La Bibia piemontèisa/Testament Neuv/Arvelassion/Arvelassion 15

←Arvelassion 14

La Bibia piemontèisa Arvelassion

Arvelassion 16→

Arvelassion ëd Gioann

15

La Bìbia piemontèisa - Arvelassion 15

Le piaghe dariere. Càntich ëd trionf.

¹Peui i l’hai vëddù an cel n’àutr portent^[1], grand e amirabil: set àngej ch’a portavo le set piaghe ch’a son le dariere, përché con lor l’ira ‘d Nosgnor a riva a sò compiment.

²I l’hai ‘dcò vëddù lòn ch’a më smijava un mar ëd véder mës-cià con ëd feu. Tuti coj ch’a j’ero surtì vincitor da la bataja contra la bestia, soa statua e la cifra ‘d sò nòm, as na stasìo drit ëdzora 'd col mar e a l’avìo an man j’arpe che Nosgnor a l’avìa daje. ³A cantavo ‘l càntich ëd Mosè^[2], servitor ëd Nosgnor, e ‘l càntich dl’Agnel. A l’é sto-sì: “Nosgnor, Dé tut-potent! Grand e amirabij a son toe euvre. Rè dle nassion! Toe vie a son giuste e vere. ⁴Nosgnor! Chi é-lo ch’at tëmrà nen e ch’a darà pa glòria a tò Nom^[3]? Përchè ti sol it ses sant. Tute le nassion a vniran e at rendran l’adorassion^[4], përchè ti ‘t l’has arvelà toe giuste decision”.

⁵Anlora i l’hai beicà e vëddù ant ël cel ch’as dovertava ‘l Templi, ch’a l’é ‘l Tabërnàcol ëd la Testimoniansa^[5]. ⁶Ij set àngej ch’a portavo le set piaghe a në son seurtì. A l’ero vestì ‘d lin pur e candi con na s-cirpa d’òr d’antorn a lë stòmi.

⁷Un dij quatr esse vivent a l’ha dàit ai set àngej set cope d’òr pien-e dl’ira ‘d Nosgnor, col ch’a viv për ij sécoj dij sécoj. ⁸La glòria ‘d Nosgnor e soa potensa a l’han ampinì ‘l Templi 'd na nìvola ‘d fum^[6]. L’intrada dël Templi a sarìa stàita sbarà fin-a al compiment complèt ëd le set piaghe dij set àngej.

Nòte

1. O “segn”.
2. Cfr. Surtìa 15:1.
3. Cfr. Geremìa 10:7.
4. Cfr. Salm 86:9.
5. O “dl’Aleansa”, cfr. Surtìa 38:21.
6. Cfr. 1 Re 8:10-11; 2 Crònache 5:13-14; Isaìa 6:4.