La Bibia piemontèisa/Testament Vej/Geremia/Geremia 29

←Geremìa 28

La Bibia piemontèisa Geremìa

Geremia 30→

La Bìbia piemontèisa - Geremia 29

Geremìa

29

Litra ‘d Geremìa ai deportà

¹Geremìa a l’ha scrivù na litra da Gerusalem a j’ansian, ij sacerdòt, ij profeta e tut ël pòpol ch’a l’era stàit deportà a Babilònia dal rè Nebucodenesar. ²A l’ha mandala apress ch’a l’ero surtì da Gerusalem ël rè Jeconia, la regina mare, j’àut funsionari^[1] e j’àutri ufissiaj ëd Giuda, ansema a tùit ij magnin e j’artisan^[2]. ³A l’han portaje la litra Elassà, fieul ëd Siafan, e Ghemaria, fieul ëd Hilchìa, cand ch’a l’ero andàit a Babilònia coma ambassador dël rè Sedecia apress Nabucodenesar, rè ‘d Babilònia. La litra a disìa:

⁴“Parèj a dis ël Signor ëd l’Univers, Dé d’Israel, a tuti coj ch’i l’hai faje deporté da Gerusalem a Babilònia. ⁵Fabriché ‘d ca e pensé dë steie. Pianté d’òrt e mangene la produssion; ⁶Marieve e àbie ‘d fieuj e ‘d fije; trové ‘d fomne për ij vòstri fieuj, parèj ch’i l’àbie motobin d’anvod. Multiplieve an abondansa! ⁷Procuré ‘l bin ëd la sità anté ch’i seve stàit deportà e preghé Nosgnor ch’a la benedìssa, përchè da sò bin a dipend ël vòst”.

⁸Parèj a dis ël Signor ëd l’Univers, Dé d’Israel: “Lasseve pa ambrojé dai profeta ch’a-i son an tra ‘d voi nì da vòstri andvineur, o antèrpret ëd seugn. ⁹A l’é nen vera che lor a profetiso a mè nòm; coj-lì mi i l’hai pa mandaje. I lo diso mi, ël Signor”.

¹⁰Parèj a dis ël Signor: “A l’han da compisse stanta agn^[3] an Babilònia. Apress, i m'arcordrai ëd vojàutri e i compirai la promëssa ch’i l’hai fave d’artorné ansissì. ¹¹I sai coj ch’a sìo ij mè progèt^[4] ch’i l’hai për vojàutri, progèt ëd pas e nen ëd dësgràssia; i son an camin ëd deve n’avnì e na speransa. I lo diso mi, ël Signor. ¹²An coj di-lì im ciamreve, i vnireve a suplicheme e mi i vë scotrai. ¹³Im sërcreve e im trovreve, përchè im sërcreve con tut vòst cheur^[5], ¹⁴e mi 'm lassrai trové. I lo diso mi, ël Signor. I arnovreve vòstra vita, iv assemblerai da tute le nassion e da tùit ij leugh anté ch’i l’avìa mandave e iv farai artorné a ca, da ‘ndoa i l’avìa fave deporté. I lo diso mi, ël Signor.

¹⁵Vojàutri i pretende che l’ Signor a l’abia dave ‘d profeta an Babilònia. ¹⁶Ma sossì a l’é lòn che ‘l Signor a dis risguard al rè ch’a l’è setà an sël tròno ‘d David e a tuti coj ch’a stan ancora a Gerusalem - vòstri parent ch’a son nen surtì da sì e deportà con vojàutri. ¹⁷Parèj a dis ël Signor dl’Univers: i mandrai contra ‘d lor la spa, la fam e 'l contacc e a-j farà smijé a ‘d fi gram, tant gram ch’as peudo nen mangesse. ¹⁸I-j darai dré con la spa, la fam e la pestilensa; i-j dësbergiairai për tut ël mond. An minca nassion anté ch’i-j mandrai, i-j rendrai n’oget ëd danasion, d’afror, ëd dëspresi e dë svergne. ¹⁹Përchè lor as arfudo dë scoteme, bele s’i l’hai parlaje ciàir, e nen mach na vira, për ël mojen dij profeta ch’i l’avìa mandaje. E vojàutri, ch’i seve an esili, gnanca vojàutri i l’eve scotame. I lo diso mi, ël Signor. ²⁰Vojàutri, donca, tùit ij deportà ch’i l’hai mandaje da Gerusalem a Babilònia, chërdme, arsèive la paròla dël Signor!”.

²¹Sossì a l’é lòn che ‘l Signor ëd l’Univers, Dé d’Israel a dis a riguard dij vòstri profeta - Acab, fieul ëd Colaiù, e Sedecia, fieul ëd Maaseia - ch’av diso ëd busiardarìe e a fan n’abus ëd mè nòm: i-j butraj an le man ëd Nebucodenesar, rè ‘d Babilònia, ch’a-j masas-rà dëdnans a vòstri euj. ²²E tùit ij deportà ‘d Giuda a Babilònia, cand ch’a voreran fé ‘d maledission, a diran: ‘Che Nosgnor av trata tanme Sedecia e tanme Acab, che ‘l rè ‘d Babilònia a l’ha fàit rustì!”. ²³Përchè coj òm-lì a l’han comëttù n’ignomìnia che gnun a l’avìa mai vëddula anans an Israel: lor a l’han fàit d’adulteri con ëd fomne d’àutri e, fasand n’abus ëd mè nòm, a l’han nunsià ‘d còse fàusse, ëd ròbe che mi i l’avìa pa nen dije. Mi, ël Signor, i lo sai e i në dago la testimoniansa. I lo diso mi ël Signor”.

Geremìa e Semaià

²⁴Nosgnor a l’é adressasse a Geremìa e a l’ha dije: “Dì a Semaià ‘d Neelam: ²⁵Parèj a dis ël Signor ëd l’Univers, Dé d’Israel: I sai bin ch’it l’has mandà na litra a tò nòm për tuta la gent ëd Gerusalem, al sacerdòt Sefanià, fieul ëd Maaseia, e a tùit ij sacerdòt ant ësti tèrmin: ²⁶‘Nosgnor a l’ha stabilite ti, Sefanià, coma sacerdòt al pòst dël sacerdòt Jehoiadà, për ch’it fusse responsàbil dël templi^[6] 'd Nosgnor, e përch’it vijèisse për buté ai fèr qualsëssìa testa mata ch’as chërda d’esse ‘n profeta. ²⁷Contut, ti tl’has fàit nen për fé sté ciuto Geremìa d’Anatòt, ch’a pretend d’esse un profeta an tra ‘d voi? ²⁸Geremìa a l’ha mandà na litra ansissì a Babilònia ch’a fortiss che nòstra deportassion a Babilònia a sarà bin longa. A l’ha dit: Fabriché ‘d ca e pensé dë steie. Pianté dj’òrt e mangene la produssion”.

²⁹Ma cand che ‘l sacerdòt Sefanià a l’ha arseivù la litra ‘d Semaià, a l’ha portala a Geremìa e a l’ha fàila lese. ³⁰Nosgnor, donch, a l’ha comunicà soa paròla a Geremìa. A l’ha dije: ³¹“Manda cost mëssagi a tùit ij deportà: ‘Parèj a dis ël Signor riguard a Semaià ‘d Neelam: Dàit ch’a l’ha profetisà a vojàutri cand che mi i l’avìa pa mandavlo, a l’ha ambrojave e a l’ha fave chërde soe busiardarìe, ³²I mandrai ij mè castigh a chiel e a soa famija. Gnun dij sò dissendent a vëdran le bon-e còse ch’i farai për mia gent, përchè chiel a l’ha cissave d’arvireve contra ‘d mi. I lo diso mi, ël Signor”.

Nòte

1. O “j’ufissiaj dla Cort”.
2. 29:1-2 cfr. 2 Rè 24:12-16; 2 Crònache 36:10.
3. Cfr. 2 Crònache 36:21; Geremìa 25:11; Daniel 9:2.
4. O “propòsit”, “dissegn”.
5. Cfr. Deuteronòmi 4:29.
6. O “dla ca”.