La Bibia piemontèisa/Testament Neuv/Gioann Litre/1Gioann 4

←1 Gioann 3

La Bibia piemontèisa Litre 'd Gioann

1 Gioann 5→

La Bìbia piemontèisa - 1Gioann 4

Prima litra 'd Gioann

4

Jë spìrit a la preuva

¹Car ij mè amis! Chërde nen a tuti coj ch'a paress ch'a sio ispirà da Nosgnor^[1], ma buteje a la preuva për vëdde ch'a lo sio për dabon^[2], përchè, ch'a coro për ël mond, a-i son motobin ëd profeta fàuss. ²I peule arconòsse s'a son për dabon ispirà da Nosgnor da sta manera-sì: se cheidun a pretend d'esse 'n profeta^[3] a l'ha da arconòsse^[4] che Gesù a l'é 'l Crist ch'a l'é vnù 'nt la carn^[5], col-lì a l'ha lë Spìrit ëd Nosgnor. ³Ma se cheidun ch'a pretend d'esse 'n profeta, a arconòss pa la vrità rësguard a Gesù, col-lì a l'é nen da Dé, ma a l'ha lë spìrit ëd l'Anticrist, ch'i l'eve sentù ch'a l'avia da rivé, e che adess a l'é già an gir për ël mond.

⁴Vojàutri, mè car fieuj, i aparten-e a Nosgnor. I l'eve giumai vagnà na vitòria contra cola gent-là, përchè lë Spìrit ch'a stà an vojàutri a l'é pì fòrt^[6] che col ch'a stà 'nt ël mond. ⁵Cola gent a aparten a cost mond. A l'ha na manera 'd parlé ch'a va bin d'acòrdi con ël mond: a l'é për lòn che 'l mond a-j dà da ment. ⁶Nojàutri i apartenoma a Nosgnor, e coj ch'a conòsso Nosgnor a në scoto. Coj ch'a aparten-o nen a Nosgnor a veulo pa scotene. A l'é da costa manera-sì ch'as peul arconòsse lë spìrit ëd la vrità e lë spìrit ëd l'eror^[7].

Dè a l'é amor

⁷Car ij mè amis, voromse bin l'un l'àutr përchè l'amor a ven da Nosgnor e col ch'a veul bin a l'é 'n fieul ëd Dé^[8] e a conòss Dé. ⁸Col ch'a sà nen vorèj bin a l'ha pa conossù Dé, përchè Dé a l'é amor. ⁹Dé a l'ha mostrà vàire ch'an veul bin cand ch'a l'ha mandà sò Fieul ùnich ant ël mond përchè i podèisso arsèive 'd vita grassie a chiel. ¹⁰L'amor ch'a conta a l'é nen tant ch'i soma stàit nojàutri a vorèje bin a Dé, ma che chiel a l'ha vorsune bin për prim e a l'ha mandane sò Fieul për esse 'l sacrifissi d'espiassion^[9] dij nòstri pecà.

¹¹Car ij mé amis, dàit che Dé a l'ha vorsune tant bin parèj, nojàutri i dovoma 'dcò vorèisse bin l'un con l'àutr. ¹²Dé, gnun a l'ha mai vëddulo^[10], ma, s' is vorsoma bin l'un l'àutr, chiel a stà an nojàutri e sò amor a l'é rivà a compiment. ¹³A l'é parèj che Dé a l'ha dane 'd sò Spirit coma na preuva ch'i soma an comunion con chiel e chiel a stà an nojàutri^[11]. ¹⁴Ëd pì, i l'oma vëddù con ij nòstri euj midem, e në rendoma testimoniansa, che 'l Pare ha l'ha mandà sò Fieul për esse 'l Salvator dël mond.

¹⁵Tuti coj ch'a confesso che Gesù a l'é 'l Fieul ëd Nosgnor, a l'han Dé ch'a viv an lor e lor a vivo an Nosgnor. ¹⁶Nojàutri i l'oma conossù l'amor che Dé a l'ha për nojàutri e i l'oma chërduje. Dé a l'é amor, e coj ch'a vivo 'nt l'amor a son an comunion con Dé e Dé a viv an lor. ¹⁷Peui, antant ch'i vivoma an comunion con Dé^[12], nòstr amor a chërs sèmper ëd pì fin-a a sò compiment final. A l'é për lòn ch'i l'oma nen tëmma dël Di dël Giudissi e i lo podroma passé con fiusa, përchè an cost mond i vivoma coma Gesù^[13]. ¹⁸Coj ch'a l'han d'amor a l'han pa pau, përchè l'amor, cand ch'a riva a compiment, a scassa la pau. S'i l'oma pau l'é përch' i tëmmoma 'n castigh e sossì an mostra ch'i l'oma ancora nen fàit l'esperiensa pien-a 'd sò amor përfet, compì. ¹⁹I savoma vorèj bin përché ch'a l'ha vorsune bin chiel për prim.

²⁰Se cheidun a dis: "I veuj bin a Dé", e tutun, a l'ha an òdio sò fratel, col-lì a dis na busiardarìa; përché s'i l'oma nen d'amor për coj ch'i vëddoma, coma podrìom-ne avèj d'amor për Nosgnor, ch'i lo vëddoma pa? ²¹Sto-sì a l'é 'l comandament ch'i l'oma arseivù da Gesù: col ch'a l'ha d'amor për Dé a l'ha d'avèj d'amor ëdcò për ij sò fratej e sorele cristian.

Nòte

1. O "chërde pa a tùit jë spirit".
2. O "për vëdde s'a l'é në spirit ch'a ven-a da Dé për dabon".
3. O "Se në spirit".
4. O "a confessa".
5. O "ch'a l'é fasse òm".
6. O "grand".
7. O "dl'angann".
8. O "a l'é nassù da Nosgnor".
9. O "la vìtima d'espiassion", "la propissiassion".
10. Cfr. Gioann 1:18.
11. O "Da sossì i savoma ch'i stoma an Chiel e Chiel a stà an nojàutri: a l'é ch'a l'ha dane 'd Sò Spirit".
12. O "an Dé".
13. O "tal ch'a l'é Chiel i lo soma 'dcò nojàutri an cost mond".