La Bibia piemontèisa/Testament Neuv/Arvelassion/Arvelassion 5

←Arvelassion 4

La Bibia piemontèisa Arvelassion

Arvelassion 6→

Arvelassion ëd Gioann

La Bìbia piemontèisa - Arvelassion 05

5

La dovertura dël ròtol ëd bërgamin-a

¹Peui i l'hai vëddù a man drita 'd col ch'a l'era setà ans sël tròno un ròtol ëd bërgamin-a scrivù për dë 'dnans e për darera^[1] e fërmà con set cacèt. ²E i l'hai vëddù n'àngel poderos ch'a sclamava con na gran vos: "Chi é-lo ch'a l'é degn ëd deurbe 'l lìber e dë s-ciapene ij cacèt? ³Ma gnun a podìa deurbe 'l liber e leslo, nì ant ël cel, nì ans la tèra, nì sòta la tèra, ⁴Anlora i l'hai 'caminà a pioré fòrt^[2] përchè ch'as trovava gnun ch'a fussa degn ëd deurbe 'l ròtol e 'd leslo. ⁵E un dj'ansian^[3] a l'ha dime: "Piora pa. Varda: ël leon dla tribù 'd Giuda^[4], l'ardité dël tròno 'd David^[5], a l'é stàit vitorios. A l'é chiel ch'a l'é degn dë s-ciapé ij set cacèt. ⁶Peui i l'hai vëddù n'Agnel ch'a smijava scanà^[6], ma che ora a stasìa 'n pé an tra 'l tròno e ij quatr esse viv e an tra ij vint-quatr ansian. Chiel a l'avìa set còrn e set euj^[7], ch'a 'rpresento ij set ëspirit ëd Nosgnor mandà për tuta la tèra^[8]. ⁷Peui a l'é vnù e a l'ha pijà 'l lìber da la man drita ëd col ch'a l'era setà an sël tròno, ⁸e cand ch'a l'avìa pijà 'l ròtol, ij quatr esse viv e ij vintequatr ansian a son campasse a tèra^[9] dë'dnans a l'Agnel. Ognidun ëd lor a l'avìa n'arpa e 'd càles d'òr pien d'ancens, ch'a son le preghiere dël pòpol ëd Nosgnor^[10].

⁹A cantavo 'n càntich neuv^[11] ch'a disìa: "Ti 't ses degn d'arsèive ël lìber e dë s-ciapene ij cacèt, dagià ch'it ses stàit ëscanà e che tò sangh a l'ha riscatà për Nosgnor ëd gent da ògni tribù, lenga, pòpol, e nassion. ¹⁰It l'has faje vnì 'n regn e 'd sacerdòt^[12] për nòst Dé. A regneran an sla tèra". ¹¹Peui i l'hai torna vardà e i l'hai sentù la vos ëd milen-e e 'd milion d'àngej ansema^[13] a le creature vive e a j'ansian, ch'a stasìo dantorn al tròno. ¹²A l'era 'n còro poderos ch'a cantava: "A l'é degn l'Agnel ch'a l'é stàit ëscanà, d'arsèive la potensa, le richësse, la sapiensa, la fòrsa, l'onor, la glòria, e la benedission!". ¹³Peui i l'hai sentù la vos ëd tuti j’esse ch'a stan an cel, an sla tèra e sòta la tèra. A cantavo: "Benedission, onor, glòria e potensa a van ëd drit a col ch'a l'é setà an sël tròno e a l'Agnel për ij sécoj dij sècoj!". ¹⁴E ij quat esse viv a disìo: "Amen!", e ij vint-quatr ansian a son campasse con la facia për tèra e a l'han rendù l'adorassion a col ch'a viv për ij sécoj dij sécoj.

Nòte

1. Cfr. Esechiel 2:9-10; Isaia 29:11.
2. O "dësconsolà".
3. O "un dij vintequatr ansiàn".
4. Cfr. Genesi 49:9.
5. Cfr. Isaia 11:1,10.
6. Cfr. Isaia 53:7.
7. Cfr. Sacharìa 4:10.
8. O "ch'a son mandà an minca part ëd la tèra".
9. O "a son anginojasse", "a son butasse an ginojon".
10. O "dij sant". Cfr. Salm 141:2.
11. Cfr. Salm 33:3; 98:1; Isaia 42:10.
12. Cfr. Surtìa 19:6; Arvelassion 1:6.
13. Cfr. Daniel 7:10.