La Bibia piemontèisa/Testament Vej/Surtia/Surtia 16

←Surtia 15

La Bibia piemontèisa Surtìa (Èsod)

Surtìa 17→

Surtìa

16

La Bibia piemontèisa - Surtìa 16

Nosgnor a provëd la Mana

¹Apress d’esse partì da Elim, tuta la gent d'Israel^[1] a l'é rivà al desert ëd Sin, ch'as treuva an tra Elim e 'l Sinai, ël di ch'a fà quìndes ëd lë scond mèis dòp ch'a l'ero surtì dal pais d'Egit. ²Ant ël desert, tuta la gent d'Israel a l'é lamentasse contra Mosè e Aron. ³J'Israelita a l'han dije: "Ah, s'i fusso pro mòrt për man dël Signor ant ël pais d'Egit, quand ch'i j'ero setà dë 'dnans a 'd marmite pien-e 'd carn, cora ch'i mangiavo 'd pan fin-a ch'i në vorìo! Vojàutri i l'eve portane fòra ant ësto desert për fé mach meuire 'd fam tut cost ëstrop grand ëd gent!".

⁴Anlora 'l Signor a l'ha dit a Mosè: "I son an camin për vojàutri ëd fé pieuve 'd pan dal cel^[2], e la gent a seurtirà e a n'archeujerà lòn ch'a l’é pro, di për di, për podej-je buté a la preuva. Daran-ne da ment a mie Lej për conformëssje? ⁵Ant ël sest di, a pronteran lòn ch'a l'han portà e as troverà ch'a sarà 'l dobi 'd lòn ch'a l'avìo cheujì j'àutri di.

⁶Mosè e Aron a l'han dit a tùit j'Israelita: "A la sèira iv rendreve cont ch'a l'é stàit ël Signor a porteve fòra dal pais d'Egit, ⁷e a la matìn i vëddreve la glòria ‘d Nosgnor, përché chiel a l'ha scotà vòstre plente contra 'd chiel. Për lòn ch'an rësguarda, nojàutri, còs i somne përch' iv lamente contra 'd noi?". ⁸Mosè a l'ha dit: "I lo savreve quand che Nosgnor av darà 'd carn da mangé a la sèira e 'd pan a la matin për sodisfeve, përchè Nosgnor a l'ha scotà le plente ch'i l'eve fàit contra 'd chiel. Për lòn ch'as rësguarda nojàutri, còsa somne? Vòstre lamente a son pa contra 'd nojàutri, ma contra Nosgnor".

⁹Anlora Mosè a l'ha dit a Aron: "Dì a tuta ël pòpol ëd j'Israelita: 'Vnì dë 'dnans a Nosgnor, përché chiel a l'ha scotà vòstre plente'".

¹⁰Ora a l'é rivà che antramentre Aron a parlava a tut ël pòpol ëd j'Israelita e lor a vardavo anvers al desert, la glòria ‘d Nosgnor a l'é manifestasse 'nt la nìvola, ¹¹e Nosgnor a l'ha parlà a Mosè e a l'ha dije: ¹²"I l'hai scotà le plente dj'Israelita. Dije: 'A la sèira i mangereve 'd carn e a la matin i pasiereve la fam con ëd pan. Parèj iv rendreve cont ch'i son Mi, Nosgnor, vòstr Dé'".

¹³A la sèira a son ëvnuie ‘d quaje e a l'han quatà 'l camp, e a la matin un seul ëd rosà a l'era tut d'antorn al camp. ¹⁴ Quand ch'a l'é svaporà ël seul ëd rosà, là 'nt la surfassa dël desert a-i era na sostansa fin-a e sbriàbil, fin-a coma na geilà bianca an sla tèra.

¹⁵Cand che j'Israelita a l'han vëddula a l'han dit l'un con l'àutr: "Còs é-lo lolì?"^[3], dàit ch'a savìo nen còsa ch'a l'era. E Mosè a l'ha dije: "Col-lì a l'é 'l pan ch' ël Signor a l'ha dave da mangé^[4]".

¹⁶"Sossì a l'é lòn che Nosgnor a l'ha comandà: "Minca na person-a a në deuv cheuje tant ch'a l’é pro për chiel da mangé, la mzura d'un òmer për person-a, conforma 'l nùmer ëd vòstra gent. Ognidun a në deuv cheuje për tuti coj ch'a vivo an sòa tenda".

¹⁷J'Israelita ha l'han fàit parèj, e a l'han cheuì-ne, chi da pì, chi da meno. ¹⁸Cand ch'a l'han ëmzurà con n'òmer, chi ch'a n'avìa da pì a në restava pì gnente, e chi ch'a l'avìa da meno a në mancava pa. Ognidun a l'ha cheujì lòn ch'a në podìa mangé^[5]. ¹⁹Mosè a l'ha dije: "Che gnun a në lassa vansé fin-a a la matin". ²⁰Lor, nopà, a l'han nen ëscotà Mosè. cheidun ëd lor a l'ha conservane na part fin-a a la matin e a l'ha peui trovalo pien ëd verm e ch'a spussava. Mosè për lòn a l'é 'nrabiasse contra 'd lor.

²¹Anlora a l'han cheuì-ne minca matin, ognidun conforma lòn ch'a në podìa mangé e quand che 'l sol a l'era pì càud a slinguava. ²²E 'l sest di a l'han cheuì-ne 'l dobi, doi òmer për përson-a, e tùit ij cap ëd la comunità a son ëvnùit a contèilo a Mosè.

²³Chiel a l'ha dije: "Sossì a l'é lòn che Nosgnor a l'ha dit: 'Doman a l'é 'l temp che minca travaj a l’ha da chité, un Saba consacrà^[6] a Nosgnor^[7]. Tut lòn ch'i veule cheuse, cheuslo ancheuj; tut lòn ch'i veule beuje, beujlo ancheuj; tut lòn ch'a vansa, butelo da part për vojàutri e goernelo fin-a a la matin". ²⁴Anlora a l'han butalo da part fin-a a la matin, pròpi coma che Mosè a l'avìa comandà, e a spussava nen e a l'avìa nen dij verm. ²⁵Mosè a l'ha dit: "Mangelo d'ancheuj, përchè ancheuj për Nosgnor a l'é 'n Saba. Ancheuj i lo trovëreve nen ant ij camp. ²⁶I lo cheuiereve për ses dì, ma ant ël setim di, ël Saba, a-i në sarà pa". ²⁷Ant ël dì ch'a fa set, cheidun a l'é andàit a serchelo, ma a l'ha nen trovane.

²⁸Anlora 'l Signor a l'ha dit a Mosè: "Për vàire temp ancora i arfudreve-ne dë scoté ij mè comandament e mie disposission? ²⁹Vardé, a l'é përchè Nosgnor a l'ha dave 'l Saba che chiel av dà da mangé për doi dì ant sest di. Che ciaschëdun ëd voi a resta anté ch'a l'é; che gnun a vada via da sò leugh ant setim di". ³⁰Anlora ant ël setim di, ël pòpol a l'ha arposà.

³¹La cà d'Israel a l'ha dàit a costa sostansa 'l nòm ëd mana. A l'era tanme lë smens ëd colànder, a l'era bianca e a savìa coma 'n bëscheuit a l'amel^[8]. ³²Mosè a l'ha dit: "Sossì a l'é lòn che Nosgnor a l'ha comandà: 'Che n'òmer a sìa ampinì 'd mana, butelo dë 'dnans a Nosgnor ch' a sìa goernà për ij vòstri dissendent, parèj ch'a peusso vëdde lòn ch'i l'hai dàve da mangé ant ël desert quand che' i l'hai fave seurte dal pais d'Egit'.

³³Mosè a l'ha dit a Aron: "Pija 'n vas, ampiniss-lo con n'òmer ëd mana^[9] e peuj butlo dë 'dnans a Nosgnor për mostrelo a le generassion ch'a vniran". ³⁵ Giusta coma Nosgnor a l'avìa comandà a Mosè, Aron a l'ha butalo dë 'dnans a la Testimoniansa^[10] për essie goernà.

³⁵Ora j'Israelita a l'han mangià 'd mana për quarant' agn fin-a tant ch'a son rivà ant un pais abità; a l'han mangià 'd mana fin-a ch'a son rivà ai confin ëd la tèra 'd Canan^[11]. ³⁶N'òmer a l'é 'n décim ëd n'éfa^[12].

Nòte

1. Let. "Tùit ij fieuj d'Israel".
2. Cfr. Gioann 6:31.
3. La paròla "mana" an arferiment a costa sostansa a ven dal son dle paròle originaj 'd "Còs é-lo sossì?" [מָן הוּא כִּי לאֹ יָדְעוּ מַה־הוּא (man hu’ ki lo’ yadÿ’u mah hu’).]
4. Cfr. 1 Corint 10:3.
5. Cfr. 2 Corint 8:15.
6. O "sant".
7. Cfr. Surtìa 20:8-11.
8. Cfr. Numer 11:7-8.
9. Cfr. Ebréo 9:4.
10. L'Èrca dël Pat, ant ël Tabernacol.
11. Cfr. Giosué 5:12.
12. Òmer e éfa a son ëd mzure 'd contenensa ch'i savoma nen bin vàrie lòn ch'a l'ero.