La Bibia piemontèisa/Testament Vej/Numeri/Numeri 35

←Numeri 34

La Bibia piemontèisa Nùmeri

Nùmeri 36→

Ij nùmer

La Bìbia piemontèisa - Numer 35

35

Le sità levìtiche

¹Nosgnor a l’ha ‘ncora parlà a Mosè ant le Vàude 'd Moab, a la riva dël Giordan, dëdnans ëd Gérico. A l’ha dije: ²"Comandje a j’Israelita che, dij teritòri ch’a son tocaje an ardità, a dago ai Levita cheiche sità dova ch’a ‘ndran a steie, con ij pasturagi ch’a-i son dantorn. ³Parèj ij Levita a l’avran ëd sità anté ch’a podran vive e a l’avran a disposission ëd pasturagi për soe bestie, për ij sò beni, e për tùit ij sò animaj. ⁴Ij pasturagi ch’i dareve ai Levita a dovran estend-se da la banda da fòra dle muraje dla sità fin-a a na distansa ‘d sinch-sent méter tut d’antorn.

⁵I l’avreve da mzuré mila méter për minca fianch, an diression ëd l’orient, dël meridion, dël ponent e dël setentrion, con la sità an mes. Coste a saran le tère ‘d pasturagi d’antorn ëd le sità. ⁶An tra le sità che i dareve ai Levita ch’ a-i sio ses sità d'arfugi dova ch’as podrà dé protession a coj ch’a l’han massà cheidun sens’ avèjne 'ntension. Ëd pì, l’eve da deje quarantedoi d’àutre sità.

⁷An tut, deje ai Levita quaranteut sità con ij sò pasturagi. ⁸Pijeje da l’ardità dj’àutri Israelita, an proporsion al nùmer ëd sità ch’a l’ha minca tribù; dij teritòri pì gròss, pijene 'd pì, e dij pì pcit, pijene 'd men-o. Minca tribù a l’ha da deje ai Levita ‘d sità an proporsion a l’ardità ch’a son tocaje^[1].

Le sità d’arfugi

⁹Nosgnor a l’ha ‘ncora parlaje a Mosè. A l’ha dije: ¹⁰“Comunica sossì a j’Israelita: ‘Cand ch’i l’avreve travërsà ‘l Giordan e ch’i sareve intrà ant ël pais ëd Canan, ¹¹i sernereve cheiche sità coma ‘d leugh anté ch’a podrà arfugesse col ch’a l’ha massà cheidun sens’ avèjne l’intension. ¹²Coste sità av serviran për arfugieve da col ch’a l’ha da fé arvangia dla vitima^[2]. Parèj, chi ch’a l’ha causà la mòrt a sarà pa condanà sensa ch’a sia comparì an giudissi dë 'dnans ëd la comunità. ¹³Stabilì ses sità d’arfugi: ¹⁴tre a orient dël Giordan e tre ant ël pais ëd Canan. Ste-sì a saran le sità d’arfugi. ¹⁵Tuti j’Israelita, tùit ij foresté o chicassìa ch’a viva an tra ‘d vojàutri, s’a l’ha massà cheidun sens’ avèjne l’intension, as podrà arfugess-ie.

¹⁶Ma s’a l’ha frapà cheidun con cheicòsa ‘d fer e a l’ha falo meuire, a l’é n’amassida e a l’avrà da esse condanà a mòrt. ¹⁷S’a l’é mòrt tirandje na pera për masselo, a l’é n’amassida e a l’avrà da esse condanà a mòrt. ¹⁸S’a l’ha frapalo con n’utiss ëd bòsch con intension ëd masselo, a l’é n’amassida e a l’avrà da esse condanà a mòrt. ¹⁹Col ch’a l’ha l’ancombensa ‘d fé arvangia

dla vitima a farà l’esecussion dl’amassida: quand ch’a treuva l’amassida, a lo masserà.

²⁰S’a l’ha massà për òdio dandje na bòta an sla testa o tirandje adòss cheicòsa con l’intension ëd felo, ²¹o bin ancora, për nimicissia a l’avèissa frapalo con un pugn e col-lì a meuir, col ch’a l’ha colpilo a l’é n’amassida e col ch’a l’ha l’ancombensa ‘d fé vendeta dla vitima a farà l’esecussion dla sentensa: cand ch’a treuva l’amassida, a lo masserà.

²²Ma s’a lo frapa a l’amprovista, sensa nimicissia o s’a-j tira adòss quaicòsa sens’ avèjne l’intension; ²³o con na grossa pera ch’a l’é pro për felo meuire sensa vëdd-lo, e a-j la campa adòss e col-lì a meuir, bele s’a l’era nen sò nemis nì a sercava ‘d feje dël mal, ²⁴anlora la comunità a l’ha da giudiché an tra col ch’a l’ha colpì e col ch’a l’ha da fé vendeta dla vìtima, an tnisend cont ëd coste sircostanse. ²⁵Parèj la comunità a guernerà dal vendicator col ch’a l’ha massà sens’ avèjne l’intension; a lo farà artorné a la sità d’arfugi ch’a l’avìa arseivulo e a-j resterà fin-a a la mòrt del gran sacerdòt an funsion, ch’a l’era stàit consacrà con l’euli sant. ²⁶Tutun, se col che a l'ha massà, a vnèissa da seurte dal teritòri dla sità andova ch'a l'era ‘rfugiasse, ²⁷e ‘l vendicator a lo treuva, sto-sì a podrà masselo e a sarà nen colpèivol ëd soa mort. ²⁸Përchè l’amassida a l’avìa bin da resté ant la sità d’arfugi fin-a a la mòrt del gran sacerdòt. Quand che ‘l grand sacerdòt a meuir, anlora a podrà ‘rtorné a la tèra andova ch’a l’ha ‘d possess. ²⁹Costa-sì a sarà la legislassion decretà për vojàutri e për ij vòstri dissendent, daspërtut andova ch’i andreve a sté.

³⁰Për condané a mòrt n’amassida a sarà necessaria la diciarassion ëd pì che un testimòni. La diciarassion d’un sol testimoni a l’é nen pro për condané cheidun a mòrt^[3]. ³¹I podreve pa nen aceté d’indenisassion për salvé la vita d’un amassida colpèivol d’omissidi. Col òm a l’ha da meuire. ³²I acetereve ‘dcò pa n’indenisassion ëd col ch’a l’é stàit arseivù ant na sità d’arfugi përchè a peuda ‘rtorné a vive an soa tèra anans ch’a meuira ‘l gran sacerdòt.

³³I profanereve pa ‘l pais andova ch’i vivreve, përchè ch’a l’é ‘l sangh ch’a profana la tèra, e la tèra a peul esse purificà dël sangh ch’a l’é staje vërsà, mach dal sangh ëd col ch’a l’avèissa vërsalo. ³⁴A l’é consentì gnente ch’a renda 'mpur ël pais andova ch’i stareve e che mi midem i në faso mia abitassion, përchè mi, ël Signor, i stago an tra j’Israelita.

Nòte

1. 35:1.8 cfr. Giosué 21:1-42.
2. O “vendicator dël sangh”.
3. Cfr. Deuteronòmi 17:6; 19:15.