La Bibia piemontèisa/Testament Neuv/Gioann Litre/2Gioann

←1 Gioann 4

La Bibia piemontèisa Litre 'd Gioann

3 Gioann→

La Bìbia piemontèisa - 2Gioann

Seconda litra 'd Gioann

Introdussion e ringrassiament

¹L'ansian a la Dama^[1] sernùa e ai sò fieuj, ch'i-j veuj bin an vrità, e nen mach mi, ma dcò tuti coj ch'a son rivà a conòsse la vrità, ²përchè la vrità a viv an nojàutri e a sarà con nojàutri për sèmper. ³Che la grassia, la misericòrdia e la pas, ch'a ven-o da Dé 'l Pare e dal Signor Gesù Crist, pien ëd vrità e d'amor, a sio sèmper con nojàutri.

⁴I son motobin arlegrame d'avèj trovà cheidun dij tò fieuj ch'a vivo d'acòrd con la vrità scond ël comandament ch'i l'oma arseivù dal Pare.

Avis contra ij magister fàuss

⁵Contut adess, Dama, it arciamo a la ment ch'i l'oma da vorèisse bin l'un con l'àutr^[2]. Sto-sì a l'é pa 'n comandament neuv, ma col ch'i l'oma arseivù fin-a dal prinsipi. ⁶Vorèisse bin a veul dì fé lòn che Nosgnor a l'ha comandane^[3], e chiel a l'ha comandane 'd vorèisse bin l'un con l'àutr, pròpi coma ch'i l'eve sentùlo fin-a dal prinsipi. ⁷I diso parèj përchè për ël mond a coro motobin d'ambrojon ch'a confesso pa che Gesù Crist a sia vnùit përdabon ant un còrp genit^[4]. Coj ch'a diso parèj a son dj'ambrojon e dj'anticrist. ⁸Pijeve varda 'd nen perde 'l frut ëd nòstr travaj, përchè un bel dì i n'arseivroma n'arcompensa pien-a.

⁹Chionque a trasgrediss^[5] la dotrin-a 'd Gesù Crist e a-j resta nen fedel, a peul nen dì ch'a sia 'n comunion con Dé^[6]; col ch'a restà ant la dotrin-a 'd Crist a resta an comunion con ël Pare e 'l Fieul. ¹⁰Se cheidun a ven da voi e a porta pa cola dotrin-a-lì, arsèivlo nen an vòstra ca e gnanca deje 'l salut, ¹¹përchè coj ch'a-j dan ël salut a farìo mach vëdde d'esse sòcio 'd gent ch'a fà d'euvre grame.

Conclusion

¹²I l'avria da dive tante d'àutre ròbe, ma i veui nen felo con ëd carta e d'inciòstr, përch' i spero 'd podèjve vëdde bin tòst ëd përson-a. Antlora nòstra gòj a sarà completa.

¹³At saluto ij fieuj ëd toa seure, sërnùa da Nosgnor.

Nòte

1. O "madama". Costa frase a s'arfà a o a na përson-a o a na cesa (o a la Cesa an general). Cheidun a l'ha proponù che 'l destinatari a sia na fomna cristian-a ch'as ciama "Electa", ma la midéma paròla ant ël vers 13 a l'é ciàir ch'a sia n'agetiv, e nen un nòm pròpi. La spiegassion la pì probàbil a l'é che la "dama sernùa" a l'era na cesa particolar a na serta distansa da 'ndoa l'autor as trovava.
2. Cfr. Gioann 13:34; 15:12,17.
3. O "vive second ij comandament dël Pare".
4. O "ant la carn".
5. O "ch'a va pì anans”.
6. O "a l'ha nen Nosgnor".