La Bibia piemontèisa/Testament Neuv/Efesin/Efesin 6

←Efesin 5

La Bibia piemontèisa Litra a j'Efesin

Filipèis 1→

Efesin

La Bìbia piemontèisa - Efesin 6

6

¹Fieuj, scoté vòst pare e vòstra mare, coma ch'a veul Nosgnor, përchè lolì a l'é giust^[1]. ²Onora tò pare e toa mare: sto-sì a l'é 'l prim comandament compagnà da na promëssa. ³La promëssa a l'é: "Parèj it saras content e it vivras un bel pess an sla tèra^[2]".

⁴E vojàutri pare anvelené nen l'ànima^[3] 'd vòstri fieuj: anleveje bin e mostreje coma ch'a farìa 'l Signor.

⁵Servitor, scoté con reverensa e timor coj che, an ës mond^[4], a son ij vòstri padron, con semplicità 'd cheur, tant coma tuti i l'oma da scoté 'l Crist, ⁶e nen mach për contenteje cand ch'av vardo, ma coma dij servitor dël Crist ch'a fan ëd tut cheur ël volèj 'd Nosgnor. ⁷Servije con piasì coma s'i servèisse 'l Signor e nen l'òm. ⁸Pensé che ognidun, ch'a sia servitor o padron, a 'rseivrà dal Signor l'arcompensa për ël bin ch'a l'avrà fàit^[5].

⁹E vojàutri ij padron, traté ij vòstri servitor ant l'istessa manera. Lassé da banda le mnasse. Pensé che tant lor coma vojàutri, i l'eve mach un padron^[6] ch'a fà gnun-a distinsion ëd përson-e^[7].

Esortassion për la guèra spiritual

¹⁰Dël rest, car ij mè frej e seur, fortificheve ant ël Signor e an soa forsa poderosa. ¹¹Arvestive dl'armadura che Nosgnor an dà për podèj fé front a la furbarìa dj'atach dël diav. ¹²Përchè an toca nen ëd combate contra 'd creature uman-e^[8], ma contra le potense e j'autorità, contra ij dominator ëd cost mond ëd top, contra jë spìrit malegn ch'a-i son ant le region dël cel.

¹³Buteve adòss, donca, l'armadura che Nosgnor an dà, parèj ch'i peusse arziste 'nt ij dì 'd gramissia e mantive ferm fin-a a la fin. ¹⁴Bogeve donca nen! Buteve ai fianch ël sënturon ëd la vrità^[9], arvestive con la corassa dla giustissia^[10]. ¹⁵Avèj 'd caussadure adate për andé a nunsié l'Evangeli dla pas^[11]. ¹⁶Pijè dzortut lë scu dla fede ch'av fasa paré le flecie anfiamà dël Malegn. ¹⁷Buteve an sla testa l'elm ëd la salvëssa^[12] e ciapé la spa dlë Spìrit, ch'a l'é la paròla 'd Nosgnor.

¹⁸Comsëssìa, elevé al Signor, ant lë Spìrit, vòstre preghiere, orassion e sùpliche; vijand con costansa e presentand vòstre intercession an favor ëd tut ël pòpol sant, ¹⁹e a an mè favor, përchè am sia dàit ëd parlé sèmper con franchëssa e con fiusa për fé conòsse 'l misteri dl'Evangeli ²⁰dont i son n'ambassador carià 'd caden-e. Preghé ch'i peussa parlé francament, coma ch'as deuv.

Conclusion

²¹Ora, për ch'i conòsse 'dcò voi la situassion anté ch'i son e lòn ch'i faso, a sarà Tichico^[13], nòstr frel amà e ministr fedel dël Signor, ch'av farà savèj tut. ²²I l'hai mandav-lo a pòsta pròpi përchè i l'abie 'd neuve da nojàutri e ch'ij vòstri cheur a na sio confortà^[14].

²³Che la pas a sia con la fradlansa, amor e fede da part ëd Dé, ël Pare, e 'd Gesù Crist, ël Signor. ²⁴Che la grassia a sia con tuti coj ch'a veulo bin a Gesù Crist, nòstr Signor inmortal. Amen.

Nòte

1. Cfr. Colossèis 3:20.
2. Cfr. Surtìa 20:12; Deuteronòmi 5:16.
3. O "esasperé", "irrité". Cfr. Colossèis 3:21.
4. O "second la carn".
5. Cfr . Colossèis 3:22-25.
6. Cfr. Colossèis 3:25; 4:1.
7. Cfr. Deuteronòmi 10:17; Colossèis 3:25.
8. O "carn e sangh".
9. Cfr. Isaia 11:5.
10. Cfr. Isaia 59:17.
11. Cfr. Isaia 52:7.
12. Cfr. Isaìa 59:17.
13. Tichico: cfr. At 20:4; 2 Timòt 4:12
14. Cfr. Colossèis 4:7-8.