La Bibia piemontèisa/Testament Vej/Re/1Re 9

←1 Rè 8

La Bibia piemontèisa Lìber dij Rè

1 Rè 10→

1 Rè

Pàgina revisionà

9

Sconda aparission ëd Nosgnor a Salomon

¹Dòp che Salomon a l'ha chità ‘d fabriché 'l templ dël Signor, ël palass e tut lòn che a l'avìa vorsù fé, ²Nosgnor a l'é comparije na sconda vira, parèj coma ch’a l'era comparije a Ghibeon.

³Nosgnor a l'ha dije: “I l'hai scotà toa preghiera e toa arcesta d'agiut che ti 't l'has fame. I l'hai santificà cost templi che ti 't l'has fabricà: ant ës templi mè nòm a sarà për sèmper onorà e mia presensa a-i sarà garantìa. ⁴Ma a-i é ‘d condission: se ti ‘t portras ëdnans ëd mi, parèj coma ch’a l'era portasse tò pare David, con dritura 'd cheur e sincerità, s’it faras tut lòn che mi i l'hai comandate ‘d fé e it guerneras mie lej e mie ordinanse, ⁵antlora mi i stabilirai ël tròno ëd tò regn dzora d'Israel për sempe, coma ch’i l'avìa promëttuje a tò pare David, cora che i l'avìa dije: “Un dij tò dissendent a starà sèmper astà an sël tròno d'Israel”.

⁶Ma se ti o un dij tò fieuj i vë slontanereve da mi e i osservereve pa ij  mè precèt e j'istrussion ch’i l'hai dave, ma andreve nopà a serve 'd dio strangé për adoreje, ⁷antlora mi i scasserai Israel da la tèra ch’i l’avìa daje, mi i chiterai ës templi ch’i l’avìa santificà con mia presensa, e Israel a dventerà la fàula e la svergna 'd tute le gent. ⁸Ës templ a sarà mach pì un baron ëd drocheri. Coj ch’a dovèisso passeje dacant, a në restran ambajà e a subieran an ciamandze: ‘Com é-la che Nosgnor a l'ha tratà përparèj ës pais e cost templ?’. ⁹E a-j sarà rëspondù: “Përchè a l'han chità Nosgnor, sò Dé, ch’a l'avìa fàit seurte ij sò cé da la tèra d'Egit, e lor a son andàit apress a ‘d dio forësté, a l'han adoraje e servìje. A l’é për lòn che ‘l Signor a l'ha faje tombé ansima tuti sti maleur”.

Dë scambi con ël rè ‘d Tir

¹⁰Passà vint agn, ël temp ch’a l’han butaje për finì ij doi palass: ël templ ëd Nosgnor e ‘l palass real, rè Salomon a l’ha daje al rè d’ Tiro, Chiram, vint sità ant la region ëd la Galilea, ¹¹përchè a l’era stàit Chiram ch’a l’avìa provëdduje a Salomon ëd tut ël bòsch ëd séder e d’arsipress e tut l’òr ch’a n’avìa da manca pr’ ij sò fabricà. ¹²L’ora che Chiram, contut, a l’é partì da Tir pr’ andé a vëdde le sità che Salomon a l’avìa daje, bin: a son pròpi nen piasuje. ¹³Chiram a l’ha sclamà: “A sarìo coste-sì le sità che it l'has dame, frel?”. A l’é parèj che Chiram a l’ha ciamà cola àrea Cabul, ch’a veul dì “ch’a val pròpi nen”, e col-lì a l’é restà ‘l nòm ëd col teritori fin-a a l dì d’ancheuj. ¹⁴Pura, Chiram a l’avìa daje a Salomon sentevint talent d’òr^[1]!

Aministrassion, cult e comersi

¹⁵Për fabriché ‘l templ ëd Nosgnor, ël palass real, le struture ‘d sostegn^[2], le muraje ‘d Gerusalem, e le sità d’Asor, ëd Meghido e ‘d Gheser, Salomon a l’avrìa dovrà na fòrsa-travaj ‘d gent ëd coscrission obligatòria^[3]. ¹⁶Për lòn ch’a riguarda la sità d’Asor, Faraon, rè d'Egit, a l'avìa tacala e ciapala. Peui a l’avìa daje feu e massà ij Cananita che a-i ëstasìo. Peui ‘l faraon a l'ha dala tant 'me present ëd dòta, a soa fija, ch’a l'avìa marià Salomon. ¹⁷Për lòn Salomon a l'avìa tornà edificà Gheser, Bet-Oron ëd sota, ¹⁸Balat e Tadmor ant ël desert, ¹⁹e tute le sità ch’a servìo da magasin për Salomon, cole për ij sò chèr, cole për ij sò cavaj, e tut lòn che a l'era piasuje 'd fé an Gerusalem, ant ël Lìban e an tùit ij sò possediment.

²⁰Ore, vàire gent nen-Israelita che a l'ero restà ant ël teritòri d’Israel dòp la conquista 'd Giosuè, valadì j'Amorita, j'Hitita, ij Perissita, j'Evita e ij Gebusita. ²¹Ij sò dissendent a l'ero restà ant ël pais, përchè j'Israelita a l'ero pa stàit bon a stërmineje 'd pianta. Salomon a l'ha sogetaje a ‘d prestassion ëd man d'euvra, e lor a l'han seguità a fé lòn fin-a al di d'ancheuj. ²²Nopà, dij fieuj d'Israel, gnun a l'era stàit coscrit a fé 'd corvé; j'Israelita a servìo tanme ‘d soldà, ministr, ufissiàj, cap dij chèr e sivalié. ²³An tra costi òm, a l'ero stàit sërnù për esse an cària dij proget ëd  travaj ëd Salomon; ël total ëd sò nùmer a l'era 'd 550, tant 'me dzoravisor a j'euvre e a j'ovrié. ²⁴Pen-a che la fija 'd Faraon a l'é trasferisse ant la sità 'd David, ant la ca che Salomon a l'avìa fabricà për chila, ël rè a l'ha portà a compiment ij travaj dle struture ‘d sostegn ëd la sità.

²⁵Tre vire a l'ann Salomon a smonìa d'olocàust e d'oferte 'd pas an sl'autar che chiel a l'avìa drissà, an brusand ëd përfum ëdnans a Nosgnor, dòp ch’a l'avìa portà a compiment ël templ.

²⁶Rè Salomon a l'avìa 'dcò formà na flòta an Esion-Gheber, ch’as treuva aranda d'Elat, an sël golf d'Acaba dla tèra d'Edom, ant ël mar Ross. ²⁷A l’é Chiram ch’a l'ha mandà ij sò marinar dzora 'd cole nav, tùit espert navigador dël mar. Lor, ansema ai servitor ëd Salomon ²⁸a son peui andàit a Ofir, an portand da là 420 talent d'òr che a l'han consëgnà a rè Salomon.

Nòte

1. Ël termo ebràich כִּכָּר (chiccar, "sercc") a s'arferiss a cheicòsa che, ëd régola a l'ha da esse riond. Se dovrà për metaj a peul arferisse a na forma 'd disch ëd metal, com a n'unità d'pèis, a peupré an cost cas, quaranta miria d'òr.
2. Hebr. Mello (המלוא) na strutura ‘d pere a gradin dovrà da sostegn o ‘d difèisa dj’edifissi ‘d Gerusalem.
3. Squadre 'd travaj. מַס (mas) a s'arferiss a d'ovrié che a podìo fé na corvé, opura un travaj ëd servissi pùblich.

---