La Bibia piemontèisa/Testament Vej/Deuteronomi/Deuteronomi 16

←Deuteronomi 15

La Bibia piemontèisa Deuteronòmi

Deuteronòmi 17→

Deuteronòmi

La Bìbia piemontèisa - Deuteronòmi 16

16

La festa 'd Pasca

¹Ël mèis d’Abib a l’é ‘n mèis ëspecial ch’i l’eve da selebré an onor dël Signor vòst Dé con l’osservansa dla Pasca, përchè na neuit dël mèis d’Abib chiel a l’ha fave seurte da l’Egit. ²Ant ël leu che Nosgnor a l’avrà sernù përch’ a pòrta sò nòm, smon-e an sacrifissi la vìtima pascal an onor dël Signor, vòst Dé: a l’avrà da esse na bestia ciapà dal bestiam gròss o mnù. ³Ant ël past ëd Pasca, mangé nen ëd pan fërmentà. Për set dì mangé 'd pan sens’ alvà^[1], ël pan d’aflission^[2] përchè an tuta pressa i l'eve dovù seurte dal pais d'Egit: an costa manera vojàutri 'v n'avisreve dël di ch'i seve surtì dal pais d'Egit, për tut ël temp ëd vòstra vita. ⁴Për set dì e për tut vòst teritori, a l’avrà nen da vëdse d’alvà. Ëd la carn sacrificà la sèira, quand ch’a riva la matin a l’avrà da restene nen. ⁵I podreve pa sacrifiché la vìtima pascal ant na sità qualsëssìa che ‘l Signor, vòst Dé, av darà, ⁶ma mach ant ël leugh che ‘l Signor, vòst Dé, a l’avrà sernù për ch’a pòrta sò nòm. Sacrifiché ambelelà la vìtima pascal ëd sèira, al calé dël sol, ant l’ora ch’i j’ere surtì da l'Egit. ⁷I la fareve cheuse e ‘v podreve mangela ant ël leugh che ‘l Signor, vòst Dé, a l’avrà sernù. Peui, a la matin, i podreve artorné a ca vòstra^[3]. ⁸Për ses dì mangé ‘d pan sens’ alvà; ël dì sétim a l’avrà da essie na radunansa santa ‘d ciusa an onor dël Signor, vòst Dé. Ant col dì lì i fareve gnun-a sòrt ëd travaj^[4].

La festa ‘d Pancòsta o dle Sman-e

⁹Conté set ësman-e ancaminand a conteje dal moment ch’as butrà man a la mëssòira për l’amson, ¹⁰peui i podreve selebré la festa dle Sman-e an onor dël Signor, vòst Dé. Pronté d’oferte volontàrie an proporsion ëd le benedission ch’i l’avreve arseivù dal Signor, vòst Dé. ¹¹Peui andé 'nt ël leu che ‘l Signor, vòst Dé, a l’avrà sernù për ch’a pòrta sò nòm; ambelelà, a la presensa dël Signor, vòst Dé, selebré la festa con ij vòstri fieuj e fije, con ij vòstri servent e vòstre creade, con ij Levita e ij foresté ch’a l’han residensa an vòstra sità, con j’orfanin e le vidoe ch’a vivo an mes a vojàutri. ¹²Arcordeve ch’i j’ere stàit dë s-ciav an Egit: guerné e buté an pràtica costi decrèt^[5].

La festa dlë Bënne

¹³Al temp ëd l'archeuita 'd vòstra èira e 'd vòstri tòrcc, i selebrereve për set di la festa dle Bënne. ¹⁴Feve la selebrassion con gòj ansem ai vòstri fieuj e fije, con ij vòstri servent e creade, con ij Levita e ij foresté, j’orfanin e le vidoe ch’a l’han residensa an vòstra sità. ¹⁵Për set dì selebré la festa an onor dël Signor, vòst Dé, ant ël leugh che ‘l Signor, vòst Dé, a l’avrà sernù. Pien ëd gòj, ringrassié ‘l Signor, vòst Dé, ch’a l’avrà benedive an tùit ij vòstr arcòlt e an tùit ij vòstri travaj^[6].

¹⁶Tre vire l’ann, tuti j’òm as presenteran dë 'dnans al Signor, vòst Dé, ant ël leu che chiel a l’avrà sernù, për la festa dij Pan sens’ Alvà^[7], për la festa dle Sman-e^[8] e për la festa dle Bënne^[9]. Che gnun as presenta dë 'dnans a Nosgnor a man veuide, ¹⁷ ma con d’oferte proporsionà a la benedission ch’a l’avrà arseivù dal Signor, vòst Dé.

Tribunaj locaj

¹⁸An tute le sità che ‘l Signor, vòst Dé, a darà a mincadun-a dle vòstre tribù, stabilìssie ‘d giùdess e d'ofissiaj pùblich ch’a l’avran l’ancombensa ‘d giudiché con giustissia ij cas che la gent a-j porterà dë 'dnans. ¹⁹Përvertì pa ‘l dirit nì sie parsial. Aceté pa ‘d bustarele, përchè ij present a sbòrgno j’euj fin-a dle përsone giudissiose e a compërmëtto la càusa dij nossent^[10]. ²⁰Serché mach la giustissia. A l’é parèj ch’i vivreve ant ël pais che ‘l Signor, vòst Dé, av don-a, e i podreve ess-ne padron.

Pràtiche religiose proibìe

²¹Cand ch’i feve la dedicassion ëd n’autar an onor dël Signor, vòst Dé, piàntje nen aranda dj’erbo^[11], coma për feve ‘d boschèt sacrà. ²²E gnanca buté an pé ‘d pilon sacrà^[12], përchè ‘l Signor, vòst Dé, a detesta cole ròbe-lì.

Nòte

1. מַצּ֖וֹת (matsòt).
2. O “ëd miseria”.
3. O “an toe tende”.
4. 16:1-8 cfr. Surtìa 12:1-20; Levitich 23:5-8; Numer 28:16-25.
5. 16:9-12 cfr. Levitich 23:15-21; Numeri 28:26-31.
6. 16:13-15 cfr. Levitich 23:33-36; 39-43; Numer 29:12-28.
7. חַ֧ג הַמַּצֹּ֛ות (hag hamatsòt).
8. חַ֥ג הַשָּׁבֻעֹ֖ות (hag hashavuòt).
9. חַ֣ג הַסֻּכֹּ֑ות (hag hasuchòt).
10. O “le paròle dij giust”. Cfr. Surtìa 23:6-8; Levitich 19:15.
11. Cfr. Surtìa 34:13.
12. Cfr. Levitich 26:1.