La Bibia piemontèisa/Testament Neuv/March/March 15

←March 14

La Bibia piemontèisa Vangeli 'd March

March 16→

March

La Bìbia piemontèisa - March 15

15

Gesù dë 'dnans a Pilàt

¹Peui, a lë sponté dël sol, ij gran sacerdòt con j’ansian, ij magìster ëd la Lege e tut ël Sinèdrio, a l’han tnù consèj për acordesse su lòn ch’a l’avìo da fé. A l’han fàit ëstaché Gesù, a l’han ëmnalo vìa e a l’han dalo 'nt le man ëd Pilàt, ël governator roman.

²Pilàt a l’ha anterogalo ciamandje: “Ses-to ‘l rè dij Giudé?”. E Gesù a l’ha rësponduje: “It lo dise ti”^[1]. ³Ora, ij gran sacerdòt a lo acusavo ‘d diverse còse, ma chiel a-j rëspondìa nen. ⁴Anlora Pilàt a l’ha torna anterogalo, disandje: “Rëspondes-to nen? Varda vàire ch’a son le acuse ch’at fan!” ⁵Ma Gesù a l’ha dije ancora gnente, e Pilàt as na stupìa motobin.

Gesù condanà a mòrt

⁶Ora, minca n’ann, për la festa ‘d Pasca, Pilàt a l'era soa costuma liberé un përzoné, qualsëssìa ch’a-j ciamèisso. ⁷A-i në j’era un për nòm Baraba, ch’a l’era stàit ciapà e butà an përzon con ij sò compare për na sedission e che, an cola ocasion-lì, a l’avìa comëttù n’amassidi. ⁸Ël pòpol, an crijand a gran fòrsa, a l’é butasse a ciamé a Pilàt ch’a fèissa coma ch’a l’avìa sèmpe fàit: visadì liberé ‘n përzoné.

⁹Pilàt a l’ha rësponduje an disand: “Veuleve ch’iv lasso lìber ël rè dij Giudé?”. ¹⁰Pilàt a disìa parèj përchè ch’a savìa pro bin che ij gran sacerdòt a l’avìo dajlo 'nt le man për invidia. ¹¹Ma ij gran sacerdòt a l’han cissà ‘l pòpol ch’a ciamèisso pitòst la libertà ‘d Baraba. ¹²Pilàt, rëspondendje, a l’ha ancora dije: “Còsa ch'i veule, donca, ch’i faso ‘d col ch’i ciame ‘l rè dij Giudé?”. ¹³E a son tornasse a buté a crijé: “Butelo an cros!”. ¹⁴Anlora Pilàt a l’ha dije: “Ma che mal a l'avrìa mai fàit, Gesù?”. E lor a l’han crijà ancora pì fòrt: “Butelo an cros!”. ¹⁵Pilàt, donca, ch’a vorìa contenté ‘l pòpol, a l’ha donca liberaje Baraba, e apress d’avèj fàit foëtté Gesù, a l’ha consegnalo ai soldà përch’ a fussa 'nciodà a na cros.

Le schergne dij soldà a Gesù

¹⁶Anlora ij soldà a l’han ëmnalo 'nt la cort, ch’a l’é ‘l pretòri (la residensa dël governator) e a l’han convocà tut ël distacament. ¹⁷A l’han vestilo ‘d na vesta ‘d pórpora, a l’han fàit na coron-a dë spin-e antërsà e a l’han butajla an sla testa. ¹⁸Peui a l’han comensà a feje 'd salut për schergna, disandje: “Salve, rè dij Giudé!”. ¹⁹E a-j dasìo an sla testa con na cana, a jë scraciavo adòss e, butand-se an ginojon dë 'dnans a chiel a-j fasìo ‘d riverense. ²⁰Cand ch’a l’han avune pro ‘d mincionelo, a l’han gavaje la vesta ‘d pórpora, a l’han butaje torna adòss soe vestimente e a l’han ëmnalo fòra për tachelo an sna cros.

Crosifission ëd Gesù

²¹N’òm ch’a passava da lì e ch'a tornava da la campagna, a l’han obligalo a porté chiel për un pò la cros ëd Gesù. A l'era 'n tal Simon ëd Cirene, pare ‘d Sander e ‘d Rufus^[2]. ²²Parèj a l’han ëmnà Gesù 'nt ël leugh ch’a së s-ciama Gòlgota, ch’a veul dì “Leugh dël Crànio”. ²³A l’han ësmonuje da bèive ‘d vin mës-cià con ëd mira, ma a l’ha nen vorsune.

²⁴Apress d’avèj anciodà Gesù a la cros, a son dividusse soe vestimente, gieugand-sje ai dà për vëdde lòn ch’a-j tocava a minca un ëd lor^[3]. ²⁵A l’era neuv ore dla matin cand ch’a l’han butalo an cros. ²⁶A l’han ëdcò butà dzora sla cros un cartel andoa ch’a l’avìo scrivuje la càusa ‘d soa condan-a, visadì: “Sto-sì a l’é ‘l rè dij Giudé”. ²⁷Con chiel a l’han ëdcò crosifià dòi brigant, un a soa drita e l’àutr a soa mancin-a. ²⁸A l’é compisse parèj la Scritura ch’a dis: “A l’han butalo 'nt ij rangh dij malfasent^[4]”.

²⁹Coj ch’a passavo da lì davzin a-j fasìo d’ingiurie, sopatand la testa^[5] e an disand: “E ti, ch’it l’avìe da dësblé ‘l Templi e ch’it l’avrìe butalo torna ‘n pé an tre di^[6], ³⁰salv-te da ti midem, e cala giù da la cros!”.

³¹L’istess a-j fasìo dë schergne ij gran sacerdòt ansema ai magìster ëd la Lege, e a disìo: “A l’ha salvà d’àutri e a peul nen salvesse chiel midem! ³²Che ‘l Crist, ël rè d’Israel a cala giù adess da la cros, përchè i lo vëddoma e ch’i-j chërdoma!”. Ëdcò coj ch’a j’ero stàit butà a 'd cros dacant a la soa a j'adressavo paròle d’ofèisa.

Mòrt ëd Gesù

³³Rivà ch’a l’era mesdì, a l’é calaje ‘l top su tut ël pais fin-a a tre bòt dël dòp-mesdì. ³⁴Peui, a tre bòt, Gesù a l’ha crijà con tuta la fòrsa ch'a l'avìa, disand: “Eloì, eloì, lemà, sabactanì?” - che, voltà, a veul dì “Mè Dé, mè Dé, përchè has-to chitame^[7]?”. ³⁵E cheidun ëd coj ch’a l’ero lì present,, cand ch'a l'han sentì cole paròle, a l’han capì n’àutra ròba e a l’han dit: “Varda ‘n pò: a ciama Elia”. ³⁶Anlora cheidun a l’é corù, a l’ha ampinì na sponga d’asil^[8] e, avend-la butà ansima a na cana, a l’ha sporzujla përchè ch’a në beivèissa, disand: “Lassé, vëddoma s’a ven Elìa për gavelo da la cros!”.

³⁷Ma Gesù, avend fàit un gran crij a l’é spirà. ³⁸Ant col moment-lì 'l grand ridò dël Templi^[9] a l’é s-ciancasse an dòi, da l’àut an bass.

³⁹Ël centurion, ch’a stasìa dë 'dnans a chiel, cand ch’a l’ha vëddù la manera coma che Gesù a l’era spirà, a l’ha sclamà: “A l’é vrità: sto-sì a l’era për dabon ël Fieul ëd Nosgnor!”.

⁴⁰A-i j'era ‘dcò ansilì ‘d fomne ch’a vardavo da lontan. An tra ‘d lor a-i era Marìa Madlen-a, e Maria, mare ‘d Giaco ‘l minor, e ‘d Giusèp, e Salòme. ⁴¹Coste fomne a j'ero andaje dapress a Gesù cand ch’a l’era an Galilea e a lo cudìo. A-i j'era ‘dcò ansilì diverse d’àutre fomne ch’a l’ero montà con chiel a Gerusalem^[10].

Sepoltura 'd Gesù

⁴²Tut sòn a l’é capitaje ‘d vënner, ël di dla preparassion, ël di anans dël di d’arpòs dël Saba. Cand ch’a l’é rivà la sèira, ⁴³Giusèp d’Arimatèa, mèmber ëd distinsion dël Sinèdrio, ch’a spetava ‘dcò ‘l Regn ëd Nosgnor, a l’é fasse coragi, a l’é andàit da Pilàt e a l’ha ciamaje ‘d podèj avèj ël còrp ëd Gesù. ⁴⁴Pilàt a l’é stupisse che Gesù a fussa già mòrt, e avend ciamà ‘l centurion, a l’ha ciamaje s’a l’era pròpi parèj. ⁴⁵Avend-lo sentù ‘dcò dal centurion, a l’ha consentì a Giusèp ch’a pijèissa pura ‘l còrp ëd Gesù. ⁴⁶ Parèj, Giusèp a l’ha catà un linseul, a l’ha calà da la cros ël còrp ëd Gesù, a l’ha anvlopalo con ël linseul e a l’ha butalo 'nt na balma funeraria ch’a l’avìa fàla tajé 'nt la ròca^[11]. Peui a l’ha fàit robaté na pera granda dë 'dnans a l’intrada dël sepolcr. ⁴⁷Maria Madlen-a e Marìa la mare ‘d Giusèp, a beicavo andoa che Giusèp a lo butava.

Nòte

1. Cfr. https://sites.google.com/site/bibiapiemonteisa/dissionari-biblich/ges-e-pilt
2. Cfr. Roman 16:13.
3. Cfr. Salm 22:18.
4. Cfr. Isaìa 53:12.
5. Cfr. Salm 22:7; 109:25.
6. Cfr. March 14:58; Gioann 2:19.
7. Cfr. Salm 22:1.
8. Cfr. Salm 69:21.
9. Cfr. Surtìa 26:31-33.
10. 15:40-41 cfr. Luca 8:2-3.
11. A l'é probàbil ch'a fussa già stàita destinà a soa famija.