La Bibia piemontèisa/Testament Vej/Esechiel/Esechiel 22

←Esechiel 21

La Bibia piemontèisa Esechiel

Esechiel 23→

La Bìbia piemontèisa - Esechiel 22

Esechiel

22

Le colpe ‘d Gerusalem

¹Nosgnor a l’ha fame conòsse soa paròla. A l’ha dime: ²“Fieul d’òm! Ses-to pront a pronunsié un giudissi, a pronunsié ‘n giudissi contra 'd na sità sanghinaria? Antlora denunsia tute j'assion abominàbij ch’a fan ambelelì. ³Dije: ‘Sossì at fà savèj ël Signor Dé: Ti, sità anté ch’a së spantia ‘d sangh parèj da merité da bin soa condan-a^[1], anté ch’as fàbrico d’ìdoj arbutant ch’a la rendo 'mpura; ⁴It ses rendute colpèivola për ël sangh ch’it l’has ësbardlà, a l’han rendute 'mpura j’ìdoj ch’it l’has fabricate. A l’é parèj ch’it ses avzinate al finagi dij tò di, a l’é parèj ch’it ses rivà a la borna dij tò agn. A l’é për lòn ch’i l’hai fate dventé la svergna dj’àutri pòpoj, la sbefia ‘d tùit ij pais. ⁵Tuti, dal pì davsin al pì lontan, a të sbefieran, ti ch’it ses na sità ‘d cativa ‘rputassion e pien-a ‘d disórdin.

⁶Varda mach coma minca prinsi d’Israel ch’a stà ‘n mes ëd ti a l’ha dovrà sò podèj për ëspantié ‘d sangh. ⁷An mes a ti ij pare e le mare a son ëstàit umilià^[2], ij forësté a son ëstàit maltratà, e a j’orfanin e a le vìdoe a l’han faje ‘d tòrt^[3]. ⁸It l’has meprisà lòn ch’a l’é sant e ij mè di d’arpòs^[4]. ⁹An mes ëd ti ëd lenghe grame a l’ero tute ciapà a vërsé ‘d sangh; a j’ero ‘d coj ch’a mangiavo lòn ch’a l’era stàit sacrificà an onor ëd divinità pagan-e^[5] e coj ch’a praticavo minca sòrt ëd depravassion. ¹⁰An mes ëd ti a j’era chi ch’as cogiava con le fomne ‘d sò pare^[6] e coj ch’a forsavo le fomne ch’a l’avio ij sò cors^[7] a cogesse con lor. ¹¹An mes a ti a j’ero ‘d coj ch’a comëttìo d’at abominèivol con le fomne dij sò avzin ëd ca; coj ch’a ‘ntamnavo soe nòre cogiand-se con lor; e coj ch’a fasìo violensa a soe seurastre^[8]. ¹²An mes a ti a j’ero 'd coj ch’a ‘rseivìo volonté ‘d present për massé ‘d nossent^[9]; chi ch’a praticava lë strossinagi^[10] e ch’a otnìa ‘d benefissi an profitand-se dj’àutri. Ti ‘t l’has pròpi dësmentiate ‘d mi! I lo diso mi, ël Signor Dé.

¹³Varda mach che dë s-ciopatà ‘d man^[11] ch’i faso për le fràude ch’it l’has comëttù e për ël baron ëd sangh ch’a l’han ëspantià an mes ëd ti. ¹⁴Podrà-lo tò cheur arziste e a resteran fërme toe man ant ij di dël castigh ch’i son an camin ëd pronté për ti? A l’é mi, ël Signor, ch’i lo diso e mi i lo compirai - it peule stene sicur! ¹⁵It ësbardlerai an tra le nassion e it dësbergiairai an pais forësté; i consumerai tanme ‘n feu tute j’anflure ch’a-i son an ti. ¹⁶It saras ëdzonorà për colpa toa dë 'dnans ëd le nassion. A sarà parèj che ti ’t savras ch’i son mi ël Signor”.

¹⁷Ël Signor a l’ha comunicame soa paròla. A l’ha dime: ¹⁸“Fieul d’òm, ëscota. Për mi ël pòpol d’Israel a l’é tanme ‘d metal fàuss. Tuta soa gent a son tanme ‘d bronz, dë stagn, ëd fèr e ‘d piomb passà për la fornasa. A son d’argent fàuss! ¹⁹Përtant, ël Signor Dé a fà savèj sossì: ‘Pròpi përchè tuti vojàutri i seve dventà ‘d metal fàuss, iv farai vnì ant ël griseul ëd Gerusalem. ²⁰Coma ch’as fà cand ch’as buta d’argent, ëd bronz, ëd fer, ëd piomb e dë stagn ant la fornasa parèj che ‘l feu a-j fà fonde con soa campà afoà, parèj mia rabia e zara 'v rabasterà ansema, av camperà ant ël feu e av farà fonde ambelelà. ²¹Iv cheujerai tùit ansema e iv sofierai a còl ël feu ‘d mia furia e i dventereve na fusion. ²²Tanme d’argent a l’é fondù ant un griseul, parèj i sareve fondù vojàutri. Antlora i savreve ch’a l’é mi, ël Signor, ch’i l’hai vërsà ‘n sù vojàutri mia flin-a”.

Responsabilità ‘d tut ël pòpol

²³Ël Signor a l’ha comunicame soa paròla. A l’ha dime: ²⁴“Fieul d’òm, dije a Gerusalem ch’a l’é na tèra ch’a l’é pa stàita purificà, ch’a l’é pà stàita lavà da la pieuva ant ël di ‘d mia ira. ²⁵Ij sò governant^[12] a l’han fàit an chila ‘d cospirassion tant me ‘n leon ch’a breugia a fà a tòch soa pijàita: a l’han angorgionasse la gent, a son ampadronisse dij béni e dle richësse e a l’han rendù vìdoe motobin ëd fomne ant la sità. ²⁶Ij sò sacerdòt a l’han violà mia Lege e a l’han profanà lòn ch’a l’é sant, sensa fé na distinsion an tra lòn ch’a l’é sant e lòn ch’a l’é profan, nì fàit conòsse la diferensa an tra lòn ch’a l’é pur e lòn ch’a l’é ampur. A l’han sarà j’euj dë 'dnans ai mè di d’arpòs^[13]. A l’è parèj che mi i son ëstàit profanà an mes ëd lor^[14]. ²⁷Ij sò ufissiaj a son tanme ‘d luv ch’a stripon-o soa pijàita, a son dispòst a vërsé ‘d sangh e a fé meuire la gent mach për otnì ‘d profit dzonest. ²⁸Ëdcò ij sò profeta a l’é coma s’a l’avèisso dàit la biaca a sò mëssage ‘d lor për quatene ‘l mal. A l’han profetisà ‘l fàuss e a l’han ëstrologà ‘d tromparìe. A l’han dit: ‘Sossì a l’é lòn ch’a nunsia ‘l Signor Dé’ bele se Nosgnor a l’avìa pa parlaje. ²⁹E la gent dël pòpol a l’ha dedicasse a crasé e a rapacé, a dësfruté ij pòver e ij bzognos; a l’han ësfrosà jë strangé e arfudaje la giustissia.

³⁰I l’hai bin sërcà ‘n tra ‘d lor s’a-i fussa cheidun dispòst a rangé la muraja dla giustissia ch’a guerna ‘l pais, e ch’a stèissa ant la brecia dla muraja, parèj ch’i l’avèissa pa da dësblela dël tut, ma i-j l’hai pa trovalo. ³¹Antlora i l’hai vërsà ‘n sù lor tuta mia ira e i-j consumerai con ël feu ‘d mia furia. I l’hai faje tombé a còl tut lòn ch’a mérito. I lo diso mi, ël Signor”.

Nòte

1. O “parèj che toa ora as avzin-a”.
2. Cfr. Surtìa 20:12; Deuteronòmi 5:6.
3. Cfr. Surtìa 22:21-22; Deutreronòmi 5:16.
4. O “ij mè saba”. Cfr. Levitich 19:30; 26:2.
5. Let. “an sle montagne”, as antend ant ëd santuari o leu d’adorassion d’ìdoj.
6. O “ch’a dësquatava la nudità ‘d sò pare”.
7. Le mëstruassion.
8. Cfr. Levitich 18:7-20.
9. O “për ëspantié ‘d sangh”. Cfr. Surtìa 23:8; Deuteronòmi 16:19.
10. Cfr. Surtìa 22:25; Levitich 25:36-37; Deuteronòmi 23:19.
11. S-ciopaté le man antlora a l’avìa pa la significassion d’ancheuj ma a l’era ‘n segn ëd deul e ‘d rabia.
12. O “ prinsi”: sta sì a l’é ‘l tèrmin ch’a deuvra la LXX. L’ebràich a pòrta: “Na cospirassion ëd profeta”. Ij profeta a son mensionà pì tard ant ël vers 28. S’i andoma dapress la version dij LXX,  a-i é sinch grop distint mensionà in vv. 25-29: prinsi, sacerdòt, ufissiaj, profeta, e ‘l pòpol dël pais.
13. O “Saba”.
14. Cfr. Levitich 10:10.