La Bibia piemontèisa/Testament Vej/Esechiel/Esechiel 2

←Esechiel 1

La Bibia piemontèisa Esechiel

Esechiel 3→

La Bìbia piemontèisa - Esechiel 02

Esechiel

2

Mission profètica d’Esechiel

¹Cola vos a l'ha dime: "Àuss-te, fieul d'òm ch'i veuj parlete!". ²Antant ch'am parlava, lë Spirit a l'é intrà an mi, e a l'ha fame aussé an pé, e mi i i l'hai antendù col ch' am parlava. ³Am disìa: "Mi i mando ti, fieul d'òm, a j'Israelita, gent arvirosa che a l'é arvirasse contra 'd mi; tant lor che ij sò antich, a son ëstame pa fidej fin-a 'l di d'ancheuj midem. ⁴Nen mach lòn, ma mi 't mando a 'd fieuj teston^[1] e dur ëd cheur, përchè it jë dise: 'Përparèj a dis ël Signor Dé!'. ⁵Che lor a të scoto o ch'as arfudo dë scotete (përchè a son dij rivoltos^[2]) lor a savran ch'a-i é 'n profeta an mes ëd lor. ⁶Ma ti, fieul ëd l'òm, àbie nen tëmma 'd lor nì 'd lòn ch'a diso, bele se soe mnasse a të stan d'antorn tanme d'ortije e 'd rovaj e lor at son tanme dë scorpion ch'a mòrdo. Ch'at faso nen tëmma ij sò sguard gram e scur^[3], përchè a son d'arviros. ⁷Ti 't l'has da porté mie paròle sia ch' a të scoto o ch' a të scoto nen. Contut, lor at ëscotran pa përchè a son un pòpol arviros.

⁸Ti, fieul ëd l'òm, nopà, scota lòn ch'i l'hai da dite, sie nen arviros tanme cola gent-là. Doverta la boca e mangia lòn ch'it dago". ⁹Anlora i l'hai aussà j'euj e i l'hai vëddù na man sporzua anvers ëd mi ch'a tnìsia 'n lìber an forma 'd ròtol. ¹⁰Peui a l'ha dësrotolalo e a l'avìa 'd paròle scrivùe da na banda e da l'àutra. A l'ero 'd paròle 'd lamentassion, ëd gem e 'd pior^[4].

Nòte

1. O let. da 'l front sfrontà".
2. O "na ca arvirosa".
3. O "soe brute ghigne".
4. 2:9-10 cfr. Arvelassion 5:1.