La Bibia piemontèisa/Testament Vej/Gioel/Gioel 3

←Gioel 2

La Bibia piemontèisa Gioel

Amos 1→

La Bibia piemontèisa - Gioel 3

Gioel

3

Ël progèt ëd Nosgnor ëd giudiché le nassion

¹Përchè an coj di-là, an col temp-là, cand ch' i stabilirai torna Giuda e Gerusalem, ²Mi i butrai ansema le gent, i-j farai calé ant la comba 'd Giosafat: ambelelà mi i 'ntrerai an giudissi con lor për motiv d'Israel, mè pòpol e mia ardità, che lor a l'han ësbardlà an tra le nassion e a l'han fàit le part ëd mè pais. ³Lor a l'han tirà le sòrt për mia gent, a l'han cambià na masnà con ëd bagasse, a l'han vendù le fije për ëd vin e a l'han beivù!

⁴E dcò vojàutri, Tir e Sidon^[1], còs ch'i veule da mi? E tuti voi, contrà 'd Filistìa^[2], iv pijerev-ne d'arvangia contra 'd mi? Ma se vojàutri i veule vendicheve 'd mi, dun-a mi 'v farai tombé l'arvangia dzora 'd vòstre teste! ⁵Voi ch'i l'eve piàit mè argent e mè òr, ch'i l'eve portà ant ij vòst templi ij mè tesòr pressios, ⁶I l'eve vendù ai Grech ij fieuj 'd Giuda e 'd Gerusalem, për ëslontaneje da sò pais! ⁷E bin! Mi i-j ciamerai d'andova ch'i l'eve venduje, e i farai torna tombé vòstre assion dzora 'd vòstre teste! ⁸I vendrai vòstri fieuj e vòstre fije, i-j butrai an podèj dij fieuj 'd Giuda, che a-j vendran ai Sabej, a na gent lontan-a, përchè Nosgnor a l'ha parlà.

Ël giudissi ant la Valada 'd Giosafat

⁹Publiché sòn an tra le gent: Parié la guèra! Ciamé ij vajant! Ch'a ven-o, ch'a monto tùit j'òm ëd guèra! ¹⁰Feve dë spà con vòstre sape, ëd lanse con vòstre faussìe, che 'dcò 'l pì débol a peussa dì: "Mi i son un guerié^[3]". ¹¹Sah! Vnì-sì tute voj, gent ëd j'anviron, e buteve tute ansema ambelelà! Nosgnor, fà vnì giù ij tò vajant! ¹²Che le nassion as dësgagio e che le gent a monto a la valada 'd Giosafat, përchè ambelelì i starai astà për giudiché tuti ij pòpoj d'antorn.

¹³Deje man a la faussìa: l'amson a l'é mur^[4]; vnì, sgnaché, përchè 'l tòrcc a l'é pien^[5]; e le tin-e a verso, da tanta gramissia ch'a-i è!

¹⁴Ël mond dël mond ant la Comba dla Decision! Perchè 'l Di 'd Nosgnor a l'é davzin ant la Valada dla Decision! ¹⁵Ël sol e la lun-a a vniran ëscur e le stèile a përdran sò splendrior. ¹⁶Nosgnor a breugia da Sion, a fà sente Soa vos da Gerusalem; ij cej e la tèra a tërmolo! Ma Nosgnor a sarà na sosta për soa gent, na fortëssa për j'Israelita^[6]!

La presensa dël Signor an Sion

¹⁷Antlora voi i savreve che mi i son Nosgnor, vòst Dé ch'a stà a Sion, miè mont sant! Gerusalem a sarà 'n leu sacrà; jë strangé a-i pass-ran pa pì! ¹⁸An col di-là, le montagne a stisseran ëd vin neuv, e 'l làit a scorerà për le colin-e; an tùjt ij torent ëd Giuda j'eve a scoreran. Na sorgiss a s-ciodrà da la Ca 'd Nosgnor e a bagnerà la Comba dle Gasìe. ¹⁹L'Egit a sarà na desolassion për motiv ëd le violense fàite ai fieuj ëd Giuda, për ël sangh nossent ëspantià për ij sò pais. ²⁰Ma Giuda a sarà abità për sèmper e Gerusalem për tute le generassion.²¹Mi i farai arvangia 'd sò sangh, i lo lass-rai pa sensa punission, e Nosgnor a l'avrà soa Ca an Sion.

Nòte

1. Cfr. Isaia 23:1-18; Esechiel 26:1-28:26; Amos 1:9-10; Sacarìa 9:1-4; Maté 11:21-22; Luca 10:13-14.
2. Cfr. Isaia 14:29-31; Geremia 47:1-7; Esechiel 25:16-17; Amos 1:6-8; Sofonìa 2:4-7; Sacarìa 9:5-7.
3. Cfr. Isaìa 2:4; Michea 4:3.
4. Cfr. Arvelassion 14:14-16.
5. Cfr. Arvelassion 14:19-20; 19:15.
6. Cfr. Amos 1:2.