A l'ha mnaje a travers ël fond dël mar coma s'a fussa 'n desert. ¹⁰A l'ha delivràje da la potensa 'd coj ch'a-j j'avìo an ghignon e a l'ha salvaje da la potensa^[9] dij sò nemis. ¹¹J'aque a l'han coatà ij sò nemis e gnanca un ëd lor a l'é survivuie. ¹²A l'han chërdù a soe promësse e a l'han cantaje 'd làude^[10].

¹³Con tut lòn a l'han dësmentià an pressa lòn che chiel a l'avìa fàit, a l'han pa vorsù speté soe istrussion. ¹⁴Ant ël desert a l'han avù anvìa 'd carn, tant che a n'avìo mai pro, e a l'han dësfidà^[11] Nosgnor ant ël desert. ¹⁵Chiel a l'ha daje la contenta, peui, nopà, a l'ha faje ciapé na maladìa^[12]. ¹⁶Ant ël campament a son pijass-la mal contra 'd Mosè e contra 'd Aron, ël sant sacerdòt ëd Nosgnor, ¹⁷ma la tèra a l'é duvertasse e a l'ha travondù Datan; a l'ha coatà tuta la banda d'Abiram. ¹⁸Ël feu a l'ha brusà tuta cola partìa 'd gent, le fiame a l'han consumà tuta cola canaja^[13].

¹⁹An sl'Horeb a l'han fasse la mistà d'un vailèt e a son butasse an ginojon dë dnans a 'n buracio 'd metal. ²⁰A l'han baratà sò Dé majestos con na mistà d'un beu ch'a mangia d'erba. ²¹A l'han arfudà 'l Dé ch'a l'avìa liberaje, col ch'a l'avìa fàit còse grande an Egit, ²²d'assion maravijose 'nt ël pais ëd Cam, d'assion potente dacant al Mar Ross. ²³Anlora Nosgnor a l'ha mnassà 'd anienteje, ma Mosè, sò sernù, a l'ha 'ntërcedù për lor parèj che soa ràbia a chitèissa e a-j anientèissa pa pì^[14]. ²⁴A l'han arfudà na tèra pien-a 'd bon frut, a l'han pa vorsù chërde a soe promësse^[15]. ²⁵A l'han bërbotà an soe tende, a l'han pa scotà Nosgnor. ²⁶Antlora Nosgnor a l'ha fàit giurament ch'a l'avrìa faje meuire 'nt ël desert^[16], ²⁷ch'a l'avrìa fàit meuire ij dissendent ëd lor antrames ëd le nassion, che a l'avrìa dësbergiairaje antrames le nassion forëstere^[17]. ²⁸A son butasse an ginojon dë 'dnans a Baal ëd Peor e a l'han mangià 'd vìtime 'd sacrifissi smonù ai mòrt. ²⁹A l'han fàit anrabié Nosgnor për lòn ch'a l'han fàit, e na piaga a l'é stàita dëscadnà an mes a lor. ³⁰Fineas a l'é alvasse për fé giustissia e la piaga a l'é chitasse. ³¹Lòn ch'a l'ha fàit a l'é staje acredità coma na benemerensa da generassion a generassion^[18].

³²A l'han falo 'nrabié dacant j'aque 'd Merìba, e Mosè a l'ha dovù patì a càusa 'd lor, ³³përchè a l'han sagrinalo^[19] an sò spirit e chiel a l'ha parlà 'd manera svantà^[20]. ³⁴A l'han pa anientà le nassion coma che Nosgnor a l'avìa comandaje. ³⁵A son mës-ciasse con le nassion e a l'han amprendù a vive tanme lor. ³⁶A l'han adorà ij sò dé fàuss e lolì a l'é stàit për lor un trabucèt^[21]. ³⁷A l'han sacrificà sò fieuj e soe fije a 'd mascon^[22]. ³⁸A l'han spantià 'd sangh nossent - ël sangh dij sò fieuj e 'd soe fije, sacrificà ai dé fàuss ëd Canan^[23]. ³⁹Për lòn ch'a l'han fàit a son antamnasse e a son sbassasse a la vërgògna.

⁴⁰A l'é parèj che Nosgnor a l'é 'nrabiasse con lor e a l'ha dëspressià 'l pòpol ch'a l'é 'l sò^[24]. ⁴¹A l'ha consëgnaje a le nassion e a coj ch'a-j'avìo 'n ghignon e parèj a l'han crasaje. ⁴²Ij sò nemis a l'han acablaje, a son stàit sogetà a lor.

⁴³Vàire vire Nosgnor a l'avìa liberaje, ma lor a l'avìo 'n contegn ostinà e con ij sò pecà a son dësgradasse. ⁴⁴Con tut lòn, Nosgnor a l'é sagrinasse 'd soa aflission, cand che chiel a l'ha sentù ij sò crij d'agiut. ⁴⁵A l'é arcordasse dël Pat ch'a l'avìa stipulà con lor e a l'ha gavaje ij castigh ch'a patìo përchè a l'ha avune compassion. ⁴⁶A l'ha fàit che coj ch'a-j crasavo a n'avèisso 'dcò compassion^[25].

⁴⁷Lìberne, Nosgnor, nòst Dé! Archeujine da 'n mes ëd le nassion. Antlora i renderoma grassie a tò nòm sant e is glorieroma 'd toe assion degne 'd làude. ⁴⁸Nosgnor Dé d'Israel a mérita d'esse laudà për tuta l'eternità. Che tut ël pòpol a disa: "I soma d'acòrdi^[26]! Aleluja! Ch'a sia laudà Nosgnor^[27]!".

Nòte

1. Cfr. 1 Crònache 16:34; 2 Crònache 5:13; 7:3; Esdra 3:11; Salm 100:5; 107:11; 118:1; 136:1; Geremìa 33:11.
2. "Ancòrz-te 'd mi cand ch'it delìbere" a peul ëdcò esse voltà: "fame visita con toa salvassion".
3. O "toa ardità".
4. O "nòstri pare".
5. Cfr. Surtìa 14:10-12.
6. O "a càusa 'd Sò Nòm".
7. O "parèj che Chiel a arvelèissa Soa potensa".
8. O "a l'ha mnassà".
9. O "man".
10. 106:9-12 cfr. Surtìa 14:21-31.
11. O "butà a la preuva".
12. O "consonsion".
13. 106:16-18 cfr. Numer 16:1-35.
14. 106:19-23 cfr. Surtìa 32:1-14.
15. O "a Soa Paròla".
16. 106:24-26 cfr. Numer 14:1-35.
17. Cfr. Levitich 26:33.
18. 106:28-31 cfr. Numer 25:1-13.
19. O "daje d'ameiror".
20. 106:32-33 cfr. Numer 20:2-13.
21. 106:34-36 cfr. Giudes 2:1-3; 3:5-6.
22. Cfr. 2 Re 17:17.
23. Cfr. Numer 35:33.
24. O "ch'a l'é soa ardità".
25. 106:40-46 cfr. Giudes 2:14-18.
26. O "Amen!"
27. Cfr. 1 Crònache 16:36-36.

---