La Bibia piemontèisa/Testament Neuv/Filipeis/Filipeis 1

←Efesin 6

La Bibia piemontèisa Filipèis

Filipèis 2→

Filipèis

1

La Bìbia piemontèisa - Filipèis 1

¹Pàul e Timòt, servitor ëd Gesù Crist, a tùit ij sant an Crist Gesù ch'a stan a Filippi^[1], ansema ai sovrintendent^[2] e ai diàcon. ²Grassia e pas a voi da Dé, nòst Pare e dal Signor Gesù Crist.

Preghiera për la cesa 'd Filippi

³I ringrassio mè Dé tute le vire ch'i faso mension ëd vojàutri. ⁴A l'é sèmper con gòj ch'i prego për tuti vojàutri an minca mia orassion, ⁵për càusa 'd vòstra partessipassion^[3] a l'Evangeli dal prim di fin-a a adess. ⁶I son sicur ëd sòn: che col ch'a l'ha anandiasse a fé 'n voi costa euvra bon-a, a-j darà compiment^[4] ant ël Di ëd Crist Gesù. ⁷A l'é mach giust ch'i penso parèj ëd tuti vojàutri, përchè i seve an mè cheur, sicoma che sia an mie caden-e^[5] che 'nt la difèisa e la confirmassion ëd l'Evangeli, tuti vojàutri i seve dventà mè compagn ant la grassia 'd Nosgnor. ⁸Nosgnor a l'é mè testimòni coma ch'a l'é përfonda l'afession ch'i l'hai an Crist Gesù për tuti voi. ⁹E i ciamo sta grassia, che vòstr amor a sia sèmper pì grand^[6] ant la conossensa e an ògni sòrt d'inteligensa^{[7] 10}parèj ch' i dësserne sèmper lòn ch'a l'é mej për vojàutri e sie pur e sensa rimpròcc, pront për ël Di dël Crist, ¹¹pien dël frut ëd la giustissia ch'a ven da^[8] Gesù Crist a la glòria e làude 'd Nosgnor.

Ël ministeri d'un përzoné

¹²I veui ch' i sapie, mè frej e seur, che le còse ch'a son rivame^[9] a son pitòst arzultà për l'avansament ëd l'Evangeli. ¹³Tuta la guàrdia imperial^[10] e tuti j'àutri a l'han savù ch' i son stàit butà an përzon^[11] për ël Crist, ¹⁴e pròpe a motiv ëd mie caden-e la pì part ëd nòstri frej e seur an Crist as ancalo adess a nunsié la Paròla con motobin ëd pì d’ardiman e sensa pàu.

¹⁵A l'é vera che cheidun a predica Crist mach për invidia e për fé 'd polémiche, ma d'àutri a lo fan ëd bon-a volontà, ¹⁶për amor, përché a san ch'i son ëstàit butà ambelessì për la difèisa dl'Evangeli. ¹⁷Ij prim, nopà, animà da në spìrit tachignos, a nunsio Crist për dij motiv ch'a son nen pur e mach con ël pensé 'd feme 'ncora pì tribulé 'nt mie caden-e. ¹⁸Am na fà gnente: an tute le manere, o për ostentassion o për amor ëd la vrità, Crist a l'é nunsià e 'd lòn im n'arlegro. Éh, i seguiteraj a arlegreme, ¹⁹përchè i sai che tut sòn a arzulterà an mia liberassion për ël mojen ëd vòstre preghiere e con l'agiut ëd lë Spìrit ëd Gesù Crist.

²⁰Mia speransa pien-a 'd fiusa a l'é ch'i l'avrai mai a vërgogneme, ma che 'd sicur Crist a sarà adess coma a l'é sèmper ëstalo, glorificà 'nt mè còrp, sia për la vita che për la mòrt. ²¹Për mi 'l vive a l'é Crist e 'l meuire a l'é 'n guadagn. ²²Ma s'a l'é ùtil për mia euvra ch'i seguito a vive 'nt ël còrp^[12], dabon i savrìa propi nen còsa serne. ²³I son pressà da le doe part: s'a fussa për mi, i sarìa bin pront a dëslogé e d'esse ansema a Crist. Costa-sì a sarìa la còsa motobin pì bon-a, ²⁴ma a l'é pì necessari për vojàutri ch'i resto 'nt ël còrp. ²⁵Dàit ch' i son sicur ëd lolì, i sai ch'i resterai e seguitrai a sté con tuti vojàutri për vòstr avansament e gòj ant la fede, ²⁶parèj che lòn ch'a fà vòstra fierëssa a peussa chërse an Crist Gesù për motiv ëd mi, cand ch'i artornaraj tra 'd vojàutri.

²⁷Comporteve mach an manera degna dl'Evangeli 'd Crist, parèj che tant ch'i ven-o e ch'iv vëdda coma ch'i ven-a pì nen, i senta ch' i ten-e dur ant un medésim ëspìrit e na sola ment e ch' i combate fianch a fianch për la fede dl'Evangeli, ²⁸sensa mai feve buté tëmma dai vòstri aversari. Cost-sì a sarìa 'n segn^[13] ëd soa distrussion^[14], ma për vojàutri un segn ëd salvëssa - un segn ch'a ven da Nosgnor. ²⁹Përchè a l'é stàit acordà a vojàutri nen mach ëd chërde al Crist, ma 'dcò 'd patì për chiel, ³⁰dàit ch'i sosten-e l'istess combatiment ch'i l'eve vëddume afronté e ch'i sente ch'i l'hai da afronté adess^[15].

Nòte^[1]

1. Cfr. At 16:12.
2. O "vësco", "sorveliant".
3. I cristian ëd Filippi a l'avìo sèmper sustnù l'Apòstol an sò ministeri ëdcò da la mira finansiaria.
4. O "a la rendrà përfeta", "completa".
5. O "detension".
6. O "bondos".
7. O "cognission", "disserniment".
8. O "për ël mojen ëd".
9. Mia situassion.
10. Let. "ël Pretòri".
11. Cfr. At 28:30.
12. Let. "Ant la carn".
13. O “na dimostrassion”.
14. O “perdission”.
15. Cfr. At 16:19-40.