La Bibia piemontèisa/Testament Neuv/Timot/1Timot 4

←1 Timòt 3

La Bibia piemontèisa Litre a Timòt

1 Timòt 5→

La Bìbia piemontèisa - 1 Timòt 4

1 Timòt

4

Ij magister fàuss

¹Lë Spirit a dis ciàir che, ant ij dì darié, certidun as artireran da la vera fede e as faran ancanté da dë spirit anganamond e da dotrin-e diabòliche. ²A son mach ëd gent fàussa e busiosa ch’a l’ha na cossiensa cauterisà^[1].

³A parleran contra ‘l matrimòni, e ch’as deuv nen mangesse d’aliment che Nosgnor a l’ha bin creà përchè ij fedej, ch’a l’han conossù la vrità, a na pijo con arconossensa. ⁴An efet, tut lòn che Nosgnor a l’ha creà a l’é bon, e as s’ha da arfudé gnente s’as na mangia con arconossensa, ⁵përchè ch’a l’é santificà da la Paròla ‘d Nosgnor e da la preghiera.

Ël pastor, model për ij fedej

⁶S’it dëspieghe coste còse ai frej e a le seur, it saran un bon servidor ëd Gesù Crist, alimentà da le paròle dla fede e dla bon-a dotrin-a ch’it l’has fedelment andaje dapress. ⁷Sta gnanca a sente le faràbole dë sto mond^[2], cole ch’as conto dë 'dnans al feu^[3].

J’alenament da fesse a son coj ch’an fan dventé ‘d gent ch’a-j pias a Nosgnor^[4]. ⁸An efet j’esercissi dël còrp a servo a bin pòch, mentre che la divossion a Nosgnor^[5] a compòrta la promëssa ‘d vantagi tant për l’ancheuj che për l’avnì.

⁹Costa-sì a l’é na paròla sicura e degna ‘d fiusa compléta: ¹⁰nòstra speransa a l’é pogià ferma ant ël Dé ch’a viv, ch’a l’é col ch’a provëdd^[6] për tuti j’uman, dzurtut për ij chërdent. ¹¹Sossì a l’é lòn ch’it l’has da prediché e da mostré.

¹²Che gnun a l’abia da meprisete përchè it ses giovo; a l’opòst, ch’it sie për ij fedej un model ant ël parlé, ant la condòta, ant l’amor, ant la fede, ant l’onestà^[7]. ¹³Damentre ch’it ëspete che mi i ven-a da ti, angagg-te a la letura pùblica dle Scriture, a 'ncoragé ij chërdent e a ‘d dotrineje. ¹⁴Trascura nen ël don che Nosgnor a l’ha acordate e ch’it l’has arseivù për ël mojen ëd le paròle profètiche e dl’imposission ëd le man ch’a l’han fate j’ansian dla comunità. ¹⁵Pràtica tute ste còse con diligensa parèj che tuti a vëddo ij progrès ch’it fas. ¹⁶Pijete varda ‘d ti medésim e dla dotrin-a ch’it mostre. Sie përseverant, përchè an fasand lolì it salveras ti midem e it salveras coj ch’a të scoto.

Nòte

1. O “marcà da fer afoà”.
2. O “profan-e”.
3. O “conte dla nòna”, “conte dla mare granda”.
4. O “fà d’alenament a la pietà”.
5. O "dventé la gent ch’a-j pias a Nosgnor".
6. O “Salvator”; cfr. Maté 5:45; At 17:28.
7. O “purëssa”.