La Bibia piemontèisa/Testament Neuv/Tito/Tito 1

←2 Timòt 4

La Bibia piemontèisa Litra a Tito

Tito 2→

La Bìbia piemontèisa - Tito 1

Tito

1

Salut

¹Pàul, servënt ëd Nosgnor e apòstol ëd Gesù Crist, mandà për ëmné coj che Nosgnor a l’ha sernù^[1] a la fede e a la conossensa dla vrità ch’a-j mostra coma vive për piasèj a chiel^[2]. ²Costa vrità a-j dà la fiusa^[3] ch'a l'han la vita eterna, cola che Nosgnor - ch'a peul pa dì 'l fàuss - a l'ha promëttù prima dla creassion dël mond. ³Ora, pròpi ant ël temp fissà, Nosgnor a l'ha arvelà 'l mëssagi ch’i nunsioma a tuti. A l'é për ël comand ëd Nosgnor, nòst Salvator, ch'a më stàit fidà cost travaj për chiel.

⁴A Tito^[4], mè fieul génit ant la fede ch'an fà sté 'n comunion l'un con l'àut^[5]. Che la grassia e la pas at sio dàite da Dé nòst Pare e da Gesù Crist nòst Salvator.

Ël travaj che Tito a l'ha da fé a Creta

⁵Ël motiv ch' i l'hai lassate a Creta a l'é përchè ti 't peussa porté a compiment ël travaj ch'i l'oma fàit ambelelà e, conforma a mie istrussion, nominé^[6] in minca sità dj'ansian ch'a l'abio la sovrintendensa dle comunità cristian-e.

⁶N'ansian a deuv esse inapuntàbil^[7], A deuv resté fedel a soa fomna^[8] e ij sò fieuj e fije a l’han da esse dij chërdent ch'a l'àbio nen l'arputassion d'esse dij sgairon^[9] o dësregolà^[10]. ⁷N'ansian^[11] a l'é 'l meinagé dla famija 'd Nosgnor. A l'é për lòn ch' a l’ha da esse n'òm a pòst, nen un ch' a agissa sensa prima penseje bin, nen fàcil a anrabiesse, nen un ch'a-j piasa tròp ëd bèive^[12], nen prepotent, nen àvid ëd sòld. ⁸Al contrari, n'ansian a deuv esse ëd bon-a cà^[13], dedicà a fé dël bin, savi, giust, divòt e ch'a sàpia controlesse. ⁹A deuv avèj na fede fòrta^[14] ant ël mëssagi^[15] fedel ch'a l'han mostraje, parèj ch'a peussa ancoragé j'àutri con la san-a dotrin-a e ch'a sàpia mostré a j'aversari andoa ch'a sio an eror^[16]. ¹⁰Përchè a-i na j’é tanti che a la san-a dotrin-a a veulo nen sogetess-ne^[17], ch'a parlo sensa cognission ëd càusa^[18] e mach për angabiolé, dzortut coj ch'a ansisto che për esse salvà a sia necessaria la sirconcision.

¹¹A coj-là a venta stopeje la bòca përché a slontan-o da la vrità ëd famije antreghe, an mostrandje lòn ch'a dovrio nen, e lolì mach për avejne 'd vantagi për lor midem. ¹²Fin-a un ëd lor, un profeta 'd Creta, a l'ha dit rësguard a coj-là: "Ij Cretèis a son sèmper ëd busiard, ëd bestie grame, galupon e poltron". ¹³Cola testimoniansa a l'é vera! Donca, arprocc-je con severità përchè a l'àbio na fede san-a. ¹⁴Lor a l’han da chité 'd dé da ment a le fàule dij Giudé e ai comandament ëd gent ch'a l'é slontanasse da la vrità.

¹⁵Tut a l'é pur për coj ch'a l'han ël cheur pur. Al contrari, gnente a l'é pur për coj ch'a l'han gnun-a fede e ch'a l'han mach vastà soa ment e soa cossiensa. ¹⁶Lor a diso 'd conòsse Nosgnor, ma a l'arnego con lòn ch’a fan^[19]. A son da detesté përchè ch’a disubidisso a Nosgnor e a son bon mach a fé 'd còse 'd gnun valor.

Nòte

1. O “ij sernù”.
2. O "ch'a l'é conform' a la pietà".
3. O "la speransa".
4. Cfr. 2 Corint 8:23; Galat 2:3; 2 Timòt 4:10.
5. O "fej comun".
6. O "stabilì".
7. O: esemplar, costumà, a pòst.
8. O: "marì d'una sola fumna".
9. O "dzubidient", o"dësbaucià".
10. O "ch'a peudo nen controlesse".
11. O: sovrintendent, vësco.
12. Ëd vin, un ciocaton.
13. O "ospital", n ch'arsèiv volenté la gent a soa cà.
14. O "ch'as ten-a ferm".
15. O "paròla 'd vrità".
16. O "corege coj ch'a-j parlo contra", "convince ij contraditor". 1:6-9 cfr. 1 Timòt 3:2-7.
17. Let. "rivoltos".
18. O "com' a ven a ven".
19. O “soe euvre”.