La Bibia piemontèisa/Testament Vej/Salm/Salm 33

←Salm 32

La Bibia piemontèisa Ij Salm

Salm 34→

Ij Salm

La Bìbia piemontèisa - Salm 033

33. Vojàutri, ij giust, aclamé ‘l Signor

An cost inn ël Salmista a làuda Nosgnor coma ‘l Creator ch’a l’é sovran e a governa ‘l mond. Chiel a l'ha soen dij sò e a-j véndica.

¹Vojàutri, ij giust, aclamé ‘l Signor; vojàutri j’onest, smónje vòstre làude, ch’a-i na j’è sèmpre ‘n bon motiv^[1]. ²Selebré ‘l Signor con la cetra! Canté a chiel compagnà da n’arpa! ³Arnoveje^[2] ij vòstri càntich! Alveje vòstre làude con ëd mùsica sonà da bin! ⁴Përchè la paròla ‘d Nosgnor a l’é sicura^[3], chiel a resta fedel an tut lòn ch’a fà. ⁵Nosgnor a ten an àuta considerassion l’equità e la giustissia; la fidelità ‘d Nosgnor as estend për tuta la tera. ⁶A l’é con soa paròla che Nosgnor a l’ha fàit ij cej, a l’é con sò spirit^[4] ch’a l’ha creà le costellassion. ⁷Coma s’a fussa ant un un botal chiel a-i mugia l’eva dël mar; chiel a buta j’océan ant ij serbator. ⁸Che tuta la tèra a-j renda l’adorassion a Nosgnor; ch’a l’abio timor ëd chiel j’abitant dël mond antregh! ⁹A l’é stàit për ël mojen ëd soa paròla che tut a l’é anandiasse a esiste; a un dij sò órdin tut a l’é butasse an moviment.

¹⁰Nosgnor a dësbela ij pian ëd le nassion e anienta ij progèt dij pòpoj, ¹¹ma ij pian ëd Nosgnor a ten-o bon; chiel a manten për sèmper ij propòsit ëd sò cheur. ¹²Che ‘d boneur ch’a l’ha cola nassion ch’a l’ha Nosgnor coma sò Dé, col pòpol che chiel a l’ha sernù coma soa ardità!

¹³Nosgnor a bèica dal cél, a osserva un-a për un-a tute le creature uman-e. ¹⁴Dal leugh anté ch’a sta, chiel a ved bin coj ch’a pòpolo la tèra. ¹⁵A l’é chiel ch’a l’ha formà ‘l cheur uman e ch’a guarda da bin tute j’assion ëd lor.

¹⁶A l’é pa na grand’armeja ch’a peul salvé ‘l rè, nì na gran fòrsa lòn ch’a peul salvé ‘l guerié vajant. ¹⁷A l’é pa ‘l nùmer dij cavaj ch’a peul fé vagnene na vitòria; malgré soa gran fòrsa, a peul nen salvé.

¹⁸J’euj ëd Nosgnor a vijo an sù coj ch’a-j son fedej, coj ch’a spero ant l’amor ch’a l’ha për lor. ¹⁰A-j riscata da la mòrt e a-j sostniss ant ël temp ëd la famin-a.

²⁰Nòstra ànima as arlegra ‘d Nosgnor: chiel a l’é nòst liberator e scu. ²¹Nòst cheur a ‘rgiojiss ëd chiel; sò nom sant an dà fiusa. ²²Nosgnor! Che tò amor an chita mai: costa-sì a l'é la speransa ch’i butoma an ti.

Nòte

1. O “ch’a conven”.
2. O “canteje na canson neuva”. A l’é nen tant ëd canteje ‘d canson ch’a sio neuve, ma “a-i é sèmper d’ocasion neuve për canté a chiel”.
3. O “giusta”.
4. O “con ël fià ‘d soa boca”.