La Bibia piemontèisa/Testament Vej/Gioel/Gioel 2

←Gioel 1

La Bibia piemontèisa Gioel

Gioel 3→

Gioel

La Bìbia piemontèisa - Gioel 2

2

La devastassion causà da j'aliòstre

¹Soné la tromba a Sion, deje l'alarma dzora 'd mè Mont Sant! Che tuti j'abitant dël pais a tërmolo, përché 'l Di 'd Nosgnor a l'é press ch'a riva, a l'é davzin! ²Giornà 'd top e 'd nìvole sombre, di 'd caluso e dë scur! Coma l'aurora, na gent a së spàntia an sle montagne, un pòpol grand e fòrt, coma ch'a l'é mai staje, coma ch'a-i në sarà pa pì, për j'agn ch'a ven-o, ëd generassion an generassion.

³Dë 'dnans ëd chiel ël feu a dvora, darera 'd chiel la fiama a consuma. Anans che chiel a rivèissa ël pais a l'era parèj d'un giardin d'Eden, dòp ch'a l'é passaje a l'é vnùit un desert desolà: a-i resta nen. ⁴Sò visagi a l'é col dij cavaj; lor a së slanso parèj 'd cavaj da corsa. ⁵A jë smijarìa a un rabel ëd chèr che a arsàuto dzora dle montagne, lë s-cioplì dla fiama anvlupanta ch'a brusa la stobia, parèj 'd na gent fòrta rangià për la bataja^[1].

⁶A vëdde lolì, tute le gent a tërmolo, tute le facie a ven-o spàlie. ⁷Lor a së slanso coma 'd vajant, a ràmpio le muraje coma 'd guerié, mincadun as në va drit për soa stra, sensa scarté da sò camin. ⁸A-i é gnun ch'a séguita sò avzin, tùit a van për sò vieul: lor a passo an mes a le flecie sensa chité ij rangh.⁹A-j sàuto a còl a la sità, as campo an sle muraje, a monto ansima a le ca, a intro për le fnestre parèj 'd làder. ¹⁰Dë 'dnans ëd chiel la tèra a frisson-a, ij cej a tramblo! Ël sol e la lun-a a ven-o scur, le stèile a perdo sò splendrior^[2]! ¹¹Nosgnor a fà sente soa vos dë 'dnans a soe armeje! Përchè ij sò batajon a son sensa nùmer, përchè col ch'a pràtica soa paròla a l'é potent, përchè 'l di dël Signor a l'é grand, terìbil da nen disse: chi a podrà sustnilo^[3]?

¹²Ma adess - a dis ël Nosgnor - torné a mi con tut vòst cheur, con ël digiun, le plente, e ij crij ëd deul. ¹³S-ciancheve 'l cheur, e pa vòstre veste, torné a Nosgnor, vòst Dé, përchè chiel a l'é tenerëssa e misericòrdia, tard a la flin-a e rich an grassia, chiel a ringreta 'l mal.

Apel al pentiment

¹⁴Chi sà-lo se chiel a cambièissa? S'as pasièissa? S'as lassèissa darera na benedission? Oferta e libassion për Nosgnor vòst Dé. ¹⁵Soné la tromba a Sion! Proclamé 'n digiun! Publiché na solenità! ¹⁶Buté ansema la gent, convoché la ciambreja, assemblé j'ansian, buté ansema le masnà, ij cit ch'a pijo 'l làit da la pupa! Che lë spos a seurta da soa stansia e che la sposa a chita sò let! ¹⁷Ch'ij sacerdòt a pioro tra l'autar e 'l pòrtich, lor ij servidor ëd Nosgnor! Ch'a diso: "Misericòrdia, Nosgnor, për toa gent! Lassa pa toa ardità an podèj ëd l'onta, a le svergne dle nassion! Përchè a ventrìa dì tra ij pòpoj: "Andova ch'a l'é sò Dé 'd lor?".

La rispòsta dël Signor

¹⁸Che Nosgnor a peussa bugesse 'd gelosìa për sò pais, ch'a l'àbia compassion ëd soa gent! ¹⁹Nosgnor a l'ha rëspondù e a l'ha dije a sò pòpol: "Vardé che mi iv mando 'l gran, ël vin, l'euli fresch. Vojàutri i n'avreve pro. E mi i farai mai pì 'd voi l'onta dle nassion. ²⁰I slontanerai da vojàutri col ch'a ven da Tramontan-a, i lo posserai vers na tèra sùita e desolà, soa avanguardia vers ël mar ëd levant, soa retroguardia vers ël mar ëd ponent. E a monterà soa spussa, a fiairerà parèj 'd n'anfession, përchè chiel a l'ha fane 'd mal! ²¹Tèra, gnun-e tëmme, ma crija 'd gòj e argiojiss! përchè Nosgnor a l'ha fàit ëd ròbe gròsse!

²²Tëmme pa, bestiòte dij camp! Le pasture dle vàude a son tornà vërde, përchè le piante a dan sò frut, la vis e 'l fié a pòrto soe fòrse. ²³Giubilé, fieuj 'd Sion, argiojìve an Nosgnor vost Dé! Perché a l'ha dave la pieuva d'otogn e cola 'd la prima parèj 'd sempe. ²⁴J'èire a s'ampiniran ëd gran, le tin-e a vërseran ëd vin e j'óiro d'euli fresch. ²⁵Mi 'v compenserai dj'anade che l'aliòstra, la babòja, ël gril e la gata a l'han dvorà, col' armèja gròssa che mi i l'avìa mandave contra. ²⁶Vojàutri i mangereve pro, bondos, e i laudereve 'l Nòm ëd Nosgnor vòst Dé, che për voi a l'avrà compì 'd maravije. Mia gent a conosrà pì nen l'onta për sèmper. ²⁷E vojàutri parèj i savreve che mi i son an mes d'Israel, che i son Nosgnor, vòst Dé, e ch'a-i në-i é pa d'àutri: pa pì onta për mia gent për sèmper!

La spantiora dlë Spirit

²⁸Dòp ëd sòn^[4] i spantierai mè Spirit ëdzora tute sòrt ëd gent^[5]. Ij vòstri fieuj e le vòstre fije a profetiseran, i vòstri grand a l'avran ëd seugn, ij vòstri giovo 'd vision. ²⁹Fin-a jë s-ciav, òm e fomne, an col di-là, a l'avran mè Spirit. ³⁰I farai 'd segn ant ël cel e an sla tèra, sangh, feu e colòne 'd fum! ³¹Ël sol a vnirà scur, la lun-a as cangerà 'n sangh, prima ch'a-i riva 'l Di 'd Nosgnor, grand e terìbil^[6]! ³²Tuti coj ch'anvocheran ël Nòm ëd Nosgnor a saran salvà, përchè an sël mont Sion a-i saran ëd salvà, coma ch'a l'ha dit Nosgnor, e a Gerusalem a-i saran ij dzorvivù che Nosgnor a l'ha ciamà^[7].

Nòte

1. Cfr. Arvelassion 9:7-9.
2. Cfr. Arvelassion 8:12.
3. Cfr. Arvelassion 6:17.
4. Comansand da 2:28, la numerassion dij versèt fin-a a 3:21 ant nòstre version d'arferiment (NET Bible), a l'é nen l'istessa dla numerassion ëd la Biblia ebràica (BHS), con 2:28 NET = 3:1 HT, 2:29 NET = 3:2 HT, 2:30 NET = 3:3 HT, 2:31 NET = 3:4 HT, 2:32 NET = 3:5 HT, 3:1 NET = 4:1 HT, etc., fin-a 3:21 NET = 4:21 HT. A l'é parèj che Gioel and la Bìbia ebràica a l'ha quatr capitoj, ij 5 versèt ëd cap. 3 a son butà a la fin ëd nòstra version ëd la Bibia.
5. O: Lét. "tute le carn".
6. Cfr. Maté 24:29; March 13:24-25; Luca 21:25; Arvelassion 6:12-13.
7. Cfr. Roman 10:13.