La Bibia piemontèisa/Testament Vej/Malachia/Introdussion
Introdussion modifiché
A smija probàbil che 'l lìber dìt ëd Malachia a sia anònim. A l'é stait atribuì a Malachìa cand ch'a l'han antërpretà coma nòm pròpi l'espression ch'a parëss an 3:1 ( מַלְאָכִי (malʾachi) che, an ebràich a veul dì "mè mëssagé". Cost profeta a compiss soa mission dontré desene d'agn apress l'arcostrussion dël Templi, ëvnùa dal 520 al 515 për l'euvra dj'Israelita ch'a j'ero artornà da l'esili, cissà dai profeta Agé e Sacarìa.
Le speranse che costi dòi profeta a l'avìo anviscaje a l'ero ancora nen realisà e 'n dëscorament a l'avìa sagrinà j'Israaelita. Ij servissi divin a l'ero stàit ristabilì ant ël Templi già da vàire agn, ma ij sacerdòt a-j compìo con lòira. Fasend parèj, lor a slontanavo j'Israelita da l'osservansa dla Lege 'd Nosgnor. Për conseguensa a vnisìo 'dcò pì fiache j'espression ëd solidarietà e fraternità an tra 'l pòpol. Ël profeta a reagiss a costa situassion.
Ël profeta a denunsia la faussarìa e la trascuransa dij sacerdòt e 'l comportament ëd la gent ch'a viv nen conform a lòn che Nosgnor a comanda. J'arcòlt gram a son, për ël profeta, na marca dël giudissi 'd Dé. Chiel, an efet, a l'é 'n camin a 'nterven-e contra tuti coj ch'a pràtico l'idolatrìa e l'angiustissia e a rispeto pa Nosgnor con na vita contraria a soa lege. Tutun, coj ch'a artorneran a chiel e a faran ubidiensa ai sò comandament a saran benedì.
Dé a l'é 'n camin a mandé 'n mëssagé për pronté la stra për soa vnùa e proclamé l'aleansa con sò pòpol. Ëdcò an cost lìber as parla dël Di 'd Nosgnor ch'a sarà precedù da l'artorn dël profeta Elia (3:22-24)..
L'anvit dël profeta 'd prontesse a rëscontré Nosgnor a val për la gent ëd tùit ij temp. Ant ij vangèj l'anonsi d'un mëssagé ch'a pronta la strà a Nosgnor a sarà arpijà e arferì a Gioann Batista (cfr. Maté 11:10; 17:11-13; Luca 1:17; 7:27; March 1:2).