La Bibia piemontèisa/Testament Vej/Sacaria/Sacaria 4

←Sacarìa 3

La Bibia piemontèisa Sacarìa

Sacarìa 5→

La Bìbia pieontèisa - Sacarìa 4

Sacarìa

4

Quinta vision: ël candlé

¹L’àngel ch’am parlava a l’é vnùit a dësvijeme coma ch’as dësvija un da la seugn. ²A l’ha ciamame: “Còsa ch’it vëdde?”. I l’hai rësponduje: “I vëddo ‘n candlé^[1] tut d’òr. Dzora a l’ha ‘n bassin con set luserne e set bech për le luserne. ³Davzin al candlé a-i son dòi uliv^[2], un a soa drita e un a soa mancin-a”. ⁴Anlora i l’hai ciamaje a l’àngel ch’am parlava: “Lòn ch’a veul dì sòn, car ël mè signor?”. ⁵Chiel a l’ha rëspondume: “Capisses-to nen soa significassion?”, e mi: “Nò, car ël mè signor”. ⁶Antlora l’àngel a l’ha dime: “Costa-sì a l’é la paròla ‘d Nosgnor a Zorobabel^[3]: ‘Nì con la potensa, nì con la fòrsa, ma con mè Spirit’, i lo diso Mi, ël Signor ëd l’Univers”. ⁷Lòn ch’a l’é sta montagna ‘d ruin-e? Për motiv ëd Zorobabel ti të vniras a esse na pian-a! Chiel a troverà torna la prima pera dël templi, e tùit a sclameran: “A l’é na grassia! A l’é na grassia!”.

⁸Nosgnor a l’ha adressame soa paròla. A l’ha dime: ⁹“Le man ëd Zorobabel a han posà le fondassion dë sto templi e soe man a lo porteran a compiment. Cand tut sossì a sarà compì, i arconosreve che ‘l Signor ëd l’Univers a l’ha mandame da vojàutri. ¹⁰Chi ch’as n'ancalerà ‘d dëspresié ‘l di dle còse cite? As provrà gòj ant ël vëdde ‘l fil a piomb ant le man ëd Zorobabel. Le set luserne a rapresento j’euj ëd Nosgnor^[4] ch’a vardo dzora ‘d tuta la tèra”.

¹¹Peui i l’hai ciamaje a l’àngel: “Còsa ch’a veulo dì coj dòi oliv^[5], un a la drita e l’àutr a la snìstra dël candlé? ¹²E coj gich d’uliv ch’a stisso òr drinta ij dòi cit canaj d’òr?”. ¹³A l’ha rëspondume: “Capisses-to nen còsa significo tute ste còse?”. E mi: “Nò, car ël mè signor”. ¹⁴Antlora a l’ha dime: “Coj-lì a son ij dòi ch’a son ëstàit consacrà^[6] con l’euli e ch’a son al sërvissi dël sovran ëd tuta la tèra”.

Nòte

1. Ël candlé ebràich, ch’as ciama “menorà”.
2. Cfr. Arvelassion 11:4.
3. Cfr. Esdra 5:2.
4. Cfr. Arvelassion 5:6.
5. Cfr. Arvelassion 11:4.
6. Giosuè, ël sacerdòt, e Zorobabel, ël governator.