La Bibia piemontèisa/Testament Vej/Esechiel/Esechiel 48
Esechiel modifiché
48 modifiché
Ripartission dël teritòri modifiché
1Costi-sì ij nòm ëd le tribù e dël territori ch'a jë speta. An partend da l'estrema borna 'd tramontan-a an diression ëd Chetlon, anvers l'intrada d'Amat e fin-a a Casar-Enan, an lassand a setentrion ël finagi ëd Damasch e andasend ëd còsta, arlongh le bòine d'Amat, da la man ëd levant al mar: na part a sarà assegnà a Dan. 2An sël confin ëd Dan, dòp ël lìmit oriental fin-a la bariera 'd ponent: Aser, na part. 3An sël confin 'd Aser, dòp ël lìmit ëd levant e fin-a la bariera ossidental: Neftali, na part. 4An sël confin ëd Neftali, dòp ël lìmit oriental e fin-a la bariera 'd ponent: Manasse, na part. 5An sël confin ëd Manasse, dòp ël lìmit ëd levant e fin-a a la bariera ossidental: Efraim, na part. 6An sël confin 'd Efraim, dòp ël lìmit oriental e fin-a a la bariera 'd ponent: Ruben, na part. 7An sël confin ëd Ruben, dòp ël lìmit ëd levant e fin-a a la bariera ossidental: Giuda, na part. 8Arlongh ij finagi ëd Giuda, dal lìmit oriental fin-a a col ëd ponent, a-i sarà ël teritòri che vojàutri i prelevereve, largh 25.000 cùbit e longh parèj d'un-a dle part che a son tocaje a le tribù, dal lìmit ëd levant a col ossidental: ël Santuari a sarà pròpi ant ël mes ëd col teritòri.
9La part che vojàutri i andreve a prelevé për ël Signor a sarà 'd 25.000 cùbit e largh 10.000. 10A l'é a lor, ai sacerdòt, la proprietà dla part sacrà: a tramontan-a 25.000 cùbit e a ponent na larghëssa 'd 10.000 cùbit, a levant na larghëssa 'd 10.000 cùbit e a mesdì na longhëssa 'd 25.000 cùbit; ël Santuari dël Signor a sarà ant ël mes. 11Sòn a sarà për ij sacerdòt consacrà, për coj dij fieul ëd Zadoch ch'a l'avìo assicurà mè servissi, che a l'ero pa dëstornasse ant ël traviament dj'Israelita, coma che a l'ero perdusse ij Levita. 12Parèj che a sarà soa na part ciapà an sla part santa dij sant dël pais: costa la frontiera dij Levita. 13Ij Levita a l'avran un teritòri tut parìa ëd col dij sacerdòt: a sarà longh 25.000 cùbit e largh 10.000; longhëssa total 25.000 cùbit e 10.000 ëd larghëssa. 14A podran pa cambié nì vende nen e ij fond ëd la tèra a podran pa esse alienà, përchè tut a l'é sacrà a Nosgnor.
15Dij sinch mila cùbit che a vanso an larghëssa dzora dij 25.000, as farà un teritòri profan për la sità, për j'abitassion e ij pasturagi. Ant ël mes a-i sarà la sità. 16Vardé soe dimension: da la banda 'd tramontan-a 4.500 cùbit; da cola dël mesdì, 4.500 cùbit; da la banda 'd levant, 4.500 cùbit e da cola 'd ponent, 4.500 cùbit. 17J'anviron ëd la sità a l'avran anvers setentrion: dosentessinquanta cùbit, ant ël meridion dosentessinquanta cùbit, anvers est, dosentessinquanta cùbit, e a ponent, dosentessinquanta cùbit. 18Përparèj ch'a-i restran an longhëssa, aranda dla porsion sacrà, 10.000 cùbit anvers levant e 10.000 vers ponent arlongh la part consacrà: soa produssion a servirà a manten-e j'ovrié dla sità. 19J'ovrié dla sità a saran ciapà da tute le tribù d'Israel. 20Ël tut a sarà 'd vintessinch-mila cùbit për d'àutri vintessinch-mila. A sarà prelevà un quart ëd la part sacrà tant 'me proprietà dla sità.
21La rimanensa, da tute doe le bande dël leu consacrà e dla proprietà dla sità, ch'a l'é dël prinsi: l'estension a sarà an s'un front ëd vintessinch-mila cùbit dël leu sacrà a levant, anvers ël finagi oriental, e a ponent, an s'un front ëd vintessinch-mila cùbit anvers ël finagi ëd ponent, an paralel a le part e a sarà tut dël prinsi. Ël leu sacrà e 'l santuari a saran an mes. 22La proprietà dij Levita e dla sità a sarà 'dcò an mes con ël possess dël prinsi.
23Për j'àutre tribù, da la finaja oriental a cola 'd ponent: Beniamin, na part. 24Da la banda dël teritòri ëd Beniamin, ancaminand-se da la frontiera 'd levant a cola ossidental, Simeon a l'avrà na porsion. 25Da la part dël teritòri ëd Simeon, partend dai finagi a est fin-a a rivé a coj ëd ponent: Issacar, na porsion. 26Dal lat d'Issacar, an partend da la banda oriental fin-a a la part d'ossident , a-i sarà ël teritòri 'd Zabulon. 27Da la banda dël teritòri 'd Zabulon, da la frontiera 'd levant a cola 'd ponent: la part ëd Gad. 28Tacà a la finaja 'd Gad, a parte da mesdì anvers sud, ij finagi andran da Tamar fin-a a j'eve 'd Meriba-Cades e al torent d'Egit che a va al Gran Mar.
29Costa a l'é la tèra che i dividereve an sòrt an ardità për le tribù d'Israel e coste-sì a saran soe part, a dis ël Signor Dé.
Le pòrte dla sità modifiché
30Coste-sì a saran le surtìe dla sità: da la banda 'd tramontan-a: quatmilassinch-sent cùbit ëd mzura. 31Le pòrte dla sità a porteran ij nòm ëd le tribù d'Israel. Tre pòrte a setentrion: la pòrta 'd Ruben, un-a, na pòrta 'd Giuda e na pòrta për Levi. 32Da la banda d'orient: quatmila e sinch-sent cùbit e tre pòrte: na pòrta për Giusep, na pòrta për Beniamin e na pòrta për Dan. 33Da la part sud: quatmilassinch-sent cùbit e tre pòrte: na pòrta për Simeon, na pòrta për Issacar e na pòrta për Zabulon. 34Da la part ëd ponent: quatmilassinch-sent cùbit e tre pòrte: na pòrta për Gad, na pòrta për Aser e un-a për Neftali. 35La sirconferensa dla sità a sarà 'd ses mija. Da col di an anans ëd la sità a podrà ciamesse: Nosgnor a l'é ambelelà[1].
Nòte modifiché
- ↑ 48-30-34 cfr. Arvelassion 21:12-13.