La Bibia piemontèisa/Testament Vej/Numeri/Numeri 34

←Numeri 33

La Bibia piemontèisa Nùmeri

Nùmeri 35→

Ij nùmer

34

Ij confin ëd Canan

¹Nosgnor a l’ha ‘ncora parlaje a Mosè. A l’ha dije: ²“Daje coste istrussion a j’Israelita: ‘Adess i ‘ntrereve ant ël pais ëd Canan. Sto-sì a l’é ‘l teritori ch’iv toca an ardità, e costi-sì a son ij sò confin: ³Vòst confin meridional a ancaminerà dal desert ëd Sin, davzin a Edom; parèj che ij vòstri finagi dël sud a partiran da lë stremità dël Mar Mòrt, a levant; ⁴costa frontiera a virerà a mesdì dla Montà dlë Scorpion, a passerà për Sin e a së slargherà ant ël meridion ëd Cades-Barnea; peui a proseguirà 'nvers Casar-Adar e a passerà për Asmon. ⁵Da Asmon la frontiera a virerà fin-a 'l torent d'Egit e a finirà al mar. ⁶Vòstri finagi a ponent a saran ël Gran Mar cola-lì a sarà vòstra frontiera ossidental. ⁷Vòstra frontiera dël nòrd a sarà costa: an partend dal Gran Mar, i tirereve na riga fin-a a la montagna d'Hor; ⁸dal mont Hor, i trassereve an diression d'Amat e l'ëstremità dla frontiera a sarà Zedad; ⁹ij finagi a andran anans fin-a Zifron e a finiran a Casar-Enan: costa vòstra frontiera 'd tramontan-a. ¹⁰I tirereve vòstra frontiera oriental da Casar-Enan a Sefam; ¹¹ij finagi peui a caleran da Sefam anvers ëd Ribla, a levant d'Ain; peui la frontiera a calerà ancora e a së slargherà arlongh ël mar ëd Galilea a est. ¹²Peui la frontiera andrà giù anvers ël Giordan e a finirà ant ël Mar Mòrt. Costì a sarà vòst pais con soe frontiere tut d'antorn”.

Neuve istrussion për la spartission dël pais

¹³Mosè a l'ha comunicaje tut sòn a j'Israelita. A l’ha dije: "Cost a l'é 'l pais ch’i na fareve la spartission a sòrt e che Nosgnor a l'ha comandà 'd deje a neuv tribù e mesa^[1]: ¹⁴da già che la tribù dij fieuj ëd Ruben, conform ai casà dj'antich, cola dij Gadita, scond ij casà dij cè, e metà dla tribù 'd Manasse a l'han già arseivù soa porsion. ¹⁵Ij possediment ëd coste doe tribù e dla metà dla tribù ‘d Manasse, as treuvo dë 'dnans a Gérico, a levant, an sla riva oriental dël Giordan”^[2].

Lista dj’ancaricà ‘d fé la spartission

¹⁶Nosgnor a l’ha parlà ‘ncora a Mosè. A l’ha dije: ¹⁷“Costi-sì a son ij nòm dj'òm ch’a faran la spartission dël pais an tra 'd vojàutri: Eleasar sacerdòt e Giosué, fieul ëd Nun. ¹⁸Për giuteje an ëst’ancombensa, pijé ‘n cap për minca tribù. ¹⁹Costi-sì a son ij sò nòm: Për la tribù ëd Giuda, Caleb fieul ëd Iefune. ²⁰Për la tribù dij fieuj ëd Simeon: Samuel fieul d'Amiud. ²¹Për la tribù 'd Beniamin: Elidad ben Chislon. ²²Për la tribù dij fieuj 'd Dan, ël cap Buchi fieul ëd Iogli. ²³Për ij fieuj ëd Giusep, për la tribù dij fieuj ed Manasse: cap Aniel fieul d'Efod; ²⁴për la tribù dij fieuj d'Efraim: cap Chemuel fieul ëd Siftan. ²⁵Për la tribù dij fieuj 'd Zabulon: cap Elisafan ben Parnach. ²⁶Për la tribù dij fieuj d'Issacar: cap Paltiel fieul d'Asan. ²⁷Për la tribù dij fieuj d'Aser: cap Achiud fieul ëd Selomi. ²⁸Për la tribù dij fieuj ëd Neftali: cap Pedael fieul d'Amiud”. ²⁹Costi a son coj che da Nosgnor a l'han avù l'ancàrich ëd fé la spartission dij possediment dël pais ëd Canan an tra j'Israelita.

Nòte

1. Cfr. Numer 26:52-56.
2. 34:13-15 cfr. Giosué 14:1-5.