La Bibia piemontèisa/Testament Vej/Re/2Re 24

←2 Rè 23

La Bibia piemontèisa Lìber dij Rè

2 Rè 25→

La Bìbia piemontèisa - 2 Rè 24

2 Rè

24

¹Dël temp dël regn ëd Jehoiachim, rè Nabucodenesar 'd Babilònia^[1] a l'ha ocupà la tèra ‘d Giuda. Jehoiachim a l'é rendussje e a l’ha pagaje ‘n tribùt për tre agn, e peui a l’é arvirassje contra. ²Alora Nosgnor a l'ha mandaje contra 'd bande armà 'd Babilonèis, Sirian, Moabita e Amonita; a l'ha mnàje për dëstruve Giuda, conform a la paròla che 'l Signor a l'avìa pronunsià për mojen dij sò sërvent, ij profeta. ³Sòn a l'é rivaie a Giuda për vorej ëd Nosgnor, che parèj a l'ha vorsù arposselo da soa presensa a motiv dij pëcà 'd Manasse, ⁴ch’a l’avìa ampinì Gerusalem ëd sangh nossent. Ël Signor a l’ha pa vorsùje përdoné sti pecà.

⁵Tut lòn che a resta dj'event ëd Jehoiachim, con tut lòn ch’a l'ha fàit, a son dëscrivù ant ël lìber dij Fàit dij rè 'd Giuda. ⁶Jehoiachim, peui, a l'é mòrt e a sò pòst a l'ha arpiassalo tanme rè sò fieul Ioiachin.

Ël regn ëd Ioiachin an Giuda

⁸Ioiachin a l'avìa disdeut ani cora ch'a l'é vnùit a esse rè: a l'ha regnà tre mèis an Gerusalem. Soa mare, ëd Gerusalem, as ciamava Necosta, fija d'Elnatan. ⁹Ioiachin a l'ha fàit lòn ch’a l’é mal a j'euj ëd Nosgnor giusta tanme sò pare.

¹⁰Damentre che Ioiachin a l’era rè, j’ufissié ‘d Rè Nabucodenesar ëd Babilònia a l’han marcià contra ‘d Gerusalem e a l’han assediala. ¹¹Nebucodenesar an përson-a a l’era rivà a la sità durant l’assedi. ¹²Peui rè Ioiachin, ansem a la regin-a mare, ij sò consijé, ij sò comandant, e ij sò ufissié a son rendusse ai Babilonèis. Ël rè 'd Babilònia, ant l'ann che a fà eut ëd sò regn, a l'ha fàit përsoné Ioiachin^[2]. ¹³Pròpi coma Nosgnor a l’avìa preanunsià, Nabucodenesar a l’é portasse via tùit ij tesòr dël Templi ‘d Nosgnor e dël palass real. A l’ha ‘dcò sfrisà tuti j'asi d'òr che rè Salomon d'Israel a l'avìa fàit fé ant ël templi dël Signor. ¹⁴Rè Nebucodenesar a l'ha deportà tùit ij resident ëd Gerusalem, comprèis tuti j'ofissiaj, ant ël nùmer ëd 10.000. Tùit ij minusié e ij fré: a son mach pì restaie ij pì pòver dël pais. ¹⁵Ioiachin a l'é stàit dëportà a Babilònia^[3], con soa mare, soe fomne, ij sò ufissié, ij sò eunuch e le guide dël pais, portàndje tùit an esili da Gerusalem a Babilònia. ¹⁶Ël rè 'd Babilònia a l'ha 'dcò dëportà 7.000 soldà e mila artësan ovrié e travajeur dël metal, ansema a tùit ij guerié pì vajant. ¹⁷Ël rè 'd Babilònia a l'ha nominà rè al pòst ëd Ioiachin, sò barba Matania, ma a l'ha cambiaje 'l nòm an Zedechia^[4].

Ël regn ëd Zedechia an Giuda

¹⁸Zedechia a l'avìa vintun ani cora che a l'é vnùit esse rè^[5], e a l'ha governà óndes ani an Gerusalem. Soa mare a l'era Camotal, fija 'd Geremìa, da Libna. ¹⁹Chiel a l'ha fàit lòn ch’a l’é mal a j'euj ëd Nosgnor, precis com a l'avìa fàit Ioiachin. ²⁰Sossì a l'é 'ncapità an Gerusalem e an Giuda për motiv ëd la flin-a dël Signor contra la gent ëd Gerusalem e Giuda, findi che a la fin chiel a l’ha bandije da soa presensa e a l’ha mandaje an esili.

La croa ‘d Gerusalem

Zedechia a l’é arvirasse contra ‘l rè ‘d Babilònia^[6].

Nòte

1. Cfr. Geremia 25:1-38; Daniel 1:1-2.
2. Cfr. Geremìa 22:24-30; 24:1-10; 28:1-2.
3. Cfr. Esechiel 17:12.
4. Cfr. Geremìa 37:1; Esechiel 17:13.
5. Cfr. Geremìa 27:1-22; 28:1-17.
6. Cfr. Esechiel 17:15.