La Bibia piemontèisa/Testament Vej/Daniel/Daniel 7

←Daniel 6

La Bibia piemontèisa Daniel

Daniel 8→

La Bìbia piemontèisa - Daniel 07

Daniel

7

Daniel a l’ha na vision ëd quat bestie ch’a seurto dal mar

¹Ël prim ann dël regn ëd Baldassar, rè ‘d Babilònia, Daniel, antant ch’a l’era cogià an sò let, a l’ha avù ‘n seugn: a son passaje për la ment ëd vision. Peui a l’ha butà për ëscrit la sostansa ‘d sò seugn. A l’ha scrit parèj: ²“Mi, Daniel, sta neuit ant la seugn i l’hai vëddù che ij quat vent dël cel a bufavo con furia an sël Mar Mediterani^[1]. ³Dal mar a surtìo quat bestie bin gròsse, diferente un-a da l’àutra^[2].

⁴La prima a jë smijava a un leon, e a l’avìa j’ale ‘d n’òia. Antant che mi i vardava, a l’han gavaje j’ale e a l’han aussala da tèra, fasendla sté an sij dòi pé coma s’a fussa n’òm, e a l’han daje n’anteligensa uman-a^[3].

⁵A l’é vnùje peui na sconda bestia ch’a smijava n’òrs; a l’avìo butala an pé da na banda, a l’avìa an mes ai dent tre còste. A l’han dije: “Alé, mangia e ampiniss-te ‘d carn”.

⁶A l’é vnuje peui, antant ch’i vardava, n'àutra bestia ch’a smijava ‘n liopard, con quatr ale da osel an sla schin-a. La bestia a l’avìa quatr teste, e a l’han daje l’autorità ‘d governé^[4].

⁷A l’é vnuje peui, antant ch’i vardava costa vision ëd neuit, na quarta bestia afrosa, da fé tëmma e fòrta ‘d manera strasordinaria. A l’avìa ‘d gran dent ëd fer. A mangiava e a sbrisava. Lòn ch’a vansava as lo butava sota ij pé e a lo sbërgnacava. A l’era pa l’istess dj’àutre bestie e a l’avìa des còrn^[5].

⁸Antant ch’i vardava, an mes a sti còrn a l’é surtije fòra n’àutr còrn pì cit, ch’a l’ha fàit ranché via tre dj’àutri còrn. Col neuv còrn a l’avìa dj’euj ch’a smijavo uman e na boca ch’a parlava con ansolensa^[6].

⁹Damentre ch’i vardava, a son ëstàit peui butà an pé dij tròno^[7]. N’òm vej^[8], carià d’agn a l’ha pijà sò pòst. Soa vestimenta a l’era bianca tanme la fiòca e ij sò cavèj parèj dla lan-a càndia^[9]. Sò tròno a smijava fàit ëd vampe ‘d feu e soe roe a l’ero coma ‘d feu ch’a branda. ¹⁰Na rivera ‘d feu a nassìa e surtìa da dnans ëd chiel. Ij sò servitor a l’ero mila milen-e^[10]. La cort^[11] a l’é setasse e a son ëstàit durbì ij lìber^[12].

¹¹I l’hai seguità a vardé për via dle paròle 'nsolente ch’ ël còrn a disìa, e i l’hai vëddù ch’a massavo la bestia e sò còrp dësblà a l’é stàit campà ant ël feu përchè ch’a brusèissa. ¹²A j’àutre bestie a l’han gavaje ‘l podèj, lassàndje ch’a vivèisso ancora, ma mach fin-a al temp ch’a l’era stàit fissà.

¹³Mi i j’era ancor ant la seugn cand ch’i l’hai s-ciairà an sle nivole dël cel un ch’a smijava a ‘n fieul d‘òm. A l’é rivà dë 'dnans al Vej carià d’agn e a l’é stàit presentà a chiel ¹⁴ch’a l’ha daje ‘l podèj, la glòria e ‘l regn. La gent ëd tùit ij pòpoj, nassion e lenghe a-j rendran omagi^[13]. Sò podèj a l’é për sèmper^[14], a finirà mai e sò regn a sarà mai pì dësblà^[15].

N’àngel a dà l’anterpretassion dël seugn a Daniel

¹⁵Mi, Daniel, i son sentime manché përchè le vision ch’a l’ero passame për la ment a l’avìo sburdime. ¹⁶Anlora i son avziname a un ch’a j’era lì present për ciameje s’a podèissa dem-ne dë s-ciairiment. A l’ha rëspondume dasend-me costa 'ntërpretassion:

¹⁷Le quatr bestie gròsse a veulo dì quat rè ch’a seurtiran da la tèra. ¹⁸Apress ëd lòn, ël pòpol sant dël Pì-Àut a arseivrà ‘l regn e a lo tnirà për sèmper^[16]. ¹⁹Peui i l’hai vorsù savèj la vrità an sla quarta bestia ch’a l’era bin diferenta da j’àutre e motobin afrosa, ch’a l’avìa ‘d dent ëd fer e le grinfe ‘d bronz, e ch’a mangiava e a sfrisava, e lòn ch’a vansava as lo butava sota ij pé e a lo pistava con le piòte. ²⁰I vorìa ‘dcò savèj la vrità an sij des còrn ch’a l’avìa fàit ranché vìa d’àutri tre còrn, e përchè col òm a l’avìa j’euj e na boca ch’a parlava con babìa e ch’a smijava pì gròss che j’àutri còrn. ²¹I l’avìa vëddù che col còrn a fasìa guèra al pòpol sant e a vagnava^[17], ²²fin-a ch’a l’é rivaje col òm vej carià d’agn ch’a l’ha salvà ‘l pòpol sant dël Pì-Àut^[18] e a l’é rivà ‘l temp che ‘l pòpol sant a l’ha pijà possess dël regn.

²³Chiel a l’ha donca dime: “La quarta bestia a veul dì che an sla tèra a-i sarà ‘n quart regn diferent da coj ëd prima. A divorerà tuta la tèra, a la scarpiserà e a la craserà. ²⁴Ij des còrn a veulo dì che da col regn a seurtiran des rè. N’àutr rè a seurtirà apress ëd lor, ma a sarà divèrs da j’àutri, ch’a sogetrà tre dj’àutri^[19]. ²⁵Chiel a dirà 'd minca sòrt d’ofèise contra ‘l Pì-Àut; a maltraterà sò pòpol sant e a sërcherà ‘d cangié le feste e la religion. Ël pòpol sant dël Pì-Àut a sarà butà an soe man për un temp, dòi temp e la metà d’un temp^[20]. ²⁶Apress ëd lòn ël tribunal a lo giudicherà e a-j gavrà ‘l podej, a sarà crasà e fàit fòra ‘d pianta. ²⁷Anlora ‘l regn, ël podej e la magnificensa ‘d tùit ij regn ch’a-i son sota ‘l cel a saran dàit al pòpol dj’àngej sant dël Pì-Àut^[21]. Sò regn a sarà etern, e tute j’autorità a lo serviran e a lo scotran^[22].

²⁸Përparèj a finiss l’esposission ëd la chestion. Mi, Daniel, i son ëstàit motobin ësburdì, mia facia a l’ha cangià ‘d color e i l’hai guernà tut sòn an mè cheur.

Nòte

1. O: “ël mar grand”.
2. Cfr. Arvelassion 13:1; 17:8.
3. O “un cheur d’òm”.
4. 7:4-6 cfr. Arvelassion 13:2.
5. Cfr. Arvelassion 12:3; 13:1.
6. Cfr. Arvelassion 13:5-6.
7. Cfr. Arvelassion 20:4.
8. O: “Bel Vej”.
9. Cfr. Arvelassion 1:14.
10. Cfr. Arvelassion 5:11.
11. O “ël tribunal”.
12. Cfr. Arvelassion 20:12.
13. Cfr. Arvelassion 11:15.
14. O: “etern”.
15. Cfr. Maté 24:30; 26:64; March 13:26; 14:62; Luca 21:27; Arvelassion 1:7,13; 14:14.
16. Cfr. Arvelassion 22:5.
17. Cfr. Arvelassion 13:7.
18. Cfr. Arvelassion 20:4.
19. Cfr. Arvelassion 17:12.
20. Për tre agn e mes. Cfr. Arvelassion 12:14; 13:5-6.
21. Cfr. Arvelassion 20:4.
22. Cfr. Arvelassion 22:5.