La Bibia piemontèisa/Testament Vej/Daniel/Daniel 6

←Daniel 5

La Bibia piemontèisa Daniel

Daniel 7→

La Bìbia piemontèisa - Daniel 06

Daniel

6

Daniel ant la tampa dij leon

¹A jë smijava na bon-a idèja a Dario ‘d nominé sentevint sàtrap për aministré le provinse 'd sò regn. ²Dzora ‘d lor a sarijo staje tre supervisor. Daniel a l’era un ëd lor. Ij sàtrap a l’avìo ‘d rende cont dl’aministrassion ai tre supervisor, përché gnun tòrt a podèissa fesse al rè^[1]. ³Daniel as diferensiava an tra j’àut funsionari e ij sàtrap përchè a-i j'era an chiel në spirit strasordinari, tant che ‘l rè as proponìa ‘d butelo a cap dël regn tut antregh. ⁴A l’é për lòn che j’àutri doi àut funsionari e ij sàtrap a sërcavo un chèich motiv për butelo an discrédit e gaveje l’aministrassion dël regn, ma a lo trovavo pa, përchè Daniel a l’era dël tut dëgn ëd fiusa, e a lo podìo pa nen acusé ëd corussion o ‘d negligensa. ⁵Anlora costi òm a son disse: “I trovroma nen contra 'd Daniel gavà ch’a-i sia cheicòsa ch’a l’abia da fé con la lege 'd sò Dé”.

⁶Përparèj che costi fonsionari e sàtrap a son butasse d’acòrdi d’andé tùit ansema a trové ‘l rè për dije: “Che rè Dario a viva për sèmper! ⁷Tuti j’àut funsionari dël regn, ij prefèt, ij sàtrap, ij consijé e ij governator a son acordasse ‘d publiché un decret real ch’a buta an vigor ësta antërdission: ‘Da sì a tranta di, gnun a podrà adressé na qualsëssìa orassion a ‘n chèich dio o n’òm, gavà mach a ti, maestà; s’a lo fà a sarà campà ant la tampa dij leon’. ⁸Ore, donch, maestà, daje fòrsa ‘d lege a costa antërdission an sotsignàndla, ëd manera ch’a sia pì nen possibil ëd cambiela, conform a la lege dij Medi e dij Persian ch’as peul nen revochesse”. ⁹An rason ëd sòn, rè Dario a l’ha sotsignà l’at d’antërdission.

¹⁰Savù che ‘l decret a l’era stàit sotsignà, Daniel a l’é montà a soa ca. Le fnestre dla stansia àuta a l’ero orientà vers Gerusalem, e ambelelà tre vire al di chiel as anginojava, pregand e laudand sò Dé, coma ch’a l’avìa sèmper fàit. ¹¹Coj òm, donca, ch’a l’avìo cissà ‘l decret, a son andàit an pressa tùit ansema a ca ‘d Daniel, e a l’han trovalo ch’a pregava e suplicava sò Dé. ¹²Anlora a son presentasse al rè e a l’han arciamaje a la ment sò decret. A l’han dije: “Maestà, avies-to pa fàit un comand che mincadun ch’a preghèissa a fà nen che divintà o òm, gavà ‘d ti, passà tranta di, ch’a fussa campà ant la tampa dij leon?”. Ël rè a l’ha rësponduje: “Vera, e conform a la lege dij Medi e dij Persian, ël decret as peul pa revochesse”. ¹³Anlora lor a l’han dije al rè: “Daniel, un dij deportà ‘d Giuda, a rëspeta nì ti nì l’antërdission. Tre vire al di a fà soa orassion”. ¹⁴Cand che ‘l re a l’ha sentù lolì, a l’é motobin antristisse e a l’ha pensà bin ëd salvé Daniel; fin-a che ‘l sol a calèissa a l’ha pensa a la manera ‘d feje scampé sò castigh. ¹⁵Ma coj òm a son presentasse a dije: “A venta ch’it sapie, maestà, che gnun-a lege dij Medi e dij Persian, e gnun decret portà dal rè, a peul esse revocà”. ¹⁶Anlora ‘l rè a l’ha comandà ‘d convoché Daniel përch’ a fussa campà ant la tampa dij leon. Ël rè a l’ha dije: “Ël Dé, ch’it jë rende l’adorassion minca di, a sarà chiel ch’at salverà”.

¹⁷Apress ëd lòn a l’é stàita portà na pera ch’a l’han butà dë 'dnans a l’intrada dël fossal, e ‘l rè a l’ha marcala con sò cacèt e con coj dij sò nòbij; ëd manera che gnun a podèissa fé cheicòsa an favor ëd Daniel. ¹⁸Ël rè a l’é tornass-ne an soe stansie, a l’ha vijà tuta la neuit, a l’é fasse pa nen porté soe concubin-e e a podìa pa deurme.

¹⁹A primalba, ël rè a l’é alvasse e a l’é andass-ne an pressa a la tampa dij leon. ²⁰Avzinandse al fossal, a l’ha crijaje a Daniel con vos angossà: “Daniel, servidor dël Dé ch’a viv, ël Dé ch’it jë rende l’adorassion minca dì, é-lo che chiel a l’ha podù salvete dai leon?”. ²¹Daniel a l’ha rësponduje al rè: “Ch’ël rè a viva për sèmper! ²²Mè Dé a l’ha mandà sò àngel a saré la boca dij leon, e lor a l’han pa fame dël mal. Chiel a sa ch’i son nossent e che dë 'dnans a ti, maestà, i l’hai gnun-a colpa”.

²³Ëd lòn ël rè a l’é motobin arlegrass-ne e a l’ha comandà ‘d fé seurte Daniel da la tampa. A l’han trovalo sensa gnanca na ferija, përchè ch’a l’avìa avù fiusa an sò Dé. ²⁴Ël rè a l’ha peui comandà ch’a-j portèisso coj òm ch’a l’avìo acusà Daniel e ch’a fùisso campà lor ant la tampa dij leon con ij sò fieuj ‘d lor e soe fomne. Ancor a l’avìo nen tocà ‘l fond dla tampa, che ij leon a son campass-je a còl e a l’han ësfrisaje j’òss.

²⁵Anlora rè Dario a l’ha scrivù a tute le gent, pòpoj, nassion e lenghe ch’a j’ero an sla tèra: “Pas bondosa dzora ‘d vojàutri! ²⁶Mi, an përson-a, i comando che an tùit ij domini ëd mè regn tùit a rispeto e a l’abio tëmma dël Dé ‘d Daniel. Chiel a l’é ‘n Dé ch’a viv, ël Dé etern. Sò regn a sarà mai dësblà, sò amperi a l’avrà mai fin. ²⁷Chiel a salva e a lìbera. A fà ‘d portent e ‘d maravije an cel e an sla tèra, e a l’ha salvà Daniel dal podej dij leon”.

²⁸Përparèj che Daniel a l’ha prosperà sota ‘l regn ëd rè Dario e sota ‘l regn ëd Ciro ‘l persian.

Nòte

1. O “përché j’anteresse dël rè a fusso assicurà”.