La Bibia piemontèisa/Testament Vej/Daniel/Daniel 1

←Esechiel 48

La Bibia piemontèisa Daniel

Daniel 2→

La Bìbia piemontèisa - Daniel 01

Daniel

1

Ij privilegi 'd Daniel a Babilònia

¹Ant ël ters ann dël regn ëd Ioiachim, rè 'd Giuda, Nabucodenesar, rè 'd Babilònia, a l'é portasse sota 'd Gerusalem e a l'ha butala sota assedi^[1]. ²Nosgnor a l'ha butaje ant le man Ioiachim, rè 'd Giuda, e 'dcò na part dj'utiss ëd la ca' d Nosgnor. Nabucodenesar a l'ha tramudà costi asi ant ël pais ëd Sinear, ël templi dij sò dio, butandje ant un depòsit ëd la ca dël tesòr dij sò dio.

³Ël rè a l'ha dije a Aspenas, sò cap eunuch, ëd pijé na partìa 'd fiolin ëd rassa nòbil e real: ⁴a dovìo esse sensa difet, ëd bela presensa^[2], vërsà an vàire mire 'd saviëssa, bin anformà e pien ëd sust; adat a serve a la cort dël rè. Aspenas a l'avrìa mostraje a lese e a parlé ant la lenga dij Caldé^[3]. ⁵Ël rè a l'ha fissaje le proviande 'd tùit ij di con ël mangé e 'l vin pijàit da la tàula dël rè. A sarìo stàit educà për ël temp ëd tre ani; dòp, lor a sarìo presentasse dë' dnans dël rè. ⁶An tra'd lor a j'ero Daniel, Anania, Misael e Asaria, tuti Giudé. ⁷Ël cap ëd j'eunuch a l'ha ‘dcò cambiaje ‘l nòm: Daniel a sarìa ciamasse Baltasàr; Anania: Sadrach; Misael: Mesach e Asaria: Abed-Nego (Servent ëd Nego).

⁸Daniel ch'a l'avìa car ëd nen antamnesse con ël mangé e 'l beive dla tàula real, a l'ha ciamaje al cap eunuch d'esse vansà da cola apostasìa^[4]. ⁹Nosgnor a l'ha conceduje a Daniel d'arsèive fiusa e grassia dal cap eunuch. ¹⁰Ma l'eunuch a l'ha butà an vardia Daniel. A l’ha dije: “Mi i l'hai tëmma 'd mè signor e rè; chiel a l'ha fissave da mangé e da beive e, s'av trovèissa màire ant ël visage, conforma j'àutri fieuj 'd vòsta età, ansima a mia testa a tomberìa na colpa a j'euj dël rè”.

¹¹Anlora Daniel a l'ha dije a la vardia che 'l cap eunuch a l'avìa mandà për Daniel, Anania, Misael e Asaria: ¹²“It në prego, buta ij tò servent a la preuva për des di: ch’a vado a dene mach ëd vërdura da mangé e d'eva da bèive. ¹³Ti it podras confronté nòste face con cole dj'àutri fieuj ch’a mangio da la tàula dël rè e it faras conforma lòn ch'it l'avras vëddù”. ¹⁴L'òm a l'ha dit che 'd sì a lòn che a l'avìo ciamaje e a l'ha butaje a la preuva për des di. ¹⁵Passà ch'a son ëstàit ij des di, lor a stasìo mej e a l'ero pì grass ëd tùit ij fiolin che a l'avìo mangià da la tàula dël rè. ¹⁶Da lòn, la vardia a l'ha gavaje 'l mangé e la rassion ëd vin che a dovìo bèive e a l'ha daje mach ëd vërdura, ¹⁷A coj quat giovo Nosgnor a l'ha daje sapiensa e istrussion an tute le forme 'd létere e d'amprende. A Daniel a l'é staje dàita l’abilità d'antërpreté tute sòrt ëd vision e 'd seugn.

¹⁸Al termo fissà dal rè përchè a fùsso mnà da chiel, ël cap dj'eunuch a l'ha portaje dë 'dnans a Nabucodenesar. ¹⁹Ël rè a l'ha parlà con lor e an tra ij fieuj gnun a l'é stàit parèj 'd Daniel, Anania, Misael e Asaria. Përparèj lor a son ëvnùit a fé part dël séguit dël rè, ²⁰e, ansima a tute le chestion ëd prudensa e conossensa ch'a vnisìo anterogà, ël rè a-j trovava des vire pì anans che tùit ij mascon e j'andvin ëd sò regn.

²¹Daniel a l'é restà ambelelà fin-a a l'ann prim dël re Ciro.

Nòte

1. Cfr. 2 Rè 24:1; 2 Crònache 36:5-7.
2. O “bin piantà”.
3. Cfr. 2 Rè 20:17-18; 24:10-16; 2 Crònache 36:10; Isaia 38:7-8.
4. O “stat d’ampurità legal”.