La Bibia piemontèisa/Testament Neuv/Efesin/Efesin 1

←Galat 6

La Bibia piemontèisa Litra a j'Efesin

Efesin 2→

Efesin

1

La Bìbia piemontèis - Efesin 1

Salut

¹Pàul, apòstol ëd Gesù Crist për volèj ëd Nosgnor, ai sant ch'a son a Efeso^[1], fidej dissépoj ëd Gesù Crist. ²Che la grassia e la pas av sio dàite da Dé nòst Pare e dal Signor Gesù Crist.

Benedission ëspirituaj an Crist

³Ch'a sìa benedèt Nosgnor Dé, Pare 'd Nosgnor Gesù Crist, ch'a l'ha benedine d'ògni benedission ëspiritual dël cel an Crist, ⁴përchè chiel a l'ha sernune an Crist anans ëd la fondassion dël mond, parèj ch'i fusso sant e sensa rimpròcc dë 'dnans ëd chiel ant l'amor^[2]. ⁵Nosgnor a l'ha falo cand ch'a l'ha predestinane a l'adossion coma ij sò arditè legaj^[3] për ël mojen ëd Gesù Crist, conform a la compiasensa 'd sò volèj, ⁶a làuda dla glòria 'd soa grassia, cola che chiel a l'ha acordane an sò Fieul bin amà^[4].

⁷An chiel i l'oma la redension për sò sangh^[5], ël përdon dij nòstri pecà second le richësse 'd soa grassia^[6], ⁸cola ch'a l'ha dane sensa fé economìa^[7] con ògni sapiensa e inteligensa. ⁹Nosgnor a l'ha falo cand ch'a l'é compiasusse 'd fene conòsse 'l misteri 'd sò volèj, col ch'a l'avìa proponusse 'd realisé^[8] an Crist. ¹⁰Sossì a l'é 'l proponiment: cand che 'l temp adat^[9] a fussa rivà, chiel a l'avrìa arcapitolà^[10] tut an Crist, tant lòn ch'a-i é 'nt ij cej, che lòn ch'a l'é an sla tèra. ¹¹An Crist, ëdcò nojàutri i soma stàit reclamà^[11] coma 'd gent ch'a j'aparten^[12], dàit ch'i soma stàit predestinà conform al propòsit ëd col ch'a compiss ògni còsa second ij sò proget^[13], ¹²parèj che nojàutri, ch'i soma stàit ij prim a speré an Crist, i l'avèisso portà 'd làude e 'd glòria a Nosgnor^[14].

¹³A l'é për lòn che cand ch'i l'eve sentù la paròla dla vrità, l'evangeli 'd vòstra salvassion, e ch'i l'eve chërdù an Crist, i seve stàit marcà con ël cacèt ëd lë Spìrit Sant ch'a l'era stàit promëttù^[15]. ¹⁴A l'é chiel la capara^[16] 'd nòstra ardità, fin-a a la redension complèta 'd lòn ch'a aparten a Nosgnor, a làuda 'd soa glòria^[17].

Preghiera për saviëssa e arvelassion

¹⁵Për costa rason, përchè i l'hai sentù 'd vòstra fede 'nt ël Signor Gesù e dl'amor ch'i l'eve për tut ël pòpol sant, ¹⁶i chito mai 'd rende grassie, an mie orassion, për tuti vojàutri. ¹⁷I prego për che 'l Dé 'd Nosgnor Gesù Crist, ël Pare glorios, av daga 'd saviëssa spiritual e d'arvelassion për conòss-lo sèmper mej^{[18] 18}dàit che j'euj ëd vòstr cheur a son ëstàit anluminà - parèj ch'i conòsse la speransa 'd Soa vocassion, la richëssa dla gloriosa ardità che ij sant a 'rseivran, ¹⁹e cola ch'a sìa la grandëssa fòra dë mzura 'd soa potensa, anvers ëd noi ch'i chërdoma, coma ch'a l'é mostrà 'nt l'esercissi ëd soa inmensa fòrsa. ²⁰Costa potensa Nosgnor a l'ha manifestala an Crist, cand ch'a l'ha arsussitalo dai mòrt e a l'ha falo asté a soa drita 'nt ij cej^[19], ²¹an àut, tant pì dzora d'ògni prinsipà, potensa, dignità, dominassion, e dzora d'ògni nòm ch'as peussa nominesse, nen mach an cost temp-sì^[20], ma 'dcò an coj ch'a l'han da rivé. ²²An efet, Nosgnor a l'ha butà^[21] tute le còse sota ai pé dël Crist^[22], e a l'ha stabilìlo an su tute le còse për esse 'l cap ëd la Cesa^[23]. ²³An efet, la Cesa a l'é sò còrp, ël compiment ëd col ch'a ampiniss tut con soa presensa^[24].

Nòte

1. Efeso: cfr. At 18:19-21; 19:1.
2. O "për l'amor".
3. O "fieuj". Ël tèrmin grech υἱοθεσία (huiothesia) a l'era 'n tèrmin tecnich legal tacà a l'adossion ëd fieuj con ël pien drit a l'ardità.
4. O "ch'a tant a-j veul bin", let. "Sò Dilet".
5. An ësto contest, Sò sangh, ël sangh ëd Gesù Crist, as arfà al pressi pagà për la redension dij cristian, visadì la mòrt sacrifical ëd Crist an sla cros.
6. Cfr. Colossèis 1:14.
7. O “sensa mzura”.
8. O "ch'a l'ha manifestà"
9. O "ël compiment dij temp". A l'é Nosgnor ch'a l'ha la "gestion" o "l'aministrassion" dla stòria e cand che Chiel a decid ch' ij temp a saran mur, a sugetrà tut a Crist, coma "cap" d'ògni còsa.
10. O "riunì", "cheuje ansema".
11. O "arvendicà".
12. O "Soa ardità".
13. O "ël consèj ëd sò volèj".
14. O "a fusso a la làude 'd Sòa glòria".
15. O "dla promëssa".
16. O "l'anticip", "l'ara".
17. Ël dì dël compiment final ëd nòstra salvëssa, ël dì anté Nosgnor a tornerà a esse padron ëd lòn ch'a l'é Sò, visadì nojàutri chërdent.
18. O "an na conossensa chërsent ëd Chiel".
19. Cfr. Salm 110:1.
20. O "secol", "era".
21. O "sogetà".
22. Cfr. Salm 8:6.
23. Cfr. Colossèis 1:18.
24. O "ch'a compiss tut an tùit".