La Bibia piemontèisa/Testament Neuv/Roman/Roman 16

←Roman 15

La Bibia piemontèisa Roman

1Corint 1→

La Bìbia piemontèisa - Roman 16

16

Salùt përsonaj

¹Iv arcomando nòstra seur Febe, ch'a serv^[1] ant la cesa 'd Cencrea, ²përchè i l'arsèive 'd manera cristian-a^[2] coma ch'as confà ai sant e ch'i la giute an tut lòn che chila a l'avrà damanca, përchè a l'é stàita 'd grand agiùt a tanti, mi comprèis. ³Saluté Priscilla e Aquila^[3], mè agiutant^[4] an Gesù Crist, ⁴ch'a l'han butà soa vita a l'arzigh për mi. I son tant arconossent për lor, coma a lo son ëdcò tute le cese ch'a son nen d'origin ebràica^[5]. ⁵Saluté 'dcò la cesa ch'as radun-a 'nt soa ca. Saluté mè car amis Epainet, ch'a l'é stàit ël prim a esse convertì a Crist ant la provinsa dl'Asia. ⁶Saluté Marìa, ch'a l'ha motobin travajà për noi. ⁷Saluté Andrònico e Giunia, ij mè parent, ch'a son stàit an përzon ansema a mi. Lor a son motobin considerà da j'apòstoj e son dventà dij cristian anans^[6] che mi. ⁸Saluté Ampliat, mè car amis ant ël Signor. ⁹Saluté Urban, nòst compagn d'euvra an Crist, e mè bon amis Stachi. ¹⁰Saluté Apelle, ch'a l'é stàit aprovà 'n Crist. Saluté coj ch'as radun-o 'nt la ca 'd Aristòbolo. ¹¹Saluté Erodion, mè parent. Saluté coj ch'as radun-o 'nt la cà 'd Narcis, ch'a son ant ël Signor. ¹²Saluté Trifena e Trifòsa, ch'a travajo për ël Signor. Saluté mè car amis Perside, ch'a l'ha motobin travajà për ël Signor. ¹³Saluté Rufo^[7], ch'a l'è stàit sernù 'nt ël Signor, e sòa cara mare, ch'a l'é coma s'a fussa 'dcò la mia. ¹⁴Saluté Asincrito, Flegon, Ermes, Patrobas, Ermas, e ij frej e seur ch'a son ansema a lor. ¹⁵Saluté Filologo e Giulia, Nereo e soa seur, e Olimpia ansema a tùit ij chërdent ch'a son ansema a lor.

¹⁶Saluteve l'un l'àutr con un sant basin. Le cese 'd Crist av saluto.

¹⁷Ora, frej e seur, iv prego 'd pijeve guarda da coj ch'a son càusa 'd division e dë scàndoj contra la dotrin-a ch'i l'eve 'mprendù e dë slontaneve da lor. ¹⁸Përchè cola sòrt ëd gent a serv nen Nosgnor Gesù Crist, ma mach soa pansa 'd lor. Con ëd paròle dosse e d'adulassion a 'ncanto ij cheur dij malprudent. ¹⁹Vòstra ubidiensa a l'é conossùa da tùit e për lòn im arlegro. Tutun, i veuj ch'i sie giudissios për fé 'l bin e ch'i sìe nossent quant al mal.

²⁰Ora ël Dé dla pas a crasrà bin tòst Sàtana sota ij vòstri pé. Che la grassia 'd Nosgnor Gesù Crist a sia con voi.

²¹Timòt^[8], mè agiutant, av saluta, coma 'dcò a fan Lucio, Giason e Sosìpatro, ij mè parent.

²²Mi, Tersio, lë scrivan ëd sa litra, iv saluto 'nt ël Signor. ²³Gajo^[9], ch'a dà ospitalità a mi e a tota costa cesa, av saluta. Erasto^[10], ël tesoré dla sità e nòstr frel Quarto av salutan. ²⁴ [-].

²⁵Ora, tuta la gloria a vada a Nosgnor, col ch'a l'ha 'l podèj ëd rinforseve giusta com' a dis mè Evangeli. Cost messagi dzora Gesù Crist a l'ha 'rvelà Sò proget për vojàutri ch'i seve nen dël pòpol ebràich, un proget ch'a l'é stàit ëtnù segret për tant temp. ²⁶Ma ora, coma ch'a l'han fane la predission ij profeta e coma Nosgnor, l’Etern, a l'ha comandà, cost messagi a l'é stàit fàit conòsse a tuti ij pòpoj, parèj che 'dcò lor a peusso chërdje e ubidìje.

²⁷A Nosgnor, l'ùnich pien ëd sapiensa, ch'a-j vada la glòria për Gesù Crist, për sèmper. Amen.

Nòte

1. O "diaconëssa".
2. O "ant ël Signor".
3. Cfr. At 18:2.
4. O "colaborator".
5. O "le cese dle gent", o "d'origin pagan".
6. O "ch'a son stàit an Crist".
7. Cfr. March 15:21.
8. Cfr. At 16:1.
9. Cfr. At 19:29; 1 Corint 1:14.
10. Cfr. 2 Timòt 4:20.