La Bibia piemontèisa/Testament Vej/Salm/Salm 79

←Salm 78

La Bibia piemontèisa Ij Salm

Salm 80→

Salm

La Bìbia piemontèisa - Salm 079

79. A l’é vnùa n’invasion ëd gent pagan-a e a son pijasse la tèra

Costa-sì a l’é la plenta ‘d n’Israelita ch’a l’é stàit testimòni d’invasion ëd potense forëstere ant la tera dla promëssa e ch’a l’han dëstruvù la sità ‘d Gerusalem e ‘l templi 'd Nosgnor. A ciama a Nosgnor ch’a përdon-a sò pòpol e ch’a sversa soa arvangia ansima a coj ch’a l’han maltrataje.

¹Un Salm d’Asaf. Nosgnor! A l’é vnùa n’invasion ëd gent pagan-a e a son pijasse la tèra ch’it j’ere arservate për ti^[1]. A l’han dëssacrà^[2] tò templi e a l’han fàit ëd Gerusalem un camp ëd ruin-e^[3]. ²A l’han massà ij tò sërvent e a l’han lassane ij còrp spatarà da sì e da là përchè a-j mangèisso j’osej. La carn ëd coj ch’at j’ero fedej a l’é dventà ‘l nutriment ëd le bestie sarvaje. ³Tut d’antorn a Gerusalem ël sangh a scor tanme d’eva; a-i é pì gnun ch’a peussa sotré ij nòst mòrt. ⁴Nòstri vzin an fan le svergne; i soma dventà la sbefia e la burla dij pais ch’an stan dantorn,

⁵Nosgnor! Fin-a a cand saras-to anrabià con nojàutri? Për sèmper? Fin-a a cand toa gelosìa a brusrà tanme ‘d feu?

⁶Arvërsa toa zara contra le nassion ch’a s’arfuso d’arconòss-te - ans ëd regn ch’at prego nen^{[4] 7}përchè a l’han angorgionasse tò pòpol Israel e a l’han fàit ëdventé nòstra tèra tanme ‘n desert. ⁸Arciãmte pì nen a la ment ij pecà dij nòstri antich! Tarda pa a d’avèj compassion ëd nojàutri, ch’i soma rivà a la dësperassion! ⁹Giùtne, Nosgnor ëd nòstra salvëssa! Sàlvne e përdon-a ij nòstri pëccà për la glòria ‘d tò nòm.

¹⁰Përchè j’àutre nassion a l’avrìo da dì: “Andoa ch’a l’é sò Dé ‘d lor?”. Dà sfògh a toa arvangia contra le nassion, përchè ch’a l’han vërsà ‘l sangh dij tò sërvent. ¹¹Scota le plente dij përzoné. Fane vëdde tò gran’ podèj ant la salvëssa ‘d coj ch’a son condanà a mòrt.

¹²Nosgnor! Fé spurghé ij nòstri vzin set vire për le svergne ch’a l’han adressate. ¹³Antlora nojàutri, le feje dle strop che ti it pasture, it ringrassieroma për sèmper e i laudroma toa grandëssa da generassion a generassion.

Nòte

1. Let. “ch’a l’é toa ardità”.
2. O “profanà”
3. Cfr. 2Rè 25:8-10; 2 Crònache 36:17-19; Geremìa 52:12-14.
4. O “ch’a 'nvòco nen tò Nòm”.

---