La Bibia piemontèisa/Testament Neuv/March/March 8

←March 7

La Bibia piemontèisa Vangeli 'd March

March 9→

La Bìbia piemontèisa - March 08

March

8

Gesù a dà da mangé ai quatr mila

¹An coj di lì, sicoma a l’era torna rivà na sconzubia ‘d gent e ch'a l'avìo nen da mangé, Gesù a l'ha ciamà ij sò dissépoj e a l'ha dije: ²"I sento na granda compassion për cola gent, përchè a son ëstàit ambelessì con mi^[1] già da tre di e a l'han nen da mangé. ³E s'i-j mando via a stòmi veuid a soe ca, a-i é privo dë sveniment për stra, përchè a-i na j'é diversi ch'a ven-o da lontan". ⁴E ij sò dissépoj a l'ha rësponduje: "Coma ch'as podrìa mai trové 'd pan ambelessì an ësto desert?". ⁵E chiel a l'ha ciamaje: "Vàire ‘d pan ch’i leve?". A l'han dije: "Set pan". ⁶Anlora a l'ha comandà a tuta la gent d'ansetesse a tèra e a l'ha pijà ij set pan. Apress d'avèj ringrassiane Nosgnor^[2], a l'ha rompuje e a l'ha daje ai sò dissépoj për fene la dëstribussion a la gent^[3]. E a l'han falo. ⁷A l'avìo 'dcò dij cit pess e Gesù, apress d'avejne ringrassià Nosgnor, a l'ha comandà ch'a-j distribuèisso 'dcò a la gent. ⁸E tùit a l'han mangià e a son stane sodisfàit, e a son portass-ne via fin-a set cavagne 'd lòn ch'a l'era vansà dij tòch ëd pan. ⁹Coj ch'a l'avio mangià a l'ero apopré quatmila përson-e. Apress ëd lòn Gesù a l'ha congedaje. ¹⁰Sùbit apress a l'é montà 'nt un barchèt con ij Sò dissépoj e a l'é andàit ant la region ëd Dalmanuta.

A veulo vëdde 'd miràcoj!

¹¹Cand che ij Farisé a l'han sentù ch'a l'era rivaje Gesù, a son ëvnù da chiel e a l'han comensà a fé 'd polémiche. Për butelò a la preuva a l'han ciamà 'd mostreje chèich segn miracolos dal cel^[4] përchè a-j dimostrèissa Soa autorità. ¹²Anlora Gesù a l'ha sospirà përfond ant Sò spìrit e a l'ha dit: "Përché sta generassion-sì a séguita 'd ciameme 'd fé 'd miràcoj? Iv diso la vrità, ch'a-j na sarà acordà gnun ëd sòrt^[5]. ¹³E chitandje, a l'é torna montà 'nt ël barchèt, e a l'é passà a l'àutra riva.

Ël chërsent dij Farisé e d'Eròde

¹⁴Ma ij dissépoj a l'avìo dësmentiasse 'd porté da mangé e 'nt ël barchèt a l'avìo mach na mica 'd pan. ¹⁵Antramentre ch'a travërsavo 'l lagh, Gesù a-j dà costa avertensa: "Fé atension! Pijeve varda dal chërsent dij Farisé^[6] e dal chërsent d'Erode!". ¹⁶Anlora a l'han comensà a disputé tra 'd lor përchè a l'avìo nen portà 'd pan. ¹⁷Gesù, avend sentù lòn ch'a disio, a-j dis: "Përchè steve lì a dëscute ch'i l'eve nen ëd pan? Possìbil ch'i capisse ancora nen? I seve pròpi dur ëd comprendòni! ¹⁸I l'eve d'euj e i s-ciàire nen! I l'eve dj'orije e i sente nen! Possìbil ch'i arcordeve nen^[7]? ¹⁹Cand ch'i l'hai fàit la dëstribussion dij sinch pan ai sinch mila òm, vàire ch'i l'eve cujì 'd cavagne pien-e dij tòch ch'a l'era restaje?". "Dódes", a-j rëspondo. ²⁰E cand ch'i l'hai fàit la dëstribussion dij sinch pan ai quatr mila òm, vàire ch'i l'eve cujì 'd cavagne pien-e dij tòch ch'a-i era d'avans?". E a l'han dije: "Set". ²¹E chiel a l'ha dije: "Ancora i capisse nen^[8]?".

Na varision an doi moment

²²Peui a l'é vnù a Betsaida e a l'han presentaje 'n bòrgno, pregand-lo ch'a lo tochèissa. ²³Anlora a l'ha pijà 'l bòrgno për la man e a l'ha mnalo fòra da la borgià, e avendje butà 'd saliva an sj'euj e posà la man an su chiel, a l'ha ciamaje se adess a vëddìa cheicòsa. ²⁴E col òm, an beicand, a l'ha dije: "I vëddo dj'òm ch'a marcio: a më smijo tanti erbo". ²⁵Gesù a l'ha torna butaje le man an sj’euj, e a l'ha comandaje 'd vardé, e a l'é stàit varì, e a vëddìa tuti bin ciàir da lontan. ²⁶Peui a l'ha dije 'd torness-ne a ca e ch'a intrèissa pì nen ant la borgià, pijand varda 'd conté a gnun lòn ch'a l'era capitaje.

La confession ëd Pero

²⁷Gesù e ij Sò dissépoj, partì cha son ëstàit da là, a son ëvnùit a le borgià 'd Cesarea 'd Filippi e a l'ha interogà ij Sò dissépoj për stra, disendje: "Chi é-lo che la gent a dis che mi i son?". ²⁸A l'han rësponduje: "J'un a diso che ti 't ses Gioann, ël batesator; d'àutri Elia, e d'àutri ancora un dij profeta^[9]". ²⁹Anlora a l'ha dije: "E vojàutri, chi é-lo ch'i dise che mi i son?". Pero, rëspondendje, a-j dis: "Ti 't ses ël Crist^[10]". ³⁰E Gesù, sever, a l'ha proibije 'd felo savèj an gir.

Prima predission ëd la mòrt e dl'arsurression

³¹E a l'ha comensà a mostreje ch'a l'era necessari che 'l Fieul ëd l'Òm a patissa tant, e ch'a fussa arnegà da j'ansian, dai càp dij sacerdòt e dai magìster ëd la Lege, ch'a lo fèisso meuire, e ch'a arsusitèissa tre di apress. ³²E a tenìa coj discors franch e ciàir, tant che, su lòn, Pero a l'ha ciapalo da banda e a l'é butasse a arprocelo ch’a disèissa pì nen ëd ròbe parèj. ³³Gesù, contut, virandse e vardand ij Sò dissépoj, a l'ha arprocià Pero e a l'ha dije: "Stame lontan, Sàtana! Ti 't vëdde le còse mach da na mira uman-a e pa nen coma ch'a-j vëdd Nosgnor".

Lòn ch'a veul dì andeje dapress a Gesù

³⁴Peui avend ciamà la gent ch'a s'avzinèissa ansema ai Sò dissépoj, a l'ha dije: "Chionque a veul ëvnime dapress, ch'a 'rnonsia a chiel istess, ch'as caria 'd soa cros e ch'am ven-a dapress^[11], ³⁵përchè chionque as ambranca^[12] a soa vita a la përdrà, ma chionque a l'é dispòst a 'rnunsié^[13] a soa vita për amor ëd mi e dla Bon-a Neuva^[14] chiel-lì a la salverà^[15]. ³⁶Dabon, còsa a-j profitrìalo a n'òm ëd vagné 'l mond antregh, se peui a perd soa ànima? ³⁷Opura, còsa podrìa-lo mai dé l'òm an cambi 'd soa ànima^[16]? ³⁸Përché chionque a l'avrà onta 'd mi e 'd mie paròle an sti dì-sì pien d'adultèri e 'd pecà^[17], ël Fieul ëd l'Òm a l'avrà 'dcò onta 'd chiel, cand ch'a sarà vnù anvlupà dla glòria 'd Sò Pare con j'àngej sant.

Nòte

1. O "A  l'é già tre di ch'a bogio nen d'ansem a mi".
2. O "dàit glòria a Nosgnor".
3. O "buteje dëdnans a la gent".
4. Cfr. Maté 12:38; Luca 11:16.
5. Cfr. Matè 12:39; Luca 11:29.
6. Cfr. Luca 12:1.
7. O "I l'eve nen ëd memòria!". Cfr. Geremìa 5:21; Esechiel 12:2; March 4:12.
8. O "Com é-lo ch'i l'eve nen d'inteligensa?".
9. Cfr. March 6:14-15; Luca 9:7-8.
10. Cfr. Gioann 6:68-69.
11. Cfr. Matè 10:38; Luca 14:27.
12. O "vorerà salvé".
13. O "a përdrà".
14. O "l'Evangel".
15. Cfr. Matè 10:39; Luca 17:33; Gioann 12:25.
16. O "é-lo fòrse cheicòsa ch'a val ëd pì che toa ànima?".
17. O "an mes a sta nassion adultera e pecatriss".