La Bibia piemontèisa/Testament Vej/Salm/Salm 8

←Salm 7

La Bibia piemontèisa Salm

Salm 9→

Ij Salm

La Bìbia piemontèisa - Salm 008

8. Nosgnor, nòst Sovran

An cost imn al sovran creator, l’autor a làuda la maestà ‘d Nosgnor e as maravija che Nosgnor a l’abia dàit a l’umanità ‘d podèj dominé an sla creassion.

¹Për ël magìster dël còro: un Salm ëd David da companiesse con n’istrument a còrda. Nosgnor! Nòst Sovran! Tò nòm maestos a ampiniss la tèra. Toa glòria a l’é pì àuta dël cél! ²Ti 't l'has mostrà ai cit e a le masnà a conté 'd toa fòrsa^[1] për fé sté ciuto ij tò nemis e tuti coj ch'at fan oposission. ³Cand ch’i vardo ‘d neuit al cel steilà e ch’i vëddo l’euvra ‘d toe man, la lun-a e le stèile ch’it l’has butaie, ⁴i’m diso: “Còsa mai ch’a l'é l'òm përché ti 't l’àbie d’arcordete ‘d chiel? Còsa mai ch’a son ij mortaj përchè ti ’t l’àbie da tenje an considerassion^[2]? ⁵Pura, it l’has faje nen tant da meno che j’àngej^[3], it l’has coronaje ‘d glòria e d’onor. ⁶It l’has fàit ch’a podèisso dominé toa creassion: it l’has butà tut ai sò pé ‘d lor^[4]; ⁷jë strop e le mandrie e tute le bestie sarvaje; ⁸j’osej ant ël cel, ij pëss dël mar, e tut lòn ch’a nóva ant ij senté dj’ocean. ⁹Nosgnor! Nòst Sovran: tò nòm maestos a ampiniss la tèra!

Version ëd Pinuccia Gamba

SALM 8 - GLÒRIA ’D DÉ E DIGNITÀ DL’ÒM -
Salm ëd Dàvid


Òh Tut Potent, nòst Dé,
coma ch’a l’é grand tò nòm su tuta la tèra!
Toa glòria fonga le rèis ant ij cej!

Da la boca dle masnà, e dij puparin,
a s’àussa ’na làuda
contra ’d chi ch’a t’ha ’n ghignon,
e përparèj a taso ij nemis, j’aversari.

Cand ch’i resto ’nciarmà dnans ai tò cej,
euvra dle toe man,
la lun-a e le stèile che it l’has sëmnà lassù,
im ciamo: lòn ch’a l’é mai l’òm
përché ti ’t n’arcòrde ’d chiel,
e ’l fieul ëd l’òm
përché it l’abie ansì a cheur?
It l’has falo ’d tantsìpòch anferior a j’Àngej,
it l’has soagnalo ’d glòria e dë splendor,
it l’has daje podèj sl’euvra ’d toe man,
e it l’has butà tui ai sò pé:
jë strop e tute le màndrie,
e ’dcò le bestie ferose dij grand bòsch,
j’osej dël cel e ij pess dël mar,
e tut lòn che a viv
ant ël creus dël creus dël gran mar.

Òh Tut Potent, nòst Dé,
coma a l’é grand tò nòm su tuta la tèra!

Nòte

1. Cfr. Maté 21:16.
2. Cfr. Giòb 7:17-18; Salm 144:3; Ebreo 2:6-8.
3. O “Dé” “Nosgnor”.
4. Cfr. 1 Corint 15:27; Efesin 1:22; Ebreo 2:8.