La Bibia piemontèisa/Testament Neuv/Filemon

←Litra a Tito

La Bibia piemontèisa Ël Testament Neuv

Litra a j'Ebrèo→

Introdussion

La Bìbia piemontèisa - Filémon

La Bìbia piemontèisa - Filemon (Test complèt)

Filémon

Salutassion

¹Pàul, përzoné për motiv ëd Gesù Crist, e ‘l frel Timòt, nòst car colaborator, ²a la seur Àpfia e a nòstri compagn d’arme^[1] Archìp^[2], e a la cesa ch’as riuniss an toa ca. ³Che Nosgnor nòst Pare e ‘l Signor Gesù Crist av daga grassia e pas.

Ringrassiament e preghiera

⁴I rendo sèmper grassie a Nosgnor, mè Dé, cand ch’i faso mension ëd ti an mie preghiere, Filémon, ⁵përchè i sento tant parlé dl’amor e dla fede ch’it l’has për Gesù, ël Signor, e anvers a tut ël pòpol sant^[3]. ⁶I prego che  la generosità ‘d toa fede a peussa esse bin d’efet për fé sèmper mej conòsse tut ël bin ch’i podoma fé për Crist. ⁷Mè frel, i l’hai avù tanta gòj e consolassion cand ch’i l’hai savù che tò amor a l’ha soens arlegrà ij cheur dël pòpol ëd Nosgnor.

Suplica an favor d’Onésim

⁸A l’é për lòn ch’im sento lìber ëd ciamete ‘n favor. I podrìa bin comandetlo an nòm ëd Crist, përchè lolì a sarìa për ti la còsa pì giusta da fé. ⁹Contut, i preferisso domandetlo an nòm ëd l’amor, pròpi mi, Pàul, ansian coma ch’i son e ora. fin-a an përzon për càusa ‘d Gesù Crist.

¹⁰It faso na suplica a favor d’Onésim^[4]. mè fieul, ch’i l’hai daje la vita^[5] ant la fede, bele s’i j’era an përzon. ¹¹Onésim a l’é nen ëstate ùtil an passà, ma adess chiel a l’é motobin ùtil tant a ti che a mi. ¹²I torno a mandetlo, e con chiel  a l’é coma si vnìssa mè cheur medésim.

¹³A sarìa piasume ‘d tnilo con mi durant ch’i son an caden-e për ch’i l’hai predicà la Bon-a Neuva^[6]: chiel a l’avrìa giutame an tò leu. ¹⁴Contut, i l’hai vorsù fé gnente sensa toa contenta: i vorerìa nen che ti’t fasèisse sto favor^[7] për fòrsa, ma volenté.

¹⁵A paress ch’it l’abia perdù Onésim mach për un pò, parèj ch’it l’artroveras për sèmper, ¹⁶pì nen coma në s-ciav, ma motobin mej che në s-ciav, visadì coma ‘n frel bin amà. Chiel al l’é ‘n frel dzortut për mi, ma tant da pì chiel a l’ha da ess-lo për ti, sia da la mira uman-a che ant ël Signor.

¹⁷Se donca ti ‘t ëm ten-e për tò compagn ant la fede, arseivlo coma s’it arseivèisse mi medésim. ¹⁸Che se chiel a l’ha fate ‘n chèich tòrt, o s’at deuv cheicòsa, it tlo pagherai mi: butlo an mè cont. ¹⁹Mi, Pàul, it ëscrivo sossì con mia man midema: it lo arpagrai mi, e i farai gnun-a mension ch’it ëm deuves toa ànima medésima! ²⁰Éh, frel, fà che ant ël Signor mi i peuda arsèive da ti col benefissi-lì, Për amor ëd Crist, dà a mè cheur cost arlass!

²¹I l’hai scrivute an essend sicur ëd toa ubidiensa, sicur che ti ‘t faras ancora mej ëd lòn ch’it ciamo. ²²D’àutra banda, pront-me n’alogg përchè i spero che, për ël mojen ëd vòstre preghiere, a otniran che mi i sia artornave.

Conclusion

²³At saluta Epafra^[8], mè compagn ëd përzon an Gesù Crist, ²⁴March^[9], Aristarch^[10], Dema^[11] e Luca,^[12] e ij mè colaborator. ²⁵Che la grassia ‘d Gesù Crist, ël Signor, a sia con vòst ëspirit. Amen!

Nòte

1. O “nòstr compagn ant ël combatiment”.
2. Cfr. Colossèis 4:17.
3. O “tùit ij sant”.
4. Cfr. Colossèis 4:9.
5. O “generalo”.
6. O “dl’Evangeli”.
7. “che ti im lasèisse un bin ch’a l’é tò”.
8. Cfr. Colossèis 1:7; 4:12.
9. Cfr. At 12:12,25; 13:13; 15:37-39; Colossèis 4:10.
10. Cfr. At 19:29; 27:2; Colossèis 4:10.
11. Cfr. Colossèis 4:14; 2 Timòt 4:10.
12. Cfr. Colossèis 4:14; 2 Timòt 4:11.