La Bibia piemontèisa/Testament Neuv/Tito/Tito 2

←Tito 1

La Bibia piemontèisa Litra a Tito

Tito 3→

La Bìbia piemontèisa - Tito 2

Tito

2

Na condòta ch'a quadra con la san-a dotrin-a

¹Ma ti, Tito, sìe d'esempi^[1] con na manera 'd vive ch'a quadra con la san-a dotrin-a. ²Mostra a j'òm ch'a son d'età^[2] a controlesse, a esse degn ëd rispet^[3] e a vive da përsone sàvie. A l’han da avèj na fede san-a e esse amorèivol e passient. ³Dije 'd fé l'istess a le fomne ch'a son d'età: mostrje a vive an manera da onoré Nosgnor. A l’han nen da esse 'd malalenghe^[4] o 'd fomne ch'a-j piasa ‘d bèive tròp^[5]. Al contrari, a l’han da mostré a j'àutri a fé 'l bin. ⁴A l'é parèj che le fomne d'età a l’han da dressé le giovo a volèje bin ai sò marì e a soe masnà, ⁵a vive 'd manera savia, a esse pure, a pijesse soen dla cà, fé 'l bin, e sté an sogession ai sò marì. A l'é parèj ch'a porteran nen dëscrédit a la Paròla 'd Nosgnor. ⁶Fà l'istess con j'òm pì giovo: ciss-je a esse giudissios.

⁷Ti medèsim it l’has da ess-je d'esempi fasenda d'ògni sòrt d’euvre bon-e. Che tut lòn ch'it fas a rifleta l'integrità e la serietà 'd lòn ch'it mostre^[6]. ⁸Mostra la vrità parèj ch'a trovo nen da dì 'd toa dotrin-a. Antlora coj ch'an fan oposission a n'àbio vërgògna e a peusso dì gnente 'd mal ëd nojàutri.

⁹Ij servitor a l’han sèmper da fé ubidiensa ai sò padron e ‘d fé 'l mej ch'a peudo për contenteje e nen dëscontrarieje^[7]. ¹⁰Ch'a robo nen, ma ch'a sio dël tut degn ëd fiusa e sempe a disposission^[8]. A sarà antlora che për dabon a faran onor a la dotrin-a 'd Nosgnor, nòst Salvator.

¹¹La grassia 'd Nosgnor a l'é stàita 'rvelà për porté la salvëssa a d'ògni sòrt ëd gent. ¹²La grassia an dressa a arnunsié a cola vita ch'a fà gnun cont ëd Nosgnor^[9] e a le passion mondan-e^[10], perch'i vivo an ësto mond gram con sapiensa, giustissia e devossion anvers a Nosgnor ¹³antramentre ch'i spetoma con speransa col dì maravijos cand ch'a sarà arvelà la glòria 'd nòst grand Dé e Salvator, Gesù Crist. ¹⁴Chiel a l'ha dàit soa vita për liberene da ògni sòrt ëd pecà^[11], për purifichene e per rend-ne 'n pòpol, ël Sò^[12], un pòpol ch’a sia dël tut angagià a fé d’euvre bon-e.

¹⁵A l'é tut sòn ch'it l’has da fé, an cissand ij chërdent a fé autërtant. Ti 't l'has l'autorità për coregg-je cand ch'a l'é necessari. Për lòn, lass-je nen meprisé lòn ch'it dise.

Nòte

1. O "dimostra".
2. O " Ansian".
3. O "rispetàbil".
4. O "maldisent".
5. Beivande alcòliche.
6. O "ëd toa dotrin-a".
7. O "arbëcché", "nen fé 'd polémiche".
8. O "bon".
9. O "impietà".
10. O "ai piasèj ch'a son ëd pecà".
11. O "da ògni iniquità", cfr. Salm 130:8.
12. Cfr. Surtìa 19:5; Deuteronòmi 4:20; 7:6; 14:2; 2 Timòt 4:12.