La Bibia piemontèisa/Testament Vej/Deuteronomi/Deuteronomi 23

←Deuteronomi 22

La Bibia piemontèisa Deuteronòmi

Deuteronòmi 24→

Deuteronòmi

La Bìbia piemontèisa - Deuteronòmi 23

23

D’esclusion da la ciambrea dël pòpol

¹N’òm ch’a sia stàit castrà o ch’a l’àbia avù ‘l pénis tajà a podrà pa esse amëttù ant la ciambrea ‘d Nosgnor^[1]. ²Dla midema manera, a podrà pa intré ant la ciambrea ‘d Nosgnor un bastard^[2]. E gnanca ‘n sò dissendent fin-a a la generassion ch’a fà des a-i podrà esse amëttù.

³J’Amonita e ij Moabita^[3] a podran pa esse amëttù ant la ciambrea ‘d Nosgnor, e lolì gnanca la generassion ch’a fà des dij sò dissendent a-i në saran amëttù. A lo podran mai essie, ⁴përchè ch’a l'ero pa vnùite ancontra con pan e d'eva, an tò viage, ant ël moment ch’i surtìe d'Egit e për ël fàit che a l'avìo ciamà Balam, fieul ëd Beor, da Petor ant la Mesopotàmia, e a l'avìo daje 'd sòld për maledite^[4]. ⁵Ma 'l Signor vòst Dé a l'ha pa scotà Balam; nen mach, ma për voi a l'ha cambià la maledission an benedission, përchè 'l Signor vòst Dé av veul bin^[5]. ⁶Serché mai, për tant ch'i vive, la prosperità 'd lor, nì sò bin. ⁷Nopà l'Edomita, da già ch'a l'é vòst frel, i dovreve mai abominelo; e parèj gnanca l'Egissian, përchè it ses stàit òspite an sò pais. ⁸Ij fieuj che a-j nass-ran a lor, ëd la tersa generassion, a podran intré ant la ciambrea 'd Nosgnor.

Purëssa ritual dël campament

⁹Cand ch’i antrapijereve na campagna militar contra ij vòst nemis, vardeve bin dë schiné tut lòn ch’at podèissa rend-ve 'mpur^[6]. ¹⁰S’a-i fussa an mes a voi cheidun ch’a sìa vnùit ampur për ëd polussion^[7] nuiteje, ch’a seurta dal campament e ch’a-i torna pa durant ël dì. ¹¹Quand ch’a rivrà la sèira as laverà con d’eva e a podrà torné al campament a l’ambrun-a dël sol. ¹²Ël còmod për fé ij tò bzogn it l’has da tnilo fòra dal campament. ¹³An tò echipagiament, pòrta ‘dcò na palëtta e cand ch’i seurte a fé ij vòst ëbzogn, feve na tampëtta. Apress, quaté j'escrement con ëd tèra. ¹⁴Che parèj a-i sia gnun-a porcarìa an tò campament, ch’a l’ha da esse sant, për ch’a l’é ‘l Signor, vòst Dé, ch’a në sta ‘n mes. A l’ha da essie gnente ch’a-j fasa dëspiasì, përchè a l’é chiel ch’av lìbera e ch’av dà ij vòstri nemis ant le man; dësnò chiel a podrìa bin andess-ne.

Ne s-ciav fugitiv

¹⁵Dejlo pa ‘ndré a sò padron në s-ciav ch’a sia scapà e arfugiasse da voi. ¹⁶A podrà ‘d sicur resté da voi, an vòst pais, ant ël leugh ch’i serne, ant un-a dle sità che chiel as treuva mej. Deje gnun-a molèstia!

Nò a la prostitussion sacra

¹⁷A gnun Israelita, òm o fomna ch’a sia, a l’é consenti ‘d pratiché la prostitussion sacra^[8]. ¹⁸S’i l’eve da compì ‘n vot, porté nen al templi dël Signor, vòst Dé, na paga da bagassa, o la paga d’un can, l’é a dì n’òm ch’as prostituiss. L’un-a e l’àutra pràtica a son ëd ròbe abominèivole pr’ ël Signor, vòst Dé.

Ij préstit a ‘nteresse

¹⁹It-j faras pa a tò frel Israelita ëd préstit a 'nteresse, nì ëd dné, nì ëd proviande, nì ëd tut lòn che as peul prestesse a 'nteresse. ²⁰A lë strangé it podras bin presteje a 'nteresse, ma nen a tò frel israelita; përche ël Signor tò Dé at benedissa an tut lòn ch'it faras, ant ël pais andova che të staghe për intré, për ess-ne padron^[9].

Ij vot

²¹Cand ch’i feve ‘n vot al Signor, vòst Dé, i tardereve pa a compilo; përchè ël Signor, vòst Dé, av në ciamerìa 'd sicura cont, e i 't sarìe colpèivoj d’un pëccà^[10]. ²²S’iv asten-e da fé ‘n vot, it comëtte gnun pëccà, ²³ma, s’it në feve un, agisse conform al vot che i l'avreve fàit al Signor vòst Dé ‘d manera volontària.

Dirit ëd cheuje ‘d frut

²⁴Cand ch’it intre ant la vigna ‘d n’àutr, it podras mangé tuta l'uva che 't veule, ma it në butras pa an toa cavagna. ²⁵L’istess, s’it passe pr’ el camp ëd n'àutr, it podras ciapé dë spì con la man, ma pa nen dovré na mëssòira për pijene.

Nòte

1. Sossì a l’avìa pa da fé con la discriminassion d’òm andicapà, ma che ant ël servissi religios dël Tabernacol, a diferensa ‘d lòn ch’a fasìo ij pagan, mach d’òm complèt a podìo ufissié.
2. Na përson-a nassùa fòra d’un mariagi legitim. Ël “bastard” ממזר : a l'era 'l fieul ëd n'Israelita con un ch’a l’era nen ebrèo.
3. A l’ero ij dissendent ëd Lot e ‘d soe doe fije (cfr. Génesi 19:30-38) ch’a l’ero ‘l frut d’un ansest. Tutun, coste doe nassion a l’avìo ‘dcò mostrà d’avej gnun-a disposission a dé d’ospitalità a Israel (v. 4)
4. Cfr. Nùmer 22:1-6.
5. Cfr. Numer 23:7-24:9; Neemìa 13:1-2.
6. Ël contest, ambelessì, a rend ciàir ch’as trata nen ëd n’avertiment moral, ma ‘d n’esortassion a schivié tut lòn ch’a podèissa dësqualifiché l’Israelita da la partisipassion a d’atività religiose. Dë schivié d’assion grame as na parla an d’àutri leugh.
7. Polussion dë sperma o ‘d porcarìa.
8. Cfr. Levitich 19:29.
9. 23:19-20 cfr. Surtìa 22:25; Levitich 25:36-37; Deuteronòmi 15:7-11.
10. Cfr. Nùmer 30:1-6; Maté 5:33.