La Bibia piemontèisa/Testament Vej/Numeri/Numeri 3

←Numeri 2

La Bibia piemontèisa Nùmeri

Nùmeri 4→

Ij nùmer

3

Ij Levita al servissi dij sacerdòt

¹Costi-sì a son ij dissendent d'Aron e 'd Mosé^[1] al temp che Nosgnor a l’avìa parlaje a Mosè an sël Mont Sinai. ²Costi, ij nòm dij fieuj d'Aron: Nadab, ël pì grand, peui Abicu, Eleasar e Itamar^[2]. ³Costi ij nòm dij fieuj d'Aron, ëd sacerdòt che a l'avìo arseivù l'onsion e che a l'ero stàit sacrà për esercité 'l sacerdòssi. ⁴Nadab e Abiu a l'ero mòrtje a la presensa ‘d Nosgnor, ant ël desert dël Sinai, ant ël moment che a l'avìo presentà a Nosgnor n’oferta ‘d përfum ch’a l’era nen consentìa^[3]. Lor a l'avìo pa avù 'd masnà e a l'é Eleasar e Itamar che a son ëstàit fàit sacerdòt an presensa d'Aron sò pare.

⁵Nosgnor a l’ha ancora parlà a Mosè. A l’ha dije: ⁶“Fà vnì la tribù dij Levita e butla a dësposission d'Aron ël sacerdòt: a saran a sò servissi. ⁷Ij Levita a guerneran lòn ch'a l'é fidà a chiel e a tuta la comunità d’Israel dë 'dnans ëd la Tenda dël Rëscontr. As ocuperan ëd tut lòn ch’a riguarda ‘l Tabërnàcol. ⁸A l'avran an guerna tùit j'asi dla Tenda dël Rëscontr; a në saran ij servidor an fasent tut lòn ch’a tocarìa a j’àutri Israelita e as ocuperan ëd tute le necessità dël Tabërnacol. ⁹Separa, donca, ij Levita da j’àutri Israelita e butje a dësposission d’Aron e dij sò fieuj. An tra tùit j’Israelita a l’é lor ch’a-j son assegnà. ¹⁰Le funsion sacerdotaj, lassje an càrich d’Aron e dij sò fieuj. Se cheidun, sensa esse sacerdòt, as n'ancalerà a eserciteje, a sarà condanà a mòrt”.

¹¹Nosgnor a l’ha ancora parlà a Mosè. A l’ha dije: ¹²“An tra j’Israelita i l’hai sërnù ij Levita për fé lòn ch’a tocherìa ai primnà dj’Israelita. Ij Levita, donca, a son ij mè. ¹³Përchè minca primnassù a l'é mè^[4]. Ant ël moment che mi i l'hai colpì tùit ij primnà ant ël pais d'Egit, mi i son arzervame an Israel tùit ij primnassù d’Israel e dle bestie. A l’é për lòn ch’a son ij mè. Mi i son ël Signor”.

Prim censiment dij Levita

¹⁴Nosgnor a l’ha ancora parlà a Mosè ant ël desert dël Sinai. A l’ha dije: ¹⁵“Fà ‘n censiment dij Levita conform a le casà dij sò grand e 'd soe famije e conta tùit ij mas-cc da l'età d'un mèis an su”.

¹⁶Mosè, donca, a l’ha fane ‘n censiment conform al comand ëd Nosgnor, pròpi com a l'era staje ordinà 'd fé. ¹⁷Costi-sì a son ij fieuj ëd Levi conform a sò nòm: Gherson, Cheat e Merari; ¹⁸Costi ij nòm dij fieuj ëd Gherson, conform soe famije: Libni e Simei. ¹⁹Ij fieuj ëd Cheat ëscond soe famije: Amram, Isear, Ebron e Usiel. ²⁰Ij fieuj ëd Merari conform a soe famije: Macli e Musi. A son le famije dij Levita scond soa casà dij cé. ²¹Da Gherson a ven-o giù la famija dij Libnita e la famija dij Simeita, ch’ a fan la famija dij Ghersonita.

²²Coj ch'a l'ero stàit anrëgistrà, an contand tùit ij mas-cc da l'età d'un mèis an su, a l'ero 7.500. ²³Le famije dij Ghersonita a l'avìo camp darera dël Tabërnàcol, a ponent. ²⁴A-j comandava Eliasaf, cap dla casà, fieul ëd Lael. ²⁵Ël servissi dij fieuj ëd Gherson ant la Tenda dël Rëscontr a l'era për ël Tabërnàcol, la tenda, soa coerta, la portera ant l'andron ëd la Tenda dël Rëscontr, ²⁶ij ridò dla cort e la portera a l'intrada dla cort, d'antorn al Tabërnacol e a l'autar, sò soastr e tut sò servissi.

²⁷Da Cheat a rivo: la famija dj' Amramita, cola dj'Isarita, la famija dj'Ebronita e cola dj'Osielita. Coste le famije dij Cheatita, ²⁸che, contà tùit ij mas-cc, da l'età d'un mèis an sù, a son ëstàit 8.600, ancaricà dël soèn dël Santuari. ²⁹Le famije dij fieuj ëd Cheat, a l'avìo camp tacà al Tabërnàcol, anvers mesdì. ³⁰Ël cap ëd la casà dij cé dij Cheatita a l'é stàit Elisafan ben Osiel. ³¹Sò servissi a rësguardava l'Èrca, la tàula, ël Grand Candlé, j'autar e j'asi dël Santuari, necessari a l'esercissi dël cult, ël Vel e tut ël servissi. ³²Eleasar, fieul d'Aron, sacerdòt, a l'é stàit ël prim an tra ij cap di Levita, e a dirigìa coj ch'a l'ero j'ancaricà a la guerna dël Santuari. ³³Da Merari a riva la famija dij Maclita e cola dij Musita. Coste-sì a son le famije dij Merari, ³⁴che a l'ha contà an tra tùit ij mas-cc da un mèis an su, 6.200 përson-e. ³⁵Cap ëd la casà dij cé dle famije 'd Merari a l'é stàit Suriel ben Abicai. Lor a l'avìo butà camp aranda dla Tenda anvers tramontan-a. ³⁶L'ancàrich fidà ai fieuj ëd Merari a l'era 'l soèn dj'ass ëd la Tenda, soe stanghe, soe colòne, con sò ampëduss, tùit j'utiss e tut sò servissi, ³⁷le colòne dla cort tut d'antorn, soe base, sò pichèt e ij sò soastr.

³⁸Dë 'dnans ëd la Tenda dël Rëscontr, anvers levant, a j’ero acampasse Mosè, Aron e ij sò fieuj, che a l'avìo soagnà 'l Santuari, për cont dij fieuj d'Israel: lë strangé ch'a fussa avzinasse a sarìa stàit condanà a mòrt. ³⁹Tùit ij Levita censì da Mosè e Aron, conform soe famije, për órdin ëd Nosgnor, visadì tùit ij mas-cc da l'età da 'n mèis an su a son ëstàit 22.000.

Censiment dij primgénit d’Israel

⁴⁰Nosgnor a l’ha dije a Mosè: “Fà censiment ëd tùit ij primnà mas-cc an tra j'Israelita, da l'età d'un mèis an su, e fà 'l cont dij sò nòm. ⁴¹Peui, al pòst dij prim-nassù dj'Israelita, ti 't ciaperas për mi, ël Signor, ij Levita; 'dcò për ël cabial dij Levita, an leugh dij primnà dl' ëstrop gròss dij fieuj d'Israel. Mi i son ël Signor”.

⁴²Coma che Nosgnor a l'avìa comandaje, Mosè a l'ha rëcensì tùit ij primnassù dj'Israelita. ⁴³E an contand ij nòm ëd tùit ij primnà mas-cc da l'età d'un mèis an sù ch'a l'ero stàit censì: a l'ha dàit ël nùmer total ëd 22.273.

⁴⁴Nosgnor a l’ha parlaje ancora a Mosè. A l’ha dije: ⁴⁵“Separa ij Levita për mè servissi përchè a faso lòn ch’a tocherìa ai primgenit dj’àutri Israelita, ël bestiam dij Levita përchè a stago ant ël leugh dij primnà dël bestiam dj’àutri Israelita: ij Levita a son ij mè. Mi i son ël Signor. ⁴⁶It l’has, contut, da rëscaté ij dosentestantetré primnassù dj'Israelita che a passo 'l nùmer dij Levita. ⁴⁷It prendras sinch sicl për testa. A saran prelevà dal sicl dël Santuari, scond j’unità ‘d pèis ufissial dël Santuari, ch’a l’é ‘l sicl ëd vint ghere. ⁴⁸It daras costi dné a Aron e ai sò fieuj për ël riscat ëd coj che a son n'ecedensa.

⁴⁹Mosè a l'ha arseivù costi dné destinà al riscat ëd coj primgénit ch’a j’ero pa stàit dësangagià dai Levita. ⁵⁰L’arzan ch’a l’é stàit arcòlt dai primgénit a l’era ‘d 1365 sicl, scond l’unità ‘d pèis ufissial dël Santuari. ⁵¹Mosè a l’ha donca dàje a Aron e ai sò fieuj tut lòn che Nosgnor a l’avìa comandaje.

Nòte

1. La costrussion original dl’espression a l’é וְאֵלֶּה תּוֹלְדֹת (v’elleh toldot), ch’a l’é voltà, conform a la tradission: “Ora coste-sì a son le generassion” o “ij dissendent” e parèj a l’é voltà për tut ël lìber dla Génesi. Ël tèrmin a peul arferisse a ‘d registrassion, stòrie, genealogìe, nòm e conte ‘d gent. Ambelessì a l’é la registrassion ëd na lista genealògica con le funsion dij vàire përsonagi.
2. Cfr. Nùmer 26:60.
3. Cfr. Levìtich 10:1-2; Nùmer 26:61.
4. Cfr. Surtìa 13:2.