La Bibia piemontèisa/Testament Vej/Esechiel/Esechiel 21

←Esechiel 20

La Bibia piemontèisa Esechiel

Esechiel 22→

La Bìbia piemontèisa - Esechiel 21

Esechiel

21

La spa ‘d Nosgnor

^1[1]Nosgnor a l’ha comunicame soa paròla. A l’ha dime: ²“Fieul d’òm! Virte vers Gerusalem e parla contra dij sò santuari. Profetisa contra dla tèra d’Israel. ³Dije: Parèj a dis ël Signor: I sarai mi vòst nemis. I dësfodrai mia spa e ant la sità i masserai tant ij giust coma ij pecador. ⁴I l’hai l’antension ëd fé meuire tant ij giust che ij pecador: a l’é për lòn ch’i son an camin ëd dësfeudré mia spa dal meridion fin-a al setentrion. ⁵Antlora tuti a savran ch’i son mi, ël Signor, col ch’a dësfeudra la spa. E a sarà peui pì nen anfeudrà.

⁶E ti, fieul ëd l’òm, gëmmiss coma s’it l’avèisse tut ch’a fà mal, gëmmiss amèr con ël cheur brisà dë 'dnans a tò pòpol. ⁷E s’at ciamo ‘l përchè it gemisse, rëspondje: “Për motiv ëd la neuva ch’a l’é rivame. Mach a sente ‘d lòn ch’a rivrà, tùit ij cheur as ëslingueran da la pàu, tute le man a përdran soe fòrse, tùit as sentiran manché e tùit ij ginoj a saran bagnà ‘d piss^[2]. A l’é ‘n camin ch’a riva: a l’é tut giumai decis! I lo diso mi, ël Signor Dé”.

⁸Dòp ēd lòn, ēl Signor a l’ha comunicame soa paròla. A l’ha dime: ⁹“Fieul d’òm, profetisa e crìja: ‘Parèj a dis Nosgnor: La spa, la spa a l’é molà e lustrà. ¹⁰A l’é molà për massé e bin lustrà për bërluse tanme la lòsna! Dovrio-ne argiojì ant la cavija regal ëd mè fieul? Nò! La spa a meprisa minca n’erbo^[3]. ¹¹A l’ha fàit lustré la spa anans d’ambranchela - la spa a l’é stàita molà e lustrà e a l’han dàjla an man dël bòja. ¹²Crija e fà plenta, fieul d’òm, përchè la spa a l’é tombà dzora 'd mè pòpol, dzora 'd tùit ij governant d’Israel, vìtime dla spa con j’àutri dël pòpol. Bat-te ‘l pét coma segn ëd deul. ¹³Përchè a vnirà na preuva, e còs capiterìa-lo cand la cavija regal, che la spa a meprisa, a-i sarà pì nen? I lo diso mi, ël Signor Dé”.

¹⁴“E ti, fieul d’òm, profetisa e s-ciopata ‘dcò le man. Che la spa a colpissa dòi, tre vire! A l’é na spa për massé, për fé un gran carnagi tut d’antorn. ¹⁵Përparèj che ij cheur a së slingo da la pàu e tanti as antrapo e a casco për tèra. I l’hai butà na spa dëstinà a fé ‘n carnagi a tute le pòrte ‘d soa sità. Ah! A l’é fàita për ësluse, a l’é dësfeudrà për massé! ¹⁶Vìrte tut a drita, ven anans a la mancin-a, tut andoa che ‘l fil ëd la spa a l’ha da frapé. ¹⁷Ëdcò mi i s-ciopatrai mie man e i arpatrai mia ira. I son mi, ël Signor, ch’i l’hai parlà”.

Le doe stra dla spa

¹⁸Ël Signor a l’ha comunicame soa paròla. A l’ha dime: ¹⁹Ti, fieul d’òm, marca doe stra che la spa dël rè ‘d Babilònia a l’avrà da passé: tut e doe as ancamin-o da la midema tèra. Buta peui un segnal al prinsipi dla stra ch’a men-a a la sità. ²⁰Marca ‘l përcors ch’a l’ha da pijé la spa: ‘Raba dj’Amonita’ e ‘Giuda an Gerusalem^[4]’. ²¹An efet, ël rè ëd Babilonia a stà a la crosiera andova le doe stra as ancamin-o. Chiel a consulta coj ch’a sërco ‘d presagi: a tira le sòrt, a tira le flece, a ciama consèj a j’ìdoj ëd famija, a esàmina ij fìdich ëd le bestie. ²²An soa man drita a ten già l’oràcol ëd rispòsta: Gerusalem. A l’ha da taché con ij moton ëd fracassura, a l’ha da dé l’órdin ëd carnagi, a l’ha da fé arsoné ‘l crij ëd guèra, a l’ha da piassé ij moton contra soe pòrte, a l’ha da alvé ‘d rampar e fabriché ‘d muraje d’assedi. ²³La gent ëd Gerusalem a chërdrà ch’as trata d’un presagi fàuss. A l’han fàit ëd gran' giurament, ma ‘l rè ‘d Babilònia a j'acusrà ‘d violassion dël pat ch’a l’ha fàit con lor përchè a veul ciapeje.

²⁴Përtant, parèj av nunsia ‘l Signor Dé: ‘Da già ch’i seve vojàutri ch’i l'eve causà vòstre colpe an dësquatand vòstre trasgression e an arveland ij vòstri pëccà an tuta vòstra manera ‘d fé, a l’é për lòn ch’i sareve ciapà con la fòrsa.

²⁵E a ti, rè d’Israel, profan e sacrìlegh, che ancheuj it rives a l’ora final ëd toa colpa, ²⁶sòn ël Signor Dé at dis: ‘Buta giù ël turban e gavte la coron-a! Tut a dovrà cambié! A sarà esaltà lòn ch'a l'é bass, e lòn che a l'é àut a sarà sbassà. ²⁷Ruin-a, ruin-a! Na completa ruin-a a-i sarà. A s'alverà pì nen fin-a che a-i rivrà col ch’i l’hai daje ‘l podèj d’esecussion dël giudissi.

²⁸E ora ti, fieul d’òm, profetisa e dì: ‘Parèj a rëspond ël Signor Dé a j’Amonita për lòn ch’a riguarda l’umiliassion ch’a l’ha da rivé. A dis: Na spa, na spa a l’é dësfodrà pr’ ël carnagi, a l’é stàita molà për ësterminé, për bërluse tanme la lòsna, ²⁹antramentre che ti 't l'has ëd carcaveje fàusse e che at fan prevision busiarde an sla sòrt, la spa a sarà butà a la gola dij gram e dij sacrìlegh, përchè, al corm ëd soa gramissia a l'é rivà al temp ëd la punission. ³⁰Bùtla torna ant ël feuder! Ant ël midem pòst andova ch'it ses stàit creà, ant l'istessa tèra andova ch'it ses nà, mi it giudicherai. ³¹I travaserai dzora ‘d ti mia ira, ël feu ëd mia ràbia a sofierà contra 'd ti. It lasserai a la mersì 'd gent grossera, che a pòrta dëstrussion. ³²Ti ‘t saras divorà dal feu, tò sangh a seiverà la tèra, gnun as n'avisrà pa pì ëd ti. A l’é mi, ël Signor, ch’i l’hai parlà^[5]”.

Nòte

1. Esechiel 21:1 an nòstra Bibia a corespond a 21:6 dël test ebràich (BHS). Cfr. la nòta a 20:45.
2. O “as pisseran adòss”.
3. Ël pòpol ëd Giuda a dovrìa pa deje fiusa a sò rè, simbolisà da na cavija regal. Ël giudissi ‘d Nosgnor, an efet (simbolisà dal feu e peui da na spa) a l’avrìa dëstrovù minca n’erbo (cfr. 20:47), sìmbol dij giust e dij pecador.
4. Ël TM a les "Giuda ant la Gerusalem fortificà": geograficament pa probàbil. La tradussion a séghita jë LXX, che a sotantend e a presupon con: בְּתוֹכָהּ (bëtocah, "andrinta a lòn") për בְּצוּרָה (bëtsorah, "fortifià").
5. 21:28-32 cfr. Geremìa 49:1-6; Esechiel 25:1-7; Amos 1:3-15; Sofonia 2:8-11.