La Bibia piemontèisa/Testament Neuv/Corint/1Corint 1

←Roman 16

La Bibia piemontèisa Litre ai Corint

1Corint 2→

1 Corint

La Bìbia piemontèisa - 1 Corint 1

1

Salut

¹Pàul - ciamà a esse n'apòstol ëd Gesù Crist për volontà 'd Nosgnor - e Sòstene, nòst frel,

²a la cesa 'd Nosgnor ch'a l'é a Corint^[1], ai santificà an Gesù Crist, ch'i seve ciamà a esse sant, ansem a tuti coj che, qual ch'a sia 'l leugh anté ch'a sìo, a prego 'nt ël nòm ëd Gesù Crist, ël sò e 'l nòst Signor. ³Che la grassia e la pas av sio dàite da Dé, nòst Pare e dal Signor Gesù Crist.

Ringrassiament

⁴I ringrassio sèmper Nosgnor, mè Dé, për la grassia ch'a l'é stave dàita an Crist Gesù. ⁵Për sò mojen i seve stàit anrichì an tute le manere: ëd lòn a l'é na preuva vòstra eloquensa e vòstra sapiensa. ⁶Lolì a l'é la conferma che lòn ch'iv disìa dël Crist a l'é vera. ⁷Adess i l'eve arseivù da lë Spìrit tùit ij don ch'i l'eve damanca për cost temp-sì, ël temp ch'i speteve con granda anvìa l'artòrn^[2] ëd Nosgnor Gesù Crist. ⁸Chiel av darà 'dcò la fòrsa për ten-e dur fin-a a la fin, parèj che, ant ël Di 'd Nosgnor Gesù Crist, i sie trovà sensa rimpròcc. ⁹Sensa dubi chiel a lo farà, përchè Nosgnor a l'é fidel e a fà sèmper lòn ch'a promëtt: Nosgnor Dé a l'ha ciamave a esse an comunion con Sò Fieul Gesù Crist, nòst Signor.

Ëd division ant la cesa

¹⁰Iv suplico, mè frej e seur, ant ël nòm ëd Nosgnor Gesù Crist, ëd vive an armonìa l'un con l'àutr. Ch'a-i sio gnun-e division an tra 'd voi, ma ch'i vade d'acòrdi, i l'àbie 'l midem pensé e ij midem propòsit. ¹¹Përchè, mè frej e seur, coj ëd la famija 'd Cloe a l'han fame savèj che tra 'd vojàutri a-i é 'd polèmiche, ëd rivalità. ¹²I diso sòn përchè cheidun ëd voi a dis: "Mi i ten-o le part ëd Pàul", e d'àutri a diso: "Mi i ten-o le part d'Apollo^[3]", o "Mi 'd Pero", o ancora: "Mi i stago mach da la part dël Crist"! ¹³A-i é-lo fòrse 'd division ant ël Crist? A l'é nen stàit Pàul a esse stàit butà an sn'a cros për voi, nen vera? Sev-ne fòrse stàit batesà 'nt ël nòm ëd Pàul?  ¹⁴No! I ringrassio Nosgnor ch'i l'hai batesà gnun ëd vojàutri, foravìa che Crispo^[4] e Gaio^[5], ¹⁵e lolì përchè gnun a l'avèissa a dì d'esse stàit batesà an mè nòm. ¹⁶I l'hai bin ëdcò batesà la famija antrega dë Stefana^[6]. Dël rest, am ven nen an ment s'i l'hai batesà cheidun d'àutri. ¹⁷An efet, Crist a l'ha nen mandame për fé ‘d batésim, ma për nunsié l'Evangeli, e nen për ël mojen ëd discors ëd sapiensa, për tëmma che la cros dël Crist a perda soa potensa^[7].

Ël messagi ëd la cros

¹⁸An efet, un messagi ch'a parla dla cros^[8] a l'é considerà na ròba da mat da coj ch'a son an sla stra dla përdission, ma për nojàutri, ch’i soma an sla via dla salvassion^[9], a l'é la potensa 'd Nosgnor, ¹⁹da già ch'a l'é scrit: "I dësblerai la sapiensa dij savant^[10] e i rendrai inùtil l'inteligensa dj'anteligent^[11]". ²⁰Dov' é-lo 'l savant? Dov' é-lo col ch'as n'antend ëd la Lege 'd Mosé^[12]? Dov' é-lo 'l disputàire ëd cost mond^[13]? E'-lo nen vera ch’a l’é la sapiensa dë sto mond-sì che Nosgnor a l'ha rendula na ròba da mat^[14]? ²¹Dàit che Nosgnor, an soa sapiensa, a l'ha considerà che 'l mond a l'avrìa mai conossùlo për ël mojen ëd la sapiensa uman-a, chiel a l'ha avù la compiasensa 'd salvé coj ch'a chërdo për ël mojen ëd la "folairà" 'd lòn che nojàutri i predicoma^[15]. ²²A l'é na folairà për ij Giudé, ch'a ciamo mach 'd vëdde 'd segn miracolos dal cel^[16] e a l'é na folairà për ij Grech, ch'a serco mach ëd sapiensa uman-a. ²³Nojàutri, contut, i predicoma 'n Crist butà 'n cros, na ròba che për ij Giudé a l'é në scàndol e che për ij grech a l'ha gnun sens. ²⁴Nopà, për coj ch'a son ciamà a la salvëssa, tant ij Giudé che ij Grech, a l'é 'l Crist la potensa 'd Nosgnor e la sapiensa 'd Nosgnor. ²⁵La sapiensa 'd Nosgnor a l'é motobin pì savanta ëd la sapiensa uman-a e la dëbolëssa 'd Nosgnor a l'é pì fòrta che la fòrsa uman-a.

²⁶Pensé mach a chi ch'a j'ero coj ch'a l'han arseivù la ciamada^[17]: a j'ero nen tanti ch'a podèisso esse considerà - da la mira dë sto mond - dij savant, o d'autorità^[18]; nen tanti ch'a godèisso 'd na posission privilegià ant la società^[19]. ²⁷Ma Nosgnor a l'ha sernù pròpi lòn ch' ël mond a considera “da mat”, për ësvërgogné ij savant^[20]; Nosgnor a l'ha sernù pròpi lòn ch' ël mond a considera débol për ësvërgogné ij fòrt^[21]. ²⁸Nosgnor a l'ha sernù pròpi lòn che an ësto mond a l'é considerà 'd gnun cont e ch'a l'é meprisà, pròpi për rende sensa valor lòn^[22] ch' ël mond a considera 'd pèis, ²⁹parèj che gnun a peussa vantess-ne^[23] 'd cheicòsa dë 'dnans ëd Chiel.

³⁰Nosgnor a l'ha butave 'n comunion con Crist Gesù. Për nòstr benefissi Nosgnor a l'ha fàit che chiel midem a fussa nòstra sapiensa, giustissia, santificassion e redension, ³¹parèj che, coma ch'a l'é scrit: "Se cheidun a veul pròpi vantesse 'd cheicòsa, ch'as vanta^[24] ‘d Nosgnor".

Nòte

1. Cfr. At 10:1.
2. O "ch'as manifesta".
3. Cfr. At 18:24.
4. Cfr. At 18:8.
5. Cfr. At 19:29; Roman 16:23.
6. Cfr. 1 Corint 16:15.
7. O "parèj che la cros ëd Crist a vnissa inutil".
8. O "la paròla dla cros", "la dotrina dla cros", un mesagi ch'a parla dla virtù salvifica dla crocifission ëd Crist.
9. O "salv".
10. O "savanton".
11. Cfr. Isaìa 29:14.
12. Cfr. Giòb 12:17; Isaìa 19:12; 33:18.
13. O "Lòn ch'a podrio mai servì, an costi afé, ij filòsof, jë studià, j'espert disputàire ëd cost mond?".
14. Cfr. Isaìa 44:25.
15. O "la folairà dla predicassion".
16. O "miracoj", "segn miracolos".
17. O "vocassion", le circostanse 'd vòstra vocassion.
18. O "përsonagi 'd podèj".
19. O "nà ant la nobiltà".
20. Coj ch'a chërdo 'd savèj.
21. Coj ch'a chërdo d'esse fòrt.
22. Për dësvaluté, dësgonfié, rende veuid, inùtil.
23. O "gloriesse".
24. O "glòria". Cfr. Geremìa 9:24.