La Bibia piemontèisa/Testament Neuv/Arvelassion/Arvelassion 14

←Arvelassion 13

La Bibia piemontèisa Arvelassion

Arvelassion 15→

Arvelassion ëd Gioann

La Bìbia piemontèisa - Arvelassion 14

14

L’Agnel e ij 144.000

¹Apress ëd lòn i l’hai vëddù l’Agnel ch’a stasìa drit an pé an sla montagna ‘d Sion, e ansem a chiel a-i era sentequarantequatmila përson-e ch’a l’avìo scrit an front ^[1]ël nòm dël Pare ‘d chiel. ²E i l’hai sentù na vos dal cel tanme 'l rabel ch’a fan j’onde dl’océan o tanme l’armor d’un gran tron. La vos ch’i l’hai sentù a smijava ‘l son ëd vàire arpista ch’a son-o ansema.

³A cantavo un càntich neuv dë 'dnans al tròno e ‘dnans ai quatr esse vivent e ai vintequatr ansian; gnun a podìa amprende col càntich-lì a ecession ëd coj sentequarantequatmila ch’a l’ero stàit riscatà da la tèra. ⁴Costi-sì a son coj ch’a son nen maciasse con ëd fomne: a son vèrgin. A son ëstàit riscatà d’ an tra j’òm tanme ‘d primissie për Nosgnor e për l’Agnel, e andasendje dapress a l’Agnel përtut ch’as na và. ⁵E a l’é pa trovasse ‘d busìe an soa boca ‘d lor^[2], përchè dë 'dnans al tròno ‘d Nosgnor a son sensa rimprocc.

Ij tre àngej

⁶Apress ëd lòn i l’hai vëddù n’àutr àngel ch’a volava motobin àut ant ël cél. A portava na bon-a neuva eterna ch’a l’avìa da nunsié a j’abitant ëd la tèra, a tute le nassion, tribù, lenghe e pòpoj. ⁷A disìa a àuta vos: “Veneré^[3] Nosgnor e deje glòria, përchè ch’a l’é rivà l’ora dël Giudissi. Adoré ‘l Creator dël cel e dla tèra, dël mar e dle sorgiss dl’eva”.

⁸A l’é vnuje dapress n’àutr àngel ch’a proclamava: “A l’é tombà! A l’é tombà la gran Babilònia, cola sità granda^[4], cola ch’a l’ha dàit da bèive ‘l vin e la passion ëd soa prostitussion”.

⁹Apress ëd coj-lì a l’é vnùje ‘n ters àngel ch’a disìa a àuta vos: “Chi ch’a l’avrà adorà la bestia e soa statua, e ch’a porta an sla man o an sla front soa marca, ¹⁰a l’avrà da bèive ‘l vin dl’ira ‘d Nosgnor^[5]. L’ira ‘d Nosgnor a l’é stàita vërsà fin-a al làver dël càles. A sarà tormentà con ëd feu e ‘d sorfo^[6] afoà a la presensa dj’àngej sant dl’Agnel. ¹¹Ël fum dij sò torment as ausserà ant ij sécoj dij sécoj^[7]. A trovran pa d’arpòs nì dì nì neuit coj ch’a l’han adorà la bestia e soa statua, e ch’a l’avran arseivù la marca dël nòm ëd chila”.

¹²Sossì a veul dì che ‘l pòpol sant ëd Nosgnor a l’ha da soporté con passiensa la përsecussion, feje ubidiensa ai sò comand e conservé la fede an Gesù!

¹³E i l’hai sentù na vos dal cél ch’a l’ha dime: “Scriv: A l'han ëd boneur coj che da ora anans a meuiro an comunion con ël Signor. Vera - a dis lë Spirit - coj-lì a l'han përdabon ëd boneur, përchè ch’a l’avran d’arpòs ai sò sfòrs, përchè soe euvre ‘d lor a j'andran dapress!”.

L’arcòlt ëd la tèra

¹⁴Peui i l’hai beicà e vëddù na nìvola bianca, e ansima dla nìvola a-i j'era astà cheidun ch’a smijava a ‘n fieul d’òm^[8]. An sla testa a l’avìa na coron-a d’òr e an man a l’avìa na faussìa bin molà.

¹⁵N’àutr àngel a l’é seurtì dal templi e a crijava a àuta vos a col ch’a l’era astà ‘nsima ‘d la nìvola: “Fà viré toa faussìa e taja, përchè ch’a l’é rivà l’ora ‘d mëssoné, dagià che la mësson ëd la tèra a l’é mura^[9]”. ¹⁶Antlora col ch’a l’era astà an sla nivola a l’ha fala viré an sla tèra, e la tèra antrega a l’é stàita mëssonà.

¹⁷Apress ëd lòn a l’é seurtije dal Templi an cel n’àutr àngel, e ‘dcò col-lì a l’avìa na faussìa bin molà. ¹⁸Anlora n’àutr àngel, ch’a l’avìa ‘l podèj ëd dëstruve con ël feu, a l’é seurtì da l’autar. A l’ha crijà a àuta vos a col ch’a l’avìa la faussìa bin molà: “Adess vira toa faussìa, e vendumia le rape dla vigna dla tèra, përchè soe uve a son mure!". ¹⁹E l’àngel a l’ha passà soa faussìa për la tèra e a l’ha vendumià la vigna dla tèra, e a l’ha ampinì ‘d rape la gran' tin-a dl’ira ‘d Nosgnor. ²⁰Le rape a son ëstaite carcà ant la tin-a fòra dla sità e a l’é seurtine ‘d sangh^[10] fin-a a le brile dij cavaj për na distansa ‘d mila e sessent ëstadi.

Nòte

1. Cfr. Esechiel 9:4; Arvelassion 7:3.
2. Cfr. Sofonia 3:13.
3. O “Abie tëmma”.
4. Cfr. Isaia 21:9; Geremìa 51:8; Arvelassion 18:2.
5. Cfr. Isaia 51:17.
6. Cfr. Génesi 19:24; Esechiel 38:22.
7. Cfr. Isaia 34:10.
8. Cfr. Daniel 7:13.
9. Cfr. Gioel 3:13.
10. Cfr. Isaia 63:3; Lamentassion 1:15; Arvelassion 19:15.