La Bibia piemontèisa/Testament Neuv/Galat/Galat 6

←Gàlat 5

La Bibia piemontèisa Galat

Efesin 1→

La Bìbia piemontèisa - Galat 6

Galat

6

La lege dël Crist

¹Car ij mè frej e seur, se n’àutr an tra 'd voi a tomba ant na chèich fota, vojàutri, chi l’eve arseivù lë Spìrit^[1], giutelo a tiresse torna sù con në spìrit ëd dosseur, e pensé che 'dcò vojàutri midem i podrìe tombé ant na tentassion parija. ²Giuteve a porté ij carich j’un dj’àutri: a l’é parèj ch’i compisse la lege dël Crist. ³Se cheidun as chërd d’esse cheicòsa, bin ch’a sia gnente, a s’angan-a da chiel midem. ⁴Ciaschëdun a l’ha da esaminé bin soa condòta: antlora la càusa për gloriesse a la treuvrà an chiel midem, sensa dovèj comparisionesse a d’àutri, ⁵përchè ognidun a l’ha da porté ël pèis ëd soa vita.

⁶Coj ch’a arsèivo j' istrussion ëd la paròla ‘d Nosgnor a l’han da provëdde për coj ch’a-j la mostro, fasend part dij sò beni con lor. ⁷Anganeve nen: Nosgnor a peul nen pijesse an gir. Lòn che un a sëmna a l’é 'dcò lòn ch’a cheujerà. ⁸Col ch’a sëmna ant ël camp dj’anvie carnaj, a cheujerà la perdission ch’a ven da coste anvìe, ma col ch’a sëmna ant ël camp ëd lë Spìrit, a cheujerà la vita eterna ch’a ven da lë Spìrit. ⁹Stracom-se nen ëd fé ‘l bin, përchè s’is lassoma nen ëstraché, cand ch’a rivrà 'l temp i cheujeroma. ¹⁰Stracom-se nen ëd fé dël bin, përchè s’is lassoma nen ëstraché, cand ch’a rivrà ‘l temp i n'avroma l'arcòlt. Parèj, donca, damentré ch’i n’oma 'l temp, foma dël bin a tuti, ma dzortut a coj ch’a son ëd la famija dla fede.

Conclusion

¹¹Armarché con che létere gròsse i l’hai scrivù coste paròle: a son pròpi ëd mia man. ¹²A l’é mach për fé bela figura dëdnans a j’àutri^[2] ch’a vorìo forseve a ch’i sie sogetà a la sirconcision. Soa ùnica intension ëd lor a l’é d’esse nen përseguità për càusa dla cros ëd Crist. ¹³An efet, coj midem ch’a pratico la sirconcision a osservo nen tuta la Lege. Lor a vorìo ch’i sie sogetà a la sirconcision për podess-ne vanté e dì che vojàutri i seve ij sò dissépoj. ¹⁴Për lòn ch’am riguarda, che mi i l’abia 'd vanteme mach ëd la cros ëd Nosgnor Gesù Crist. Për motiv ëd la cros, mè anteresse an cost mond a l’é stàit butà an cros, e l’anteresse che 'l mond a l’ha për mi a l’é 'dcò mòrt. ¹⁵Përchè a conta pròpi gnente d’esse stàit sogetà a la sirconcision o nò; a conta mach ch’i soma na neuva creassion.

¹⁶Che la pas e la misericòrdia a sio dzora 'd tuti coj ch’a vivo confòrm a sto prinsipi-si: a son lor l’Israel ëd Nosgnor. ¹⁷Da ora anans, che gnun am daga pì nen fastidi, përchè i pòrto an mè còrp le marche dle ferije ch’a mostro ch’i apartnisso a Gesù Crist.

¹⁸Car ij mè frej e seur, che la grassia 'd Nosgnor Gesù Crist a sìa con vòstr ëspìrit. Amen!

Nòte

1. O “chi seve spirituaj”.
2. O “për dij motiv carnaj”.