La Bibia piemontèisa/Testament Vej/Cronache/2Cronache26

←2 Crònache 25

La Bibia piemontèisa Ij lìber dle Crònache

2 Crònache 27→

La Bìbia piemontèisa - 2 Crònache 26

26

Ël regn d’Usìa

¹Tuta la gent ëd Giuda a l'é andàita a pijé Usìa, che a l'avìa sëddes agn e a l'ha stabililo rè al pòst ëd sò pare Amasia. ²Dòp la mòrt ëd rè Amasia, Usìa a l’ha fàit arcostruì la sità d’Elat e a l’ha rendùjla a la giurisdission ëd Giuda.

³Usìa a l'avìa sëddes agn cora ch'a l'ha ancaminasse a regné, e a l'ha regnà sinquantedoi agn a Gerusalem. Soa mare as ciamava Jecolia, da Gerusalem. ⁴Chiel a l'ha fàit lòn che a Nosgnor a-j pias, coma che sò pare Amasia a l'avìa fàit. ⁵A l'ha seguità Dé për tuta la vita 'd Zacaria, che a l'ha mostraje a onoré Dé. Fin-a tant che a l'é restà fedel a Nosgnor, Dé a l'ha acordaje na bon-a riussìa ‘d soe 'mprèise.

⁶Usìa a l'ha diciarà guèra ai Filisté e campà giù le muraje 'd Gath, Jabneh e Asdod. Chiel a l'ha 'dcò edificà 'd sità neuve ant la region d'Asdod e an d’àutre part dij teritòri filisté. ⁷Dé a l'ha giutalo an soe campagne contra dij Filisté, contra dj'Arab che a stasìo a Gour-Baal e contra dij Maonita. ⁸Ij Maonita a l’han pagaje ‘d tribùt e soa arputassion a l'é rivà fin-a ai finagi d'Egit, përchè a l'era vnùit esse motobin potent.

⁹Usìa a l’ha fàit tiré sù ‘d dongion fortificà an Gerusalem ant la Pòrta dël Canton, an sla Pòrta dla Comba e cola dl'àngol. ¹⁰A l’ha ‘dcò fàit fé ‘d fortin ant ël desert e fàit ëscavé vàire sisterne, da già ch'a l'avìa bomben dë strop an sle colin-e e ant la pian-a. Chiel a l'avìa d'ovrié ant ij camp e 'd vigne an sle colin-e e al Carmel, përchè a-j piasìa la campagna.

¹¹Usìa a l'avìa 'dcò n'armeja 'd guerié qualificà a angagé 'd combatiment. Costa armèja a l’era stàita adestrà e organisà da Jeiel, ël secretari dl’armeja e da sò assistent Maaseia. A l'era organisà an division, conform ij ròlo stabilì da lë scrivan Jeiel e da l'ufissial Maseia sota l'autorità d'Anania, un dij responsàbil reaj. A l’era sota 'l comand d’Anania, un dj’ufissié dël rè. ¹²Costi regiment ëd guerié vajant a l’ero comandà da 2.600 cap dij clan. ¹³L’armà a consistìa ‘d 307.500 òm, tute trope ‘d valor. Lor a l’ero bin preparà a dësfende ‘l rè contra ‘n qualsëssìa nemis.

¹⁴Usìa a l'ha fornì a tuta l'armeja dë scu, ëd lanse, d’elmèt, d’armure, d’arch e 'd pere për le frande. ¹⁵An Gerusalem chiel a l'ha fàit fé 'd màchine da guera progetà con soèn për sfrandé 'd flece e gròsse pere da le tor e dai canton ëd le muraje. A l'é vnùit esse motobin famos, për avèj avù bel e bin d'assistensa da vnì motobin potent.

Ël pecà e la punission d’Usìa

¹⁶Cand ch’a l’é dventà potent, contut, chiel a l’é ‘dcò dventà motobin arogant e cost sò ategiament a l’ha ruinalo. Chiel a l'é dimostrasse pi nen fedel al Signor sò Dé. Chiel, an efet, a l’avìa pecà contra ‘l Signor sò Dé an intrand ëd përson-a ant ël templi ‘d Nosgnor për brusé d'ancens an sl'autar, na ròba ch’a l’era nen consentìa. ¹⁷Parèj, ël Gran Sacerdòt Asaria a l’é intrà ant ël Templ apress ëd chiel con otanta d’àutri sacerdòt, tùit òm coragios. ¹⁸Lor a son oponusse a Rè Usìa e a l'han dije: “A toca nen a ti, Usìa, l'oferta d'ancens al Signor^[1]. Costa a l'é na prerogativa dij sacerdòt, ij dissendent d'Aron, ch'a son ëstàit consacrà a brusé d'ancens. Seurt dal santuari, përchè it l'has fàit na trasgression ëd la Lege. Nosgnor Dé at onorerà pa për avèj fàit na ròba parèj!”.

¹⁹Usìa che a l'avìa an man ël brasé për smon-e d'ancens, a l'é anrabiasse. Pròpi ant ël mentre che a sfogava soa flin-a contra dij sacerdòt, an sla pel ëd la front a l'é vnùie fòra la lebra^[2], pròpi an facia ai sacerdòt, ant ël templi e aranda dl'autar për j'ancens. ²⁰Cand che Asaria, ël Grand Sacerdòt a l’ha vëddù la lebra, an pressa a l'han falo seurte d'ambelelì; dcò ël rè a l'é pressasse për seurte, përchè Nosgnor a l'avìa colpilo. ²¹Rè Usìa a l'é restà lebros fin-a al di 'd soa mòrt. Chiel a stasìa ant na ca d'isolament, tanme ij lebros, lassà fòra dal templi ‘d Nosgnor. Sò fieul Iotam a l'avìa an cària ël palass e a governava dzora dël pòpol dël pais.

²²J’àutri fàit dël regn d’Usìa, dal prinsìpi a la fin, a son ëstàit registrà dal profeta Isaia, fieul d’Amos. ²³Peui Usìa a l'é mancà e a l'é stàit sotrà aranda dij sò antich ant ël simanteri davzin ëd le tombe reaj, përchè as disìa: “A l'é ‘n lebros!”. Iotam a l'é vnùit a esse rè a sò pòst^[3].

Nòte

1. Cfr. Surtìa 30:7-8; Nùmer 3:10.
2. O n’àutra maladìa contagiosa dla pel, përch’as conossìa pa la diferensa antlora.
3. Cfr. Isaia 6:1.