La Bibia piemontèisa/Testament Vej/Salm/Salm 115

←Salm 114

La Bibia piemontèisa Ij Salm

Salm 116→

La Bìbia piemontèisa - Salm 115

Ij Salm

115. Pa a nojàutri, Nosgnor, pa a nojàutri, ma a tò nòm dà glòria

Ël salmista a fortiss che ‘l Dé d’Israel a l’é tut d’àutr che j’ìdoj che ij pagan a-j rendo l’adorassion: coj-lì a son ël prodòt ëd le man ëd l’òm, mentre che Nosgnor a l’é ‘l Signor dël cel e dla tèra.

¹Pa a nojàutri, Nosgnor, pa a nojàutri, ma a tò nòm dà glòria, për toa misericòrdia e vrità. ²Le gent an diso: “Andova ch’a stà vostr Dé?”. ³Nòst Dé a l’é ant ij cej e a fà tut lòn ch’a veul. ⁴Le mistà dle gent a son mach d’argent o d’òr, l’euvra dle man ëd cheidun. ⁵A l’han na boca, ma a peulo nen parlé; a l’han dj’euj, ma a peulo nen vëdde. ⁶A l’ha dj’orije, ma a peulo nen sente; a l’han le nariss, ma a peulo nen nufié. ⁷A l’han ëd man, ma peulo nen toché; a l’han dòi pé, ma a peulo nen marcé; e na gola, ma a peulo pa dé ‘d son. ⁸Coj ch’a-j fàbrico e coj ch’as confido an lor a son veuid dl’istessa manera^[1].

⁹Vojàutri, Israel, confidé an Nosgnor! A l’é chiel col ch’av giuta e av goerna^[2]. ¹⁰Vojàutri ij sacerdòt, dëssendent d’Aron, confidé an Nosgnor! A l’é chiel col ch’av giuta e av goerna. ¹¹Tuti vojàtri ch’i l’eve timor ëd Dio, confidé an Nosgnor! A l’é chiel col ch’av giuta e av goerna.

¹²Nosgnor as arcòrda ‘d nojàutri e an benedirà. Chiel a benedirà ‘l pòpol d’Israel e a benedirà ij sacerdòt, dëssendent d’Aron. ¹³Chiel a benedirà coj ch’a l’han timor ëd Dio, dai pì pcit ai pì grand^[3].

¹⁴Che Nosgnor a benedissa vojàutri e ij vòstri fieuj. ¹⁵Ch’i sie benedì da Nosgnor, col ch’a l’ha fàit ël cel e la tèra. ¹⁶Ij cej a son ëd pertinensa ‘d Nosgnor, ma la tèra chiel a l’ha dàila ai fieuj ëd l’òm. ¹⁷Ij mòrt a peudo pa canté ‘d làude a Nosgnor, dàit ch’a son già ‘nt ël silensi dla tomba. ¹⁸Nojàutri contut, i podoma laudé Nosgnor ora e për sempe! Che Nosgnor a sia laudà!

Nòte

1. Cfr. 115:4-8 cfr.Salm 135:15-18; Arvelassion 9:20.
2. O “vòst ëscù”.
3. Cfr. Arvelassion 11:18; 19:15.