La Bibia piemontèisa/Testament Vej/Numeri/Numeri 26

←Numeri 25

La Bibia piemontèisa Nùmeri

Nùmeri 27→

Ij nùmer

26

Second censiment dël pòpol d’Israel

¹Dòp ëd col flagèl, Nosgnor a l'ha ‘ncora parlà a Mosè e a Eleasar, fieul dël sacerdòt Aron. A l’ha dije: ²“Fé 'l censiment ëd tuta la comunità, anregistrandje për clan^[1], da l'età 'd vint agn an sù, tui j’Israelita ch’a son abij a fé 'l soldà. ³Antlora Mosé e 'l sacerdòt Eleasar, a l'han parlaje ant le vàude dël pian ëd Moab, a levant dël Giordan, an facia ‘d Gérico. A l’han comunicaje ⁴che Nosgnor a l’avìa ordinà a Mosè d’anregistré tuti j’Israelita da vint agn an sù.

Le tribù israelite che l’ero surtìe dal pais d’Egit a l’ero ste-sì:

Ruben ⁵Ruben, primnassù d'Israel. Costi ij fieuj ëd Ruben: Enoch, d'an dova a-i riva la famija dj'Enochita; Palu, d'andova a dëssend la rassa dij Paluita; ²⁶Esron: a-i dëssend la famija dj' Esronita; për Carmi a-i riva la parentela dij Carmita. ⁷Coste le famije dij Rubenita: ij comprèis ant ël censiment a l'ero stàit 43.730. ⁸Fieuj ëd Palu: Eliab. ⁹fieuj d'Eliab: Nemuel, Datan e Abiram. Costi-sì a l'ero stàit Datan e Abiram, òm considerà da la comunità, che a l'ero arvirasse contra 'd Mosè e Aron; lor a l'ero con la gent ëd Còre ant ël moment che a son arvirasse contra 'l Signor. ¹⁰La tèra a l'é duvertasse e a l'ha travonduje ansema ai partigian ëd Còre, quand che cola gent a l'é mòrta e 'l feu a l'ha consumà dosentessinquanta òm. Sossì a l’é servì d’esempi al pòpol. ¹¹Nopà ij fieuj ëd Còre a son pa mòrt.

Simeon ¹²Ij fieuj ëd Simeon për clan: për Nemuel, le famije nemuelite; da Iamin, ël clan iaminita; da Lachin, ij Lachinita; ¹³për Zerach, le famije zarchite; da Saul: la stirp saulita. ¹⁴Coste le famije simeonite. A comprendìo 22.200 censì.

Gad ¹⁵Fieuj ëd Gad, conform le famije. Për Zefon, ël clan zefonita; da Aghi j' Aghita; për Suni, le famije sunite. ¹⁶Për Osni, la parentela dj'Osnita e da Eri j'Erita; ¹⁷për Arodi, ël clan arodita, e da Areli le famije arelite. ¹⁸A son ëstàit costi-sì ij clan dij fieuj ëd Gad: 40.500 òm.

Giuda ¹⁹La tribù ‘d Giuda, sensa conté ij sò fieuj Er e Onan ch’a son mòrt ant la tèra 'd Canan, ²⁰fàita dai clan dissendent dj’àutri sò fieuj Sela, Peres e Zerach. ²¹Ij clan dissendent ëd Peres a j’ero dij sò doi fieuj Chetsron e Camol. ²²Ël total dij censì dij clan ëd Giuda a l’era ‘d 76.500 òm.

Issacar ²³La tribù d’Issacar, formà dai clan dissendent dij sò fieuj Tola, Puva, ²⁴Iasub e Simron. ²⁵Ël total dij censì dij clan d’Issacar a l’era ‘d 64.300 òm.

Zabulon ²⁶La tribù ‘d Zabulon, formà dai clan dissendent dij sò fieuj Sered, Elon e Ialel. ²⁷Ël total dij censì dij clan ëd Zabulon a l’era ‘d 60.500 òm.

Manasse ²⁸Le tribù ‘d Manasse e d’Efraim, formà dai clan dissendent ëd Giusèp. ²⁹La tribù ‘d Manasse a l’era formà dai clan dissendent ëd Machir, pare ‘d Galad. ³⁰Da Galad a son ëvnuje ij clan dissendent dij fieuj Jeser, Elech, ³¹Asriel, Sichem, ³²Semida e Efer, ³³Zelofcad, fieul d’Efer, a l’ha pa avù ‘d fieuj, ma ‘d fije, ch’as ciamavo: Macla, Noa, Ogla, Milca e Tirsa. ³⁴Ël total dij censì dij clan ëd Manasse a l’era ‘d 52.700 òm.

Efraim ³⁵La tribù d’Efraim, formà dai clan dissendent dij sò fieuj Sutela, Becher, e Tacan. ³⁶Ël clan dissendent ëd Sutela a l’era col ëd sò fieul Eran. ³⁷Ël total dij censì dij clan d’Efraim a l’era ‘d 32.500 òm. Ij clan dë ste doe tribù a j’ero dissendent ëd Giusèp.

Beniamin ³⁸La tribù ‘d Beniamin, formà dai clan dissendent dij sò fieul Bela, Asbel, Airam, ³⁹Sufam, e Ufam. ⁴⁰Ij clan dissendent ëd Bela a l’ero coj dij sò fieuj Ard e Naman. ⁴¹Ël total dij censì dij clan ëd Beniamin a l’era ‘d 45.600 òm.

Dan ⁴²La tribù ‘d Dan, formà mach dij clan dissendent ëd sò fieul Suam. ⁴³²Ël total dij censì dë sto clan a l’era ‘d 64.400 òm.

Aser ⁴⁴La tribù d’Aser, formà dai clan dissendent dij sò fieuj Ima, Isvi, e Beria. ⁴⁵Ij clan dissendent da Beria a j’ero coj ëd sò fieuj Eber e Malchiel. ⁴⁶La fija d'Aser as ciamava Sera. ⁴⁷Ël total dij censì dij clan d’Aser a l’era ‘d 53.400 òm.

Neftali ⁴⁸La tribù ‘d Neftali, formà dai clan dissendent dij sò fieuj Iacsel, Guni, ⁴⁹Ieser, e Silem. ⁵⁰Ël total dij censì dij clan ëd Neftali a l’era ‘d 45.400 òm.

⁵¹Ël nùmer total dj’Israelita censì a l’era ‘d 601.730 òm^[2].

Spartiura dël pais

⁵²Nosgnor a l’ha parlà ancora a Mosè. A l’ha dije: ⁵³“It l’has da spartì l’ardità dël pais an tra coste tribù conform al nùmer dij censì. ⁵⁴Minca tribù a ‘rseivrà un teritòri proporsionà al nùmer dij censì. Na tribù numerosa a l’avrà un teritòri pì grand che col ëd na tribù pì pcita. ⁵⁵A sarà la sòrt che a partagerà 'l pais. Scond ël nùmer dij nòm ëd le tribù patriarcaj, a s'arseivran soe ardità. ⁵⁶Ël possess ëd minca tribù a sarà spartì da la sòrt conform al cit o gròss nùmer da ten-e cont^[3].

Ters censiment dij Levita

⁵⁷Ij clan dij Levita censì a j’ero ‘d Gherson, Chelat e Merari. ⁵⁸Costi clan a comprendìo ‘dcò coj ëd Libni, Ebron, Macli, Musi e Còre. Chelat a l’era pare d’Amram. ⁵⁹La fomna d'Amram as ciamava Iochebed, fija 'd Levi, ch’a l'era nassùje n'Egit. Chila a l'ha daje a Amram: Aron, Mosè e Miriam seure 'd lor. ⁶⁰Ij fieuj d’Aron a j’ero Nadab, Abiu, Eleasar e Itamar^[4]. ⁶¹Ma Nadab e Abiu a son mòrt quand ch’a l’han smonù a Nosgnor un përfum ch’a l’era nen consentì^[5].

⁶²Ël total dij Levita censì, d’un mèis d’età an sù,a l’era ‘d 23.000, an tra òm e giovnòt. A son ëstàit nen censì con j’àutri Israelita, pr’ ël motiv ch’a l’avìo avù pa ‘d tèra an ardità.

⁶³Sto-sì a l’é stàit l’arzultà dël censiment dj’Israelita ch’a l’han fàit Mosè e ‘l sacerdòt Eleasar ant le vàude ‘d Moab, dapara dël Giordan, dëdnans a Gérico. ⁶⁴An tra 'd lor a-ì j'era pì gnun ëd cola gent che Mosè e Aron a l'avìo rëcensì ant ël desert dël Sinai. ⁶⁵Nosgnor a l’avìa dije ch’a sarìo mòrt ant ël desert^[6], e parèj a l’é stàit. A l’é restaje gnun, con l’ecession ëd Caleb, fieul ëd Iefune e Giosuè, fieul ëd Nun.

Nòte

1. O “conform a la ca dij sò pare”, “conform soe casà”.
2. 26:1-51 cfr. Nùmer 1:1-46.
3. 26:52-56 cfr. Numer 34:13; Giosuè 14:1-2.
4. Cfr. Numer 3:2.
5. Cfr. Levitich 10:1-2; Numer 3:4.
6. Cfr. Numer 14:26-65.