La Bibia piemontèisa/Testament Vej/Salm/Salm 105

←Salm 104

La Bibia piemontèisa Ij Salm)

Salm 106→

Ij Salm

105. Ringrassié Nosgnor

Ël poeta a ciama 'l pòpol a laudé Nosgnor përchè chiel a l'ha liberalo da la s-ciavensa an Egit e parèj chiel a l'ha compì lòn ch'a l'avìa promëttù a Abraham e sigilà 'nt sò Pat.

La Bibia piemontèisa - Salm 105

¹Ringrassié Nosgnor! Anvoché sò Nòm! Fé conòsse a tùit ij pòpoj lòn che chiel a l'ha fàit! ²Canté e fé 'd mùsica an sò onor! Dé notissia dij miràcoj che chiel a l'ha fàit! ³Andé fier ëd sò Nòm sant! Che ij cheur ëd coj ch'a sërco Nosgnor as arlegro!

⁴Sërché Nosgnor e la fòrsa che mach chiel a peul dene! Sërché sèmper Soa presensa! ⁵Arciamé a la ment ij segn miracolos che chiel a l'ha fàit, soe assion potente e ij giudissi ch'a l'ha emanà. ⁶Fieuj d'Abraham, servitor ëd Nosgnor! Vojàutri ij dissendent ëd Giacòb, j'Elet ëd Nosgnor! ⁷chiel a l'é Nosgnor, nòst Dé; chiel a dà esecussion ai sò giudissi an tuta la tèra. ⁸chiel as arcòrda sèmper dij decret sigilà an sò Pat, le promësse che chiel a l'ha fàit a mila generassion - ⁹la promëssa che chiel a l'ha fàit a Abraham^[1], la promëssa ch'a l'ha giurà 'd realisé për Isach^[2]! ¹⁰chiel a l'ha dàit a Giacòb tanme 'n decret, a Israel coma na promëssa ch'a val për sèmper, e ch'a disìa: ¹¹"A ti it darai la tèra 'd Canan coma na part ëd toa ardità^[3]".

¹²Cand che lor a l'ero pòchi, mach pòchi 'd nùmer, e ch'a vivìo ambelelà tanme 'd forësté, ¹³lor as n'andasìo dëdsà e dëdlà, da nassion a nassion, da 'n règn a n'àutr. ¹⁴Nosgnor a l'ha nen lassà che cheidun a-j crasèissa; për lor a l'ha dissiplinà dij rè. ¹⁵A l'ha dit: "Toché nen coj ch'i l'hai sernù! Fé pa dël mal ai mè profeta!^[4]". ¹⁶Nosgnor a l'ha fàit rivé na famin-a 'n tuta la tèra, a l'ha fàit calé le proviste^[5]. ¹⁷A l'ha mandà n'òm ch'a l'é 'ndaje danans - Giusèp, ch'a l'era stàit vendù tanme në s-ciav^[6]. ¹⁸Le caden-e a-j fasìo mal ai pé; a l'avìa 'n colarin ëd fer; ¹⁹fin-a 'l temp che la predission a l'é realisasse^[7]. La paròla ‘d Nosgnor a l'é comprovasse vera^[8]. ²⁰Ël rè a l'ha consentì ch'a fussa torna butà 'n libertà; col ch'a dominava 'd nassion a l'ha liberalo^[9]. ²¹A l'ha nominalo gerent ëd soa ca e aministrator ëd soe proprietà. ²²A l'ha daje l'autorità 'd lijé j'ufissiaj dël rè a soa volontà e d'esse 'l magìster dij sò consijé^[10].

²³Peui Israel a l'é trasferisse an Egit; Giacòb a l'é vivù për un cert temp ant la tèra 'd Cam. ²⁴Nosgnor a l'ha rendù sò pòpol motobin dru e a l'ha fàit ch'a rivèisso a esse pì 'd nùmer dij sò nemis^[11]. ²⁵A l'ha fàit ch'a l'avèisso an ghignon sò pòpol e ch'a maltratèisso ij sò servitor^[12].

²⁶Peui Nosgnor a l'ha mandà ij sò servitor Mosè e Aron, che chiel a l'avìa 'dcò sernù. ²⁷A l'han dàit esecussion ai sò segn miracolos për mojen ëd lor e d'assion da nen chërde 'nt la tèra 'd Cam. ²⁸A l’ha faje tombé ant lë scur. Mosé e Aron a l’han pa dzubidì ai sò órdin. ²⁹A l'ha fàit dventé 'd sangh soa eva tant da fene meuire ij pèss^[13]. ³⁰Ant la tèra d'Egit a l'é staje n’invasion ëd ran-e, ch'as anfilavo fin-a 'nt ël palass dël rè^[14]. ³¹A l'ha ordinà ch'a vnèisso le mosche, e 'd moschin a l'ero daspërtut^[15]. ³²A l'ha mandà la tempesta ansema a la pieuva e la lòsna a l'é abatusse su tut ël pais. ³³A l'ha ruinà soe vigne e ij sò fié, e a l'ha s-ciapà j'erbo an tut ël teritòri^[16]. ³⁴A l'ha ordinà ch'a vnèisso le cravëtte e tanti grij ch'as podìo gnanca contesse. ³⁵A l'han divorà tuta la vegetassion dël pais e tut ël gran dij camp^[17]. ³⁶A l'ha abatù tùit ij prim nà an soa tèra, le primissie 'd soa produssion^[18]. ³⁷A l'ha fane seurte fòra sò pòpol pì sgnor d'òr e d'argent - gnanca una 'd soe tribù a l'é 'ntrapasse. ³⁸L'Egit a l'é stàit content cand ch'a son andass-ne, përché ch'a l'avìa tëmma 'd lor^[19]. ³⁹Nosgnor a l'ha slargà su 'd lor na nìvola për coateje e a l'ha procuraje 'n feu për anlumineje la neuit^[20]. ⁴⁰A l'han ciamà dla carn e chiel a l'ha procuraje le quaje; a l'ha sodisfaje con ëd ròba da mangé ch'a venìa dal cel^[21]. ⁴¹A l'ha duvertà na rochera e a l'é surtìjne d'eva; na rivera a corìa 'nt un desert^[22].

⁴²Vera, Nosgnor a l'é 'rcordasse 'd Soa promëssa sacrà, cola ch'a l'avìa fàit a sò servitor Abraham. ⁴³Cand ch'a l'ha fàit seurte fòra sò pòpol, lor a son arlegrasse, ij sò elet a l'han crijà 'd gòj. ⁴⁴A l'ha daje 'l teritòri 'd d'àutre nassion, e a l'ha daje 'n proprietà lòn che d'àutri pòpoj a l'avìo frutà^[23], ⁴⁵e lòn përchè lor a podèisso osservé ij sò comandament e scoté Soe Lege. Aleluja! Laudé Nosgnor!

Nòte

1. Cfr. Génesi 12:7; 17:8.
2. Cfr. Génesi 26:3.
3. Cfr. Génesi 28:13.
4. Cfr. Génesi 20:3-7.
5. Cfr. Génesi 41:53-57.
6. Cfr. Génesi 37:28; 45:5.
7. Cfr. Génesi 30:20-40:23.
8. Cfr. Génesi 41:14.
9. Cfr. Génesi 41:39-41.
10. Cfr. Génesi 46:6; 47:11.
11. Cfr. Surtìa 1:7-14.
12. Cfr. Surtìa 3:1-4:17.
13. Cfr. Surtìa 7:17-21.
14. Cfr. Surtìa 8:1-6.
15. Cfr. Surtìa 8:20-24; 8:16-17.
16. Cfr. Surtìa 9:22-25.
17. Cfr. Surtìa 10:12-15.
18. Cfr. Surtìa 12:29.
19. Cfr. Surtìa 12:33-36.
20. Cfr. Surtìa 13:21-22.
21. Cfr. Surtìa 16:2-15.
22. Cfr. Surtìa 17:1-7; Nùmer 20:2-13.
23. Cfr. Giosué 11:16-23.