La Bibia piemontèisa/Testament Vej/Surtia/Surtia 30

←Surtia 29

La Bibia piemontèisa Surtìa (Èsod)

Surtìa 31→

Surtìa

La Bìbia piemontèisa - Surtìa 30

30

L’autar dl’ancens

¹L’autar për smon-e l’ancens falo ‘d bòsch ëd gasìa. ²A l’ha da esse quadrà: largh e longh doi branche e con n’autëssa ‘d quat branche. Ij còrn dij quat canton dë dzora a l’avran da esse dl’istess tòch ëd bòsch dl’autar medésim. ³Quata ‘d làmine d’òr pur tant la part dë dzora che ij quat panej dij fianch e ij còrn. Bùtje për ornament na garlanda d’òr tut dantorn. ⁴Ëd sota dla garlanda, an sij fianch ëd drita e ‘d mancin-a, tàchje doi anej d’òr për part: a serviran për anfileje le stanghe ‘d bòsch për ël traspòrt dl’autar. ⁵Cole stanghe faje ‘dcò ‘d bòsch ëd gasìa e quatje ‘d làmine d’òr. ⁶Apress, piassa l’autar dë 'dnans al vel ch’a-i é a front dl’Èrca^[1] ch’a conten lë Strument dl’Aleansa, andova mi im rëscontrerai con ti.

⁷Minca na matin, quand che Aron as pija soen dle lampie, chiel a l’avrà da brusé d’ancens an sl’autar. ⁸E minca na sèira, quand ch’a anvisca ij ciàir ëd le lampie, a l’avrà da brusé torna d’ancens. Cost ancens a l’ha da esse smonù an përpetuo dë 'dnans a Nosgnor ëd generassion a generassion. ⁹An ës autar smonje pa d’ancens ch’a sia nen sant^[2], nì d’olocàust, nì oferte ‘d farin-a, nì ‘d libassion ëd vin.

¹⁰Na vira l’ann, Aron a farà la sirimonia d'espiassion an onzend ij còrn dl’autar con ël sangh ëd la vìtima smonùa për ël përdon dij pëccà dël pòpol. Falo parèj minca n’ann ëd generassion a generassion. L’autar, consacrà a Nosgnor, a l’ha da consideresse na còsa dla màssima santità.

La taja an favor dël Santuari

¹¹Peui Nosgnor a l’ha parlà a Mosè e a l’ha dije: ¹²“Cand ch’it fase ‘l censiment dël pòpol d’Israel, minca n’òm ch’a l’é contà a l’ha da paghé a Nosgnor un riscat për soa vita^[3]. Parèj ël pòpol a sarà nen colpì da na cheich piaga quand ch’as farà ‘l censiment. ¹³Minca na përson-a ch’a sia contà a l’avrà da paghé mes sechel d’argent^[4], l’é a dì, la metà dl’unità ‘d pèis ufissial dël templi e ch’a corispond a vint ghere. ¹⁴Tùit ij censì, da vin agn an sù, a pagheran ësta taja. ¹⁵Tant ël rich coma ‘l pòver a pagheran, donca, për soa vita ‘d lor, mes sechel^[5], nì pì nì men-o, coma na taja ‘d Nosgnor. ¹⁶Ij dné che j’Israelita at dan për sò riscat ëd lor, a son da destinesse al servissi dla Tenda dël Rëscòntr. Parèj Nosgnor a tnirà sèmper present che j’Israelita a l’han pagà ‘l riscat për soe vite.

Ël lavàbos ëd bronz

¹⁷Nosgnor a l’ha parlà a Mosè e a l’ha dije: ¹⁸“Për j’ablussion fà ‘n lavàbos ëd bronz con sò sòco ‘dcò ‘d bronz^[6]. Bùtlo an tra la Tenda dël Rëscontr e l’autar, e ampinislo d’eva. ¹⁹Aron e ij sò fieuj a l’avran da dovrelo për netiesse le man e ij pé. ²⁰As netieran anans d’intré ant la Tenda dël Rëscontr përchè ch’a meuiro nen. A l’avran da netiesse ‘dcò anans d'avzinesse a l’autar për ufissieie, l’é a dì, anans ëd smon-e n’oferta fàita con ël feu da fé fumé dë 'dnans a Nosgnor. ²¹As netieran le man e ij pé, e parèj a meuireran pa. Costa-sì a l’é na lej përpetua për Aron e për soa dissendensa, ëd generassion a generassion.

L’euli dl'unsion santa

²²Nosgnor a l’ha parlà n’àutra vira a Mosè. A l’ha dije: ²³“Procurte dle mej spessie aromàtiche: sinch chilo ‘d mira lìquida; la metà, l’é a dì, doi chilo e mes, ëd cànava, doi chilo e mes ëd cassia aromàtica, ²⁴e sinch chilo ‘d cassia, conform a j’unità ‘d pèis ufissial dël santuari. Procurte ‘dcò tre lìter e mes d’euli d’oliva. ²⁵Con tut sossì pronta, coma ch’a fà ‘n përfumeur, l’euli për l’unsion santa. ²⁶ Ónz-ne la Tenda dël Rëscontr, l’Èrca ch’a conten lë Strument dl'Aleansa, ²⁷la taula con tùit ij sò asi, l’autar dl’ancens, la girindòla con tùit ij sò asi, ²⁸l’autar dj’olocàust con tùit ij sò asi e ‘l lavàbos con sò sòco. ²⁹Apress d’avèj consacraje, a saran da consideresse pì che sant; tut lòn ch’a-j toca a restrà consacrà. ³⁰Àplica l’unsion ëdcò a Aron e ai sò fieuj, e consàcrje për ch’a sio ij mè sacerdòt.

³¹Dije peui a j’Israelita: “Sto-sì a l’é l’euli dl’unsion santa. Da generassion a generassion a sarà riservà a mè servissi. ³²It l’aplicaras al còrp ëd gnun, nì it në pronteras d’àutr ëd l’istessa composission. A l’é sant, e it l’has da considerelo na còsa sacrà. ³³Se cheidun a pronta n’euli parìja e a lo àplica al còrp d’un òm ch’a sia nen consacrà^[7], col-lì a sarà bandì da mè pòpol.

L’ancens

³⁴Nosgnor a l’ha ancora dije a Mosè: “Procurte coste spessie aromàtiche: dë stisse ‘d përzin-a, ëd cuchija odorosa, ëd gàlban^[8] aromàtich e d’ancens pur, an part uguaj. ³⁵Con tut sòn, pronta, coma ch’a fà ‘l përfumeur, n’ancens aromàtich, pur e sacrà, ch’a sia salà. ³⁶Con na part, fórma ‘d póer fin-a, e it la bruseras dë 'dnans dl'Èrca, drinta dla Tenda dël Rëscòntr, anté che mi i vnirai a trovete. Cost ancens it l’has da considerelo na còsa sacrà. ³⁷It pronteras nen d’àutr con costa composission medésima. It l’has da considerelo n’ancens consacrà a Nosgnor. ³⁸Se cheidun a pronta n’ancens parèj për dovrelo tanme ‘n përfum për chiel istess, col-lì a sarà bandì da soa gent^[9].

Nòte

1. O “a front dël cover-cc dl'Érca - ël leugh dël përdon”.  
2. O “profan”.
3. A l’era ‘n testatich, na taja pùblica che minca na përson-a (pro capite, “minca na testa”) ch’a fasìa part dël pòpol d’Israel a l’avìa da paghé për seguité a fé part ëd la comunità dij riscatà e parèj “evité la mòrt”. A l’era na “contribussion a sò riscat” ch’a l’era l’istessa për tuti, sensa considerassion dla réndita ch’a l’avìa, rich o pòver l’istess. Ij dné cojì a sustnìo ‘l santuari tanme memòria për ij riscatà.
4. Surtìa 28:25-26; Maté 17:24.
5. O “un pess ëd sinch gram d’argent”,
6. Cfr. Surtìa 38:8.
7. O “d’un foresté”.
8. O “përzin-a ‘d goma” (galbănu).
9. 30-22-38 cfr. Surtìa 37:29.