La Bibia piemontèisa/Testament Vej/Age/Age 2

←Agé 1

La Bibia piemontèisa Agé

Sacarìa 1→

La Bèbia piemontèisa - Agé 2

2

La glòria dël Templi

¹Dlë scond ann dël rè Dario, ël vintun dël sétim mèis, Nosgnor a l'ha comunicà soa paròla për ël mojen dël profeta Agé. A l'ha dije: ²"Sah! Parla përparèj a Zorobabel, fieul ëd Sealtiel, governator ëd Giuda, a Giosuè, fieul ëd Iosadach, ël grand sacerdòt, e a tut ël rest dël pòpol. Dije:

³Col ch'a l'é an tra 'd vojàutri, ch'a l'abia 'ncora vëddù sto Templi an soa glòria passà? E coma ch'i la vëdde al di d'ancheuj? A vòstri euj a l'é pa ardovusse a nen^[1]? ⁴Ma adess, corage, Zorobabel! I lo diso mi, ël Signor! Corage, Giosuè, fieul ëd Iosadach, grand sacerdòt! Corage, gent tuta dël pais! Al travaj! Përché mi i son con vojàutri. I lo diso mi, ël Signor dl'Univers! ⁵E mè Spirit a stà con voi. Gnun-e tëmme, përchè ch'i l'hai fàit na promëssa ai vòstri antich cand ch'a son surtì da l'Egit^[2], e mè Spirit, ëdcò ancheuj a n'é testimòni.

⁶Parèj a dis ël Signor ëd l'Univers: ancora 'n pòch e mi i socrolerai 'l cel e la tèra^[3], ël mar e la tèra ch'a sta al sùit. ⁷I s-cinconerai tute le nassion, e antlora a scoreran ij tesòr ëd tute le gent e i j'ampinirai 'd glòria cost Templ. I lo diso mi, ël Signor dl'Univers. ⁸L'argent a l'è mè! I lo diso Mi, ël Signor ëd l'Univers. ⁹La glòria ch'a ven da cost Templi a sarà pì che cola 'd na vira. Iv lo diso Mi, ël Signor ëd l'Univers, e an cost leu mi i-i butrai la pas. I lo diso mi, ël Signor ëd l'Univers.

Consultassion dij sacerdòt

¹⁰Dël vintequat dël mèis ch'a fà neuv, ëd lë scond ann dël rè Dario, la Paròla 'd Nosgnor a l'é stàita adressà al profeta Agé con coste paròle: ¹¹Parèj a dis ël Signor ëd l'Univers: 'Ciàmje donch ai sacerdòt na decision, an costa manera: ¹²Se cheidun a pòrta 'd carn sacrificà ant l'orlo 'd soa vestimenta e a toca con la broa 'd soa vestimenta 'd pan, na pitansa, ëd vin, d'euli e d'àutr mangé, tut-sossì vnirà-lo sant?". Ij sacerdòt a l'han rësponduje: "Nò". ¹³E Agé a l'ha dit: "Se cheidun a l'é fasse 'mpur për un cadàver, o a toca un-a 'd cole ròbe-lì, coste-sì a vniran ampure^[4]?". Ij sacerdòt a l'han rësponduje: "Lòn a sarà 'mpur!". ¹⁴Antlora Agé a l'ha ciapà la paròla an costa manera: "Parèj a l'é cost pòpol! Parèj a l'é costa nassion dë 'dnans ëd mi! I lo diso mi, ël Signor. Parèj a l'é tut ël travaj ëd soe man, e nen mach, ma 'dcò lòn ch'a më smon-o ambelessì a l'é pa pur".

Promëssa 'd prosperità an campagna

¹⁵E adess penseie da bin an vòst cheur, d'ancheuj anans. Anans che a s'ancaminèissa a buté pera ansima a pera ant ël santuari 'd Nosgnor, ¹⁶cola ch'a l'era vòstra condission? A s'andasìa a 'n baron andova ch'a së spetavo vint mzure 'd gran, ma a-i në j'era mach des; a s'andasìa a na tin-a da sinquanta brinde, e a-i në j'era mach vint. ¹⁷I l'hai frapave con ruso, con ël mal dël carbon e con la tempesta, tut ël travaj dle vòstre man, ma vojàutri i seve pa tornà a mi. I lo diso mi, ël Signor! ¹⁸Penseie donca da bin drinta 'd vòst cheur, da ancheuj anans, dal vintequat dël mèis ch'a fà neuv, visadì dal di ch'a son fongasse le fondamenta dël Templi 'd Nosgnor. ¹⁹Se 'l gran a vnirà 'ncor a manché ant ël grané e se ancóra la vis, ël fi, ël pom granà, l'uliv, a daran pi nen ij sò frut! D'ancheuj anans mi iv benedirai.

Promëssa a Zorobabel

²⁰La Paròla 'd Nosgnor a l'é stàita adressà na sconda vira a Agé, ël vintequat dël mèis, con coste paròle: ²¹'Pàrlje parèj a Zorobabel, ël governator ëd Giuda. Dije: Mi i vado a fé tramblé cel e tèra. ²²Ij darai 'l vir ai tròno dij regn e i dësblerai la potensa dij rè dle nassion. Mi i ambosrai ij chèr e ij sò echipagi: a tomberan cavaj e sivalié, tùit a saran passà da part a part con la spa dël frel. ²³An col di-lì, i lo diso mi, ël Signor ëd l'Univers, mi it pijerai, o Zorobabel, fieul ëd Sealtiel, mè servitor. i lo diso mi ël Signor, e it butrai com un cacèt: përchè it ses ti ch'i l'hai sernù. I lo diso mi, ël Signor ëd l'Univers".

Nòte

1. Cfr. Esdra 3:12.
2. Cfr. Surtìa 29:45-46.
3. Cfr. Ebrèo 12:26.
4. Cfr. Numer 19:11-22.