La Bibia piemontèisa/Testament Vej/Cronache/2Cronache27

←2 Crònache 26

La Bibia piemontèisa Ij lìber dle Crònache

2 Crònache 28→

La Bìbia piemontèisa - 2 Crònache 27

27

Iotam a regna an Giuda

¹Iotam a l'avìa vintessinch agn cora ch'a l'é ancaminasse a regné e a l'ha regnà sëddes agn a Gerusalem. Soa mare a l'era Jerusa fija 'd Zadoch. ²Chiel a l'ha fàit lòn che a Nosgnor a-j pias, pròpi com a l'avìa fàit sò pare Usìa. Mach che a l'ha pa avù ël topé d'intré ant ël templi. Contut, la gent a l'é andàita anans a comportesse ‘d manera përversa.

³Chiel a l'ha fàit arconstruì la Pòrta dë dzora dël Templi ‘d Nosgnor e a l'ha fàit fé 'd grand travaj a le muraje ant la region conossùa sota 'l nòm d'Ofel. ⁴Chiel a l'ha fondà 'd sità neuve ant la region ëd le colin-e ‘d Giuda e butà ‘n pé 'd fortësse e 'd tor ant ij bòsch. ⁵Chiel a l'ha combatù na campagna militar contra dël rè dj'Amonita e a l'ha batuje. Col ann-là, j'Amonita a l'han ëdcò pagaje sent talent d'argent, desmila min-e 'd gran e desmila min-e d'òrdi. Nen mach, ma j'Amonita a l'han ëdcò pagaje 'l midem tribut për lë scond e 'l ters ann apress.

⁶Iotam a l'é vnùit a esse potent për ël motiv che a l'era determinà a vive con ubidiensa a la volontà dël Signor sò Dé.

⁷La rimanensa dj'aveniment dël regn ëd Iotam, comprèise tute soe campagne militar e soe 'mprèise, a l'é tut ëscrit ant ël volum dij Fàit dij rè d'Israel e 'd Giuda. ⁸Chiel a l'avìa vintessinch agn cora ch'a l'é ancaminasse a regné e a l'ha regnà për sëddes agn a Gerusalem. ⁹Peui Iotam a l'é mòrt e a l'é stàit sotrà ant la sità 'd David^[1]. Sò fieul Acas a l'ha arpijassalo tanme rè.

Nòte

1. La frase "la sità 'd David" as arferiss ambelessì a la fortëssa 'd Sion an Gerusalem e pa a Betlem. Cfr. 2 Samuel 5:7.