La Bibia piemontèisa/Testament Vej/Salm/Salm 34
Ij Salm
modifiché34. I benedirai Nosgnor an tùit ij temp
modifiché- Ant ës càntich d'arconossensa, ël Salmista a làuda Nosgnor për avèjlo liberà dai sò sagrin. A ancoragia d'àutri a la fidelità a Dé, a-j dis coma fé piasì a Dé, e a-j conferma che Nosgnor a goerna ij sò servent.
1Scrivù da David, cand che chiel a l'ha fàit visa d'esse fòl dë 'dnans a Abimelech[1], che peui 'l rè a l'ha falo mandé via. I benedirai Nosgnor an tùit ij temp; soe làude a saran sèmper an mia boca. 2Mè vantament a sarà mach an Nosgnor; ch'as faso coragi j'ùmij cand ch'a lo sento. 3Vnì, contoma a tuti dla grandëssa 'd Nosgnor; magnificoma tùit ansema sò Nòm!
4I l'hai pregà Nosgnor, e chiel a l'ha scotame; a l'ha liberame da tute le paure ch'i l'avìa. 5Tuti coj ch'a lo sërco për esse giutà a 'rtorneran con la facia anrajanta 'd gòj; gnun-a ombra 'd vërgògna a rendrà scura sò visagi.
6Cand ch'i j'era dësperà, i l'hai pregà, e Nosgnor a l'ha scotame. Chiel a l'ha salvame da tùit ij mè sagrin. 7Përché l'àngel ëd Nosgnor a l'é na vardia: a stà dantorn e a guerna tùit coj ch'a l'han timor ëd chiel.
8Tasté e vëdreve coma ch' a l'é bon Nosgnor[2]. Che 'd boneur a l'han coj ch'as buto a la sosta 'd chiel. 9Avèj timor ëd chiel, vojàutri, pòpol sant, përchè a coj ch'a lo rispeto a-j mancrà gnente. 10Fin-a ij leoncin chèich vòta a patisso la fam, ma coj ch'a l'han fiusa an Nosgnor a manco 'd nen ch'a sia bon.
11Vnì, vojàutri, ij mè fieuj, scoté bin: iv mostrerai lòn ch'a l'é avèj timor ëd Dé. 12A i'é-lo cheidun ch'a veul vive na vita longa e fosonanta? 13Anlora ch'a traten-a soa lenga dal dì 'd còse grame e ij sò làver da dì 'd busiardarìe! 14Vira la schin-a al mal e fà 'l bin. Sërca lòn ch'a l'é për la pas e date da fé për mantnila.
15J'euj 'd Nosgnor a goerno coj ch'a fan lòn ch'a l'é giust; soe orije a stan atente ai sò crij d'agiùt. 16Ma Nosgnor as vira contra ij malfasent; chiel a scancelerà soa memòria da la facia dla tèra[3].
17Nosgnor a scota sò pòpol cand che lor a-j ciamo d'agiut. A-j tira fòra da tùit ij sò maleur. 18Nosgnor a l'é davzin a coj ch'a l'han ël cheur brisà; a libera coj ch'a l'han lë spìrit crasà.
19A son tanti ij sagrin ëd n'òm giust, ma Nosgnor sèmper a-j ven ancontra con sò agiùt. 20Përchè Nosgnor a goerna j'òss dël giust: gnanca un ëd lor a sarà s-ciapà[4]!
21Ëd sicur al malfasent la dësgrassia a-j tomberà a còl e coj ch'a l'han ël giust an ghignon a saran castigà. 22Ma Nosgnor a riscata coj ch'a lo servo. Gnun ch'as buta a la sosta 'd chiel a sarà condanà.
Nòte
modifiché- ↑ Cfr. 1 Samuel 21:13-15
- ↑ Cfr. 1 Pero 2:3.
- ↑ 34:12-16 cfr. 1 Pietro 3:10-12.
- ↑ Cfr. Gioann 19:36.