La Bibia piemontèisa/Testament Neuv/Tito/Tito 3

←Tito 2

La Bibia piemontèisa Litra a Tito

Filemon→

La Bìbia piemontèisa - Tito 3

Tito

3

Esortassion a tùit ij fedej

¹Arciama a la ment dij chërdent ch’a l’han da sogetesse ai governant e a j’autorità, ch’a l’han da scoteje e d’esse sèmper pront a fé ‘l bin^[1]. ²Ch’a diso ‘d mal ëd gnun; ch’a sio nen litigios, ma grassios, e ch’a dago preuva dla pì granda dosseur con tuti.

³An d’àutri temp, ëdcò nojàutri i j’ero sventà e i scotavo nen. I j’ero dëstornà, ‘d gent sogeta a d'ògni sòrt ëd passion e ‘d piasì. Nòstra vita a l’era pien-a ‘d malissia e d’anvìa; i j’ero odios e i l’avìo an òdio j’un j’àutri. ⁴Contut, cand che Nosgnor, nòst Salvator a l’ha manifestà soa bontà e sò amor, ⁵chiel a l’ha salvane, nen për motiv d’euvre bon-e ch’i l’avèisso fàite, ma grassie a sò amor. Chiel a l’ha lavà vìa ij nòstri pecà e a l’ha argenerane con la forsa arnovratriss dlë Spirit Sant. ⁶Chiel a ha arvërsà con abondansa an sù nojàutri lë Spirit për ël mojen ëd Gesù Crist, nòst Salvator. ⁷Parèj, diciarà giust^[2] për soa grassia, i l’oma la fidansa ch’i arseivroma an ardità, un bel dì, la vita eterna^[3].

⁸Sta paròla a l’é certa^[4] e i veuj che costa dotrin-a a staga bin ferma an tra ‘d voi: a l’é parèj che tuti coj ch’a l’han chërdù an Nosgnor a s’angagio ‘d fé d’euvre bon-e. Tut sòn a l’é bon e ‘d vantagi për tuti.

⁹D’àutra banda, fate nen campé an mes a ‘d discussion sensa sens riguard a ‘d genealogie, a ‘d chestion e polèmiche riguard a l’osservansa dla lege dij Giudé. Tut lolì a serv a nen e a fa mach perde ‘l temp. ¹⁰Se, malgré un-a o doe amonission, a la pianto ancora nen, ch’it l’abie gnente da fé con coj ch’a vorìo buteve j’un contra j’àutri^[5]. ¹¹Ëd gent parèj a l’ha scartà da la vrità e ij sò pecà a-j condan-o daspërlor.

Conclusion

¹²Cand ch’a sara rivà Artemà o Tichico^[6], ch’i veui mandeve, dësangagg-te e ven da mi a Nicòpoli, përchè i l’hai l’intension ëd passeie l’invern. ¹³Pronta con soegn ël viagi ‘d Zena, l’avocà e d’Apòllo^[7]. Varda ch’a-j manca gnente. ¹⁴Nòstra gent a l’ha d’amprende a fé ‘l bin e a provëdde a j’àutri lòn ch’a l’é da bzogn, a fin ch’a resto nen sensa frut.

¹⁵Av saluto tuti coj ch’a son ansem a mi. Saluta coj ch’an veulo bin ant la fede. Che la grassia a sìa con tuti voi. Amen!                

Nòte

1. O “pront a fé ògni sòrt ëd bon-e assion”.
2. O “giustificà”.
3. O “soma, an ësperansa, ardité dla vita eterna”.
4. O “degna ‘d fiusa”.
5. O “con ëd gent set fassiosa” o “erètica”.
6. Cfr. At 20:4; Efesin 6:21-22; Colossèis 4:7-8; 2 Timòt 4:12.
7. Cfr. At 18:24; 1 Corint 16:12.